Mu itangazo ryashyizwe ahagaragara Minisiteri y’Urubyiruko yagaragaje ko aba batekamutwe bari kuyiyitirira bahamagara cyangwa bohereza ubutumwa bugufi bayiyitirirra.

Iyi minisiteri kandi igaragaza ko abo bantu bashukisha bamwe ku bajyana mu mahanga hanyuma bakabasaba amafaranga, ivuga ko atari abakozi bayo.

Itangazo rikomeza rigira riti “Minisiteri y’Urubyiruko irasaba Abaturarwanda kugira amakenga kuko hari Abatekamutwe bahamagara cyangwa bakohereza ubutumwa bugufi batwiyitirira! Bimaze kugaragara ko hari abashukishwa kujyanwa mu mahanga bagatanga amafaranga.”

Minisiteri yongeye kandi kuburira abari kubikora ko ari ibikorwa bihabanye n’amategeko y’u Rwanda bityo ko uzabifatirwamo azabihanirwa n’amategeko.

Ibi bikorwa bishobora kandi gufatwa nk’icyaha gihanwa n’amategeko ahana y’u Rwanda nko kwihesha ikintu cy’undi hakoreshejwe uburiganya n’ibindi.

Icyaha cyo kwihesha ikintu cy’undi hakoreshejwe uburiganya (Escroquerie), gihanwa n’ingingo ya 174 ivuga ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi ya miliyoni 3 Frw ariko atarenze miliyoni 5 Frw.