00:00:00 IGIHE NETWORK KN KINYARWANDA EN ENGLISH FR FRANCAIS

Mastercard Foundation yatangiye guha buruse abanyeshuri biga muri UR

Yanditswe na Ntabareshya Jean de Dieu
Kuya 30 Ukwakira 2022 saa 08:34
Yasuwe :

Mastercard Foundation yatangije gahunda yo gutanga buruse ku banyeshuri b’amikoro make biga mu mashami atandukanye muri Kaminuza y’u Rwanda (UR), mu rwego rwo kubafasha kugera ku nzozi zabo.

Iyi gahunda ya Mastercard Foundation Scholar Program isanzwe ikorwa muri Kaminuza zinyuranye zo hirya no hino ku Isi, aho abasaga ibihumbi 40 bamaze kuyungukiramo.

Mu Rwanda, ku ikubitiro Mastercard Foundation igiye kwishyurira abana 75 biga mu mwaka wa mbere muri Kaminuza y’u Rwanda, batsinze neza mu mashuri yisumbuye.

Biganjemo abaturuka mu miryango ikennye, abafite ubumuga bunyuranye ndetse n’abana bakurikiye mu buzima bw’ubuhunzi.

Umuyobozi wa Mastercard Foundation mu Rwanda, Rica Rwigamba, yavuze ko gutangiza iyi gahunda muri Kaminuza y’u Rwanda bizafasha abana batishoboye kubona uburezi bwiza.

Ati "Imyaka 10 tumaze, abana basaga ibihumbi 40 bamaze kubona ubumenyi, bavuyemo abantu bakomeye n’abayobozi mu nzego zinyuranye. Kuri mwe twakiriye bo muri UR, mufite ubushobozi n’ubushake kandi muzaharanire kugira impinduka nziza n’iterambere ku gihugu cyacu n’umugabane muri rusange."

Umuyobozi wa Kaminuza y’u Rwanda, Dr Didas Kayihura Muganga, yavuze ko kubona umwana utishoboye agira uburezi bwiza bishimangira kudaheza, ndetse yemeza ko iyi ari intangiriro.

Ati “Mwabonye ibi byose babakoreye, mubona ni nk’itangira ry’ubuzima bushya, ariko ntabwo byari byatangira ahubwo ibyiza biri imbere. Buriya kugira ngo umunyeshuri abe aturuka mu muryango ukennye yige neza biragoye, bisaba ko hagira umuba hafi.”

Kuri aba banyeshuri, byari ibyishimo nyuma yo kubona ko bemerewe guhabwa buruse, nubwo abenshi bari basanzwe bari kwigira ku ideni rya Leta.

Ubundi ubonye buruse ya Mastercard Foundation ubuzima buba buhindutse kuko amafaranga yagenerwaga buri kwezi azwi nka buruse atunga abanyeshuri yiyongera, ndetse ntazanabarweho umwenda kuri Leta nk’uwarihiwe na yo.

Ibi kandi byiyongeraho n’ubumenyi butandukanye bahabwa n’ibigo bisanzwe bikorana na Mastercard Foundation, ibikoresho by’ishuri nka mudasobwa n’ibindi.

Bamwe muri aba banyeshuri basangije abitabiriye ibi birori byo gutangiza iyi gahunda ku mugaragaro, ubuzima bushaririye buri umwe yagiye acamo, maze batanga n’inama kuri bagenzi babo n’isezerano ryo kuzagirira igihugu akamaro.

Iranzi Patrick ni umwana wakuriye mu buhunzi, ubu yiga mu ishami rya Farumasi. Yasobanuye ko nk’umwana wari mu nkambi, ubuzima bwo kwiga bwari bugoye. ariko agerageza gukoresha amahirwe make yabonaga.

Umunyeshuri ufite ubumuga bwo kutabona, Kubwimana Emmanuel, yiga mu Ishami ry’Ubuvuzi rusange no kubaga.

Yavuze ko bigendanye n’ibizazane yahuye nabyo nk’ufite ubumuga, yifuza kuvamo umuganga mwiza uzahindura byinshi mu birebana n’indwara z’amaso.

Ati "Navukanye ikibazo cyo kutabona, byari ibintu bigoye ariko numvaga nifitemo ishyaka. Mu kwiga kwanjye nakunze gutsinda ndetse nkajya mba uwa mbere. Nubwo byansabaga kwifashisha ibyuma ariko natsindaga neza, kuko nari mfite intego yo kuzavamo umuganga mwiza w’amaso biturutse ku burwayi bwanjye."

Kubwimana yavuze ko n’abandi bana bafite ubumuga bakwiye kumva ko bashoboye muri buri kimwe, bakagira intego no guharanira kuyisohoza.

Iyi ni gahunda izaba ngarukamwaka mu gihe cy’imyaka 10 y’ubufatanye hagati Kaminuza y’u Rwanda na Mastercard Foundation.

Umuyobozi Mukuru wungirije wa UR Igenamigambi n'imiyoborere, Dr Raymond Ndikumana, yasonuye imiterere y'ubu bufatanye
Umuyobozi wa Mastercard Foundation mu Rwanda, Rica Rwigamba, yasabye uru rubyiruko gukora cyane
Mukamisha Olga Pamela yasabye bagenzi be guharanira iterambere rusange n'impinduka mu muryango
Aba banyeshuri basangije abandi ubuzima bushaririye bagiye banyuramo n'imbogamizi bagira mu myigire yabo
Dushimumuremyi Vasta yavuze ko yiteguye gutinyura abana b'abakobwa
Aba banyeshuri bahawe na mudasobwa zo kwifashisha mu masomo yabo
Hafashwe ifoto y'urwibutso nyuma y'iki gikorwa

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .