00:00:00 IGIHE NETWORK KN KINYARWANDA EN ENGLISH FR FRANCAIS

MINICOM yateguje abahinzi b’icyayi ko isoko rigiye kwaguka

Yanditswe na Prudence Kwizera
Kuya 17 December 2022 saa 08:43
Yasuwe :

Minisiteri y’Ubucuruzi n’Inganda (MINICOM) yasabye abahinzi b’icyayi gukomeza kongera umusaruro mu bwinshi no mu bwiza, ibizeza ko isoko ryacyo rikomeje kwaguka mu gihugu no mu mahanga.

Umukozi wa MINICOM ushinzwe ubucuruzi, Muvandimwe Freddy, yabigarutseho ku wa Gatatu tariki ya 15 Ukuboza 2022 ubwo yifatanyaga n’Uruganda rw’Icyayi rwa Mata mu Karere ka Nyaruguru kwizihiza umunsi ngarukamwaka w’umuhinzi w’icyayi.

Yagaragaje ko uko imyaka yagiye ihita icyayi cy’u Rwanda cyagiye cyiyongera kandi kigakundwa ahantu hose no mu mahanga kikinjiza amafaranga menshi mu gihugu.

Yavuze ko mu 2019 icyayi cyinjije miliyari 77, 9 z’amafaranga y’u Rwanda naho mu 2020 cyinjiza asaga miliyali 82 Frw mu gihe mu 2021 yazamutse agera kuri miliyali 102,9 Frw.

Ati “Nkaba nemeranywa n’intego twihaye yo kugera kuri miliyali 113 z’amafaranga y’u Rwanda mu mwaka utaha.”

Yabibukije ko u Rwanda ruri mu bihugu bya mbere byasinye amasezerano y’isoko rusange rya Afurika ryenda gutangira, asaba abahinzi b’icyayi guharanira kongera umusaruro kugira ngo igihugu kizabone icyo kiricuruzaho.

Ati “Isoko rimwe rya Afurika ibihugu byinshi hafi 54 byamaze gushyiraho umukono ariko ku isonga ibihugu umunani birimo n’u Rwanda akaba ari byo igerageza rigiye gutangiriraho. Ni iki Abanyarwanda tugiye gucuruza kuri iryo soko rigari rifite abaturage bangana na miliyali imwe.”

Yakomeje agira ati “Tuzajyanayo ibikorerwa mu Rwanda birimo n’icyayi kiri ku isonga.”

Yavuze ko ibyo bihugu ari Tanzanie, Kenya, Ghana, Misiri, Cameroun, Tunisie, Ibirwa bya Maurice n’u Rwanda.

Bamwe mu bahinzi b’icyayi nabo bavuze ko bagiye kongera umusaruro mu bwiza no mu bwinshi kuko bakibonyemo imari ikomeye.

Nyiranshuti Alodie ati “Mu cyayi nkuramo ibihumbi bigera kuri 400 ku kwezi kandi nkomeje kongera ubuso no kuzamura umusaruro uboneka kuri hegitari.”

Mu kwizihiza umunsi ngarukamwaka w’umuhinzi w’icyayi ku nsanganyamatsiko igira iti "Ubuhinzi bw’icyayi inkingi y’iterambere rirambye". Hanatanzwe ibihembo bitandukanye ku bahinzi n’abasoromyi babaye indashyikirwa, aho bahawe amatungo magufi n’amaremare ndetse na matela zo kuryamaho.

Bamwe mu bahinzi b'icyayi bavuze ko bagiye kongera umusaruro
Umuyobozi Mukuru w'Uruganda rw'Icyayi rwa Mata, Barayagwiza Joseph yavuze ko bakomeje gukora ibishoboka byose mu kongera ubwinshi n'ubwiza bw'icyayi
Abahinzi b'icyayi bagikoreye neza bahawe ishimwe
Abahinzi babaye indashyikirwa bahawe inka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .