00:00:00 IGIHE NETWORK KN KINYARWANDA EN ENGLISH FR FRANCAIS

Miliyoni 370 Frw amaze gukoreshwa mu gutera inkunga imishinga y’abavuye mu bigo ngororamuco

Yanditswe na Igizeneza Jean Désiré
Kuya 29 Ukwakira 2022 saa 09:53
Yasuwe :

Ubuyobozi bw’Ikigo cy’Igihugu Gishinzwe Igororamuco, NRS bwatangaje ko binyuze mu buryo butandukanye bumaze kuguriza abava kugororerwa muri iki kigo agera kuri miliyoni 370Frw abafasha kugura ibikoresho byo kwifashisha mu mishinga itandukanye bijyanye n’imyuga baba barigiyeyo.

Bikubiye mu butumwa bwatanzwe mu biganiro byabaye kuri uyu wa Gatanu tariki 28 Ukwakira 2022 bihuje Polisi y’Igihugu n’urubyiruko 300 rwahoze rugororerwa mu bigo bya Nyamagabe, Iwawa na Gitagata, hagamijwe kureba uburyo uru rubyiruko rwiswe Imboni z’Impinduka rwafasha mu gukumira ibyaha no guhindura bagenzi babo.

Ni ibiganiro byitabiriwe n’abayobozi mu nzego zitandukanye barimo Minisitiri w’Ubutegetsi bw’Igihugu, Gatabazi Jean Marie Vianney, Umuyobozi Mukuru wa Polisi y’Igihugu wungirije ushinzwe ibikorwa, DIGP Felix Namuhoranye, Umuyobozi wa NRS, Fred Mufulukye n’abandi.

Mufulukye yavuze ko iyo uru rubyiruko rumaze kuva mu bigo ngororamuco babanza kubereka amahirwe atandukanye ahari arimo no kuvugana n’Ubuyobozi bw’Ikigega gitanga ingwate, BDF bukabaha inguzanyo bazishyura nyuma.

Ati "Hari amafaranga Leta yagiye inyuzamo (muri BDF), binyuze muri NRS ndetse n’andi aturuka mu buryo butandukanye yo kubafasha. Bafashwa kwiga imishinga hanyuma bakagurirwa ibikoresho bazishyura, ubu bamaze guhabwa miliyoni 370 z’amafaranga y’u Rwanda."

Uyu muyobozi avuga ko banabakangurira kugira ngo bamenye ko ayo mahirwe ahari ashobora kubafasha kwiteza imbere, akanabashimira umuhate bagira mu kwishyura inguzanyo baba barahawe.

Munderere Viateur wo mu Karere ka Karongi wagororewe Iwawa mu cyiciro cya kabiri, avuga ko kubera amateka ashaririye yanyuzemo ya Jenoside yakorewe Abatutsi mu 1994, byatumye yiheba agatangira kunywa ibiyobyabwenge ariko nyuma yo kuva kugororwa ubu yabaye Rwiyemezamirimo uha abandi akazi.

Ati"Kera narangwaga n’ikinyabupfura gike nkanywa n’ibiyobyabwenge byinshi cyane ariko ubu ndi umushoramari. Mfite ibigo bibiri, icy’ubukerarugendo n’icy’ubuhinzi n’ubworozi. Ya mafaranga umuntu yaguragamo mugo n’ibindi nyakoresha mu bizana impinduka."

Ni ingingo idahabanye n’iya Uwase Yvonne wo mu Karere ka Nyarugenge wari waragiye kugororerwa i Gitagata uvuga ko nyuma yo kuvayo ubu yihangiye umurimo wo gutunganya imisatsi, ubu akaba amaze gutoza abarenga 30 nabo bari gukora.

Ati "Ubu bose barakora, barampamagara mwarimu ibintu numvaga ko bitashoboka ko nakwitwa undi muntu ariko ubu nitwa Mwarimu w’abanyeshuri bageze kure biteza imbere."

Iyo imboni ipfuye, ijisho ryose ntirireba...

Minisitiri w’Ubutegetsi bw’Igihugu, Gatabazi Jean Marie Vianney yavuze ko nk’uko aba bamaze kugororerwa mu bigo bitandukanye bitwa Imboni z’Impinduka, bagomba kumenya ko imboni iyo ipfuye ijisho ryose ritabona bagakangurira bagenzi babo kureka kwishora mu biyobyabwenge n’ibindi byaha ahubwo bakiteza Imbere.

Ati "Turabasaba gutekereza cyane bakagira indangagaciro na kirazira birinda gusubira muri bya biyobyabwenge n’ibindi ndetse banigisha bagenzi babo ububi bwabyo binyuze mu gutanga amakuru cyane ko bashobora kubimenya kurusha uko ubuyobozi bubimenya."

Minisitiri Gatabazi yavuze ko bifuza ko urundi rubyiruko rwajya rujya kubasura bigendanye n’ibyo bamaze kugeraho biteza imbere kuko bafite ubushake bwo kwigisha no guhugura bagenzi babo mu kwirinda kutazanyura inzira bari barayobotse.

Yavuze ko icyizere bagomba kugirirwa n’abaturage bagomba kugishimangiza ibikorwa byiza ku buryo aho kwitwa abavuye Iwawa bashaka kubagaragaza mu ishusho mbi bazajya bitwa batyo kubera impinduka nziza bazana mu baturage.

Umuvugizi wa Polisi y’u Rwanda, CP John Bosco Kabera yavuze ko ari ngombwa kugirana ubucuti n’aba bavuye kugororerwa mu bigo ngororamuco kuko bashobora kwigisha bagenzi babo mu kubona ko guhinduka uva mu bibi ukiteza imbere bishoboka.

Kugeza ubu abamaze kunyura mu bigo ngororamuco bitandukanye mu gihugu ni ibihumbi 41, bafashwa kwibumbira hamwe abafite ubushobozi buke bagaterwa ingabo mu bitugu aho ubu bafite amashyirahamwe agera kuri 46 akora imirimo ibateza imbere.

Minisitiri Gatabazi yavuze ko bifuza ko urundi rubyiruko rwajya rujya kubasura bigendanye n'ibyo bamaze kugeraho
Minisitiri w'Ubutegetsi bw'Igihugu, Gatabazi Jean Marie Vianney yasabye urubyiruko rwagorowe gukangurira abandi kwirinda ibiyobyabwenge
Mufulukye yavuze ko uru rubyiruko rumaze kuva mu bigo ngororamuco babanza kuberaka amahirwe atandukanye bashobora kubyaz aumusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .