00:00:00 IGIHE NETWORK KN KINYARWANDA EN ENGLISH FR FRANCAIS

MIGEPROF irifuza abagore benshi mu nzego z’ibanze

Yanditswe na Uwase Kevine
Kuya 12 Mutarama 2023 saa 11:49
Yasuwe :

Umunyamabanga Uhoraho muri Minisiteri y’Uburinganire n’Iterambere ry’Umuryango (MIGEPROF) Batamuliza Mireille yavuze ko bifuza ko umubare w’abagore n’abakobwa bakora mu nzego z’Ibanze mu turere n’imidugudu wiyongera, nkuko bimeze mu nzego zo hejuru.

Ibi yabigarutseho mu nama yabaye kuri uyu wa kabiri tariki 11 Mutarama 2023, yahuje Minisiteri y’Uburinganire n’Iterambere ry’Umuryango mu Rwanda hamwe n’Ishami ry’Umuryango w’Abibumbye ryita ku bagore (UN Women) mu rwego rwo kongera umubare w’abagore n’abakobwa bafite ubumenyi mu gukoresha ibikoresho by’ikoranabuhanga.

Batamuliza yagarutse ku mabare muto w’abagore ukigaragara mu nzego z’Ibanze ndetse n’abikorera, ko bifuza ko wa kwiyongera nkuko byagiye bigaragara mu zindi nzego nko mu Nteko Ishinga Amategeko.

Yagize ati, “ Mu itegeko nshinga twahisemo ko nibura 30% ry’abagore n’abakobwa bagomba kuba bari mu nzego zifata ibyemezo, hakiyongera n’indi mibare, atari kugarukira kuri uwo mubare gusa.”

Yakomeje agira ati, “ Kuri iyo ntego twihaye, hari hamwe twasanze hakiri umubare mu muto w’abagore n’abakobwa tugomba kuzamura, nko mu nzego z’Ubuyobozi bw’Ibanze harimo mu uturere, mu midugudu n’ahandi.”

U Rwanda kandi ruzwi ku rwego mpuzamahanga mu kugira umubare munini w’abagore bari mu Nteko Ishinga Amategeko, aho bagera kuri 61%, Sena ikagira 38%, Guverinoma ikabamo 50% mu gihe inzego z’ibanze zigomba kuba zigizwe na 30% by’abagore, nk’uko amategeko abivuga.

Iki cyigero nicyo Batamuliza yavuze ko aricyo bakwiye gufatiraho urugero mu zindi Nzego z’Ibanze, mu guteza imbere umugore n’umukobwa mu nzego zitandukanye.

Batamuliza yakomeje avuga ko nubwo intambwe imaze guterwa mu ihame ry’uburinganire mu Rwanda ikwiye kwishimirwa, hakwiye kurebwa na hakiri icyuho cy’imyumvire yo gutsikamira umugore n’umukobwa ikaranduka burundu.

Iyi nama yahuje Minisiteri y’Uburinganire n’Iterambere ry’Umuryango mu Rwanda hamwe n’Umuryango w’Abibumbye w’abagore, yateguraga inama mpuzamahanga y’Umuryango w’Abibumbye yiga ku bagore.

Ni inama iba buri mwaka ihuza ibihugu bitandukanye ku Isi, igamije kureba ibibazo abagore n’abakobwa bahura nabyo n’uburyo bwo gushaka ibisubizo byabyo, ikazaba tariki 6 kugeza 17 Werurwe 2023, mu mujyi wa New York , muri Leta zunze Ubumwe za Amerika.

Migeprof yasabye ko no mu nzego z'ibanze umubare w'abagore wiyongera
Hatanzwe ibitekerezo bitandukanye bigaruka ku iterambere ry'uburinganire n'ubwuzuzanye bw'abagabo n'abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .