Miliyoni 36 Frw zahawe abahize abandi mu irushanwa rya ArtRwanda- Ubuhanzi (Amafoto)

Yanditswe na Muvunyi Arsène
Kuya 16 Ukuboza 2018 saa 10:44
Yasuwe :
0 0

Abanyempano batandatu bahize abandi mu irushanwa rya Art-Rwanda Ubuhanzi bahembwe amafaranga y’u Rwanda miliyoni esheshatu, amatsinda atatu yagaragaje umushinga mwiza, ahembwa miliyoni 30.

Iri rushanwa rya ArtRwanda- Ubuhanzi ryabaga ku nshuro ya mbere, rigamije guteza imbere impano mu nganda ndangamuco, zikabasha gutunga ba nyirazo. Ni umushinga wateguwe na Minisiteri ya Siporo n’Umuco n’iy’Urubyiruko, washyizwe mu bikorwa n’Umuryango wa Imbuto Foundation.

Iri rushanwa ryatangiye muri Kanama 2018 hashakishwa urubyiruko rufite impano ryazengurutse mu ntara zose z’u Rwanda n’Umujyi wa Kigali. Ryitabiriwe n’urubyiruko 2400, hatoranywamo 587.

Abahanzi 70 ni bo batoranyijwe barahugurwa, bigishwa uburyo bakora imishinga yabateza imbere, babinyujije mu mpano zabo.

Ku wa 15 Ukwakira 2018, nibwo irushanwa ryasojwe. Abahatanaga bose bahawe umwanya berekana impano zabo.

Akanama nkempurampaka katanze amanota ku bantu ku giti cyabo kari kagizwe n’inararibonye zirimo Muligande Jacques [Might Popo], Mazimpaka Jones Kennedy, Ladislas Ngendahimana, Linda Mukangoga, Gaël Vande Weghe na Pascal Bushayija.

Abagize akanama nkemurampaka kasuzumye imishinga yamuritswe barimo Munanayire Chantal, Mugabekazi Grace na Nshizirungu Emmanuel.

Abarushanwa bari mu byiciro bitandatu birimo Ubugeni, Indirimbo n’Imbyino, Ikinamico n’Urwenya, Gufata Amafoto n’Amashusho, Imideli n’Ubuvanganzo.
Habanje abacuranga piano barimo umwe wakoresheje telefoni. Abari mu gice cy’ikinamico babanje gukina umukino bise ‘Ubu si ubuzima’ ugaragaza ingaruka zo kutaboneza urubyaro.

Buri umwe yagarutse yiyerekana ku giti cye ari nabwo bahawe amanota n’abagize akanama nkemurampaka. Bakurikiranye n’abavuga imivugo, abanyarwenya no kubyina.

Ubutumwa bwinshi bwari mu mikino yerekanwe bwaganishaga ku bibazo biri mu muryango nyarwanda cyane cyane inda zitateganyijwe.

Abahanzi bari mu cyiciro cyo kwerekana amafoto n’amashusho, batambukaga berekana ibihangano byabo, bigaherekezwa n’ubutumwa byifitemo.

Icyiciro cy’indirimbo ni cyo cyarimo abahatana benshi kandi bafite impano zitangaje. Hari abaririmbaga bicurangira, abacurangiwe na bagenzi babo, uretse uwitwa Epiphanie waririmbye n’ijwi rye gusa, ibizwi nka Musique Clasique.

Uretse kwerekana impano zitandukanye, abahuriye mu cyiciro kimwe bishyize hamwe biga imishinga bakora ishobora kubabyarira inyungu, ikanagira uruhare mu guhanga imirimo mishya mu rubyiruko. Hagombaga guhembwa amatsinda atatu afite ihebuje.

Mu cyiciro cy’Ubugeni uwegukanye igihembo ni Muhawenimana Maximilien; mu cy’Indirimbo n’Imbyino ni Shyaka Jean Pierre; icy’Imideli ni Mukamurigo Jacqueline; icy’Ikinamico ni Uwumukiza Annuarite, mu Gufata Amafoto n’Amashusho ni Munezero Jean Chretien, naho mu Kuvuga Imivugo ni Maniraguha Carine uzwi nka Divine muri Filime ya Seburikoko.

Buri wese muri aba batsinze yahawe sheki ya miliyoni imwe y’amafaranga y’u Rwanda azamufasha kwagura impano ye.

Mu cyiciro cy’imishinga, umushinga wa mbere watsinze ni uw’itsinda ry’abanyamideli, batekereje uwo bise Rwanda Fashion Art centre, uzigisha urubyiruko ubudozi, bagashinga uruganda ruto rukora imyenda mu rwego rwo guteza imbere ibikorerwa mu Rwanda.

Uwa kabiri ni uw’itsinda ry’abakora ibijyanye no Gufata Amashusho n’Amafoto. Bafite umushinga witwa Reba Visual Limited n’ubundi bazakora ibijyanye no gukora ubucuruzi mu bijyanye n’akazi kabo.

Abandi bahawe igihembo ni abo mu gice cy’Ubuvanganzo batanze umushinga wo kwandika ibitabo n’imfashanyisho bizajya byifashishwa mu mashuri y’incuke.

Buri tsinda ryagenerwaga sheki y’amafaranga miliyoni 10 Frw azabafasha gutangira iyi mishinga.

Minisitiri wa Siporo n’Umuco, Nyirasafari Espérance, yijeje ubufasha abatsinze n’abatahembwe ko bazabashyigikira mu gusigasira impano zabo.

Yagize ati “Bamwe na bamwe bagiye bavuga ko badafite n’aho gukorera twiteguye kugira n’aho dutanga kugira ngo abakizamuka babashe no kugaragaza ibikorwa byabo dufatanyije na za minisiteri n’abafatanyabikorwa bose twakoranye.”

Umuyobozi w’Ikirenga w’Umuryango wa Imbuto Foundation, Madamu Jeannette Kagame, yashimiye abitabiriye irushanwa, abizeza ko bazababa hafi, abibutsa ko impano zabo zizabatunga mu gihe bakoze kinyamwuga.

Yagize ati “Abahanzi bacu, ni byo mufite impano zidasanzwe, twifuza ko zaguka zikagira uruhare rugaragara mu iterambere ryanyu ubwanyu ariko n’umuryango muri rusange. Mbijeje ko mutazabura ubakunda, ubumva, ubagira inama, ubashyigikira kandi duhari, ariko namwe birabasaba gukorana imbaraga mukaba abanyamwuga, impano mufite muzinoze… Ariko rero nk’uko mubizi “Akeza karigura”! Umwuga wanyu nimwe muzatuma tuwukunda kurushaho.”

Iri rushanwa rizajya riba buri mwaka, ryitezweho kuzamura umubare w’imirimo ihangwa nkuko intego ya Leta y’u Rwanda ari uguhanga imirimo ishingiye ku buhanzi ibihumbi 10 buri mwaka.

Herekanwe amashusho y’ibihe by’ingenzi byaranze iri rushanwa

Gashumba Néhémie w'imyaka 25 yerekanye ubuhanga mu gucuranga Piano
Nsengiyumva Regis Igihozo yerekanye ubuhanga mu gukina ikinamico
Abakina ikinamico berekanye umukino uhambaye bise 'Ubu si ubuzima' wari ukubiyemo ubutumwa bwakoze benshi ku mutima
Kwizera Emmanuel wari mu cyiciro cy'abafotora asobanura amafoto 10 yamuritse
Nsengiyumva Regis Igihozo akina ikinamico. Ubuhanga bwe bwanyuze benshi
Umunyarwenya Ndaruhutse Merci [Fally] yagaragaje impano yifitemo yo gutebya no gusetsa abantu
Uwiringiyimana Patience afite ubuhanga mu gukora ubugeni bwo kuvugisha agapupe yise 'Golizo the Crazy'
Umuhoza Clément ni umuhanga mu nkuru zishushanyije
Umuhanzi Tom Close (ibumoso) aganira na mugenzi we Bruce Melody wari mu bagize akanama nkemurampaka mu marushanwa y'ibanze yanyuze mu gihugu hose
Maniraguha Carine uzwi nka Divine muri Filime ya Seburikoko yahembwe nk'uwitwaye neza mu Kuvuga Imivugo
Murigande Jaques uzwi nka Mighty Popo yari mu bagize akanama nkemurampaka ku munsi wa nyuma
Butera Alphonse Masamba [Massamba Intore] yarebye urubyiruko rw'abanyempano rwahawe amahirwe yo kwigaragaza
Umuyobozi wa Contact FM/TV, Rudatsimburwa Albert
Bisangwabagabo Sankara Salomon yize Ubugeni ku Nyundo ariko anifitemo impano yo kuririmba
Uwase Bukuru Christiane ni umuririmbyi uzamukanye ingoga
Micomyiza Felix yagaragaje impano yo kuririmba
Madamu Jeannette Kagame akurikiye uburyo urubyiruko rwerekanaga impano
Batandatu bahize abandi mu byiciro byose byahatanirwaga, bahembwe miliyoni y'amafaranga y'u Rwanda
Umushinga w'abanyempano bahanga imideli wahembwe miliyoni 10 Frw
Mariya Yohana ahemba Shyaka Jean Pierre wabaye uwa mbere mu baririmbyi
Buri tsinda ryahabwaga umwanya rigasobanurira Akanama Nkemurampaka umushinga uhize indi ugafasha kubona igishoro
Minisitiri w'Urubyiruko, Rosemary Mbabazi, yitegereza kimwe mu bihangano byamuritswe
Tom Close yasangije abakiri bato urugendo rwe mu muzika
Niyitegeka Gratien [Seburikoko] yatanze ikiganiro cyagarutse ku rugendo rwe mu gukina sinema
Arthur Nkusi ni umwe mu bari bayoboye ibi birori
Makeda Mahadeo yafatanyaga na Arthur Nkusi
Minisitiri w'Urubyiruko, Rosemary Mbabazi, yitegereza kimwe mu bihangano byamuritswe
Hari abasemuriraga abafite ubumuga...
Umuyobozi wa RDB, Clare Akamanzi, avuga ibikorwa na Guverinoma y'u Rwanda mu guteza imbere abahanzi
Minisitiri Soraya Hakuziyaremye
Uyu munsi wa nyuma wari witabiriwe n'abantu b'ingeri zose

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza