00:00:00 IGIHE NETWORK KN KINYARWANDA EN ENGLISH FR FRANCAIS

Madamu Jeannette Kagame yashimye ubutwari bw’abagize AVEGA-Agahozo bomoye ibikomere bya benshi

Yanditswe na Nshimiyimana Jean Baptiste
Kuya 14 June 2024 saa 08:06
Yasuwe :

Madamu Jeannette Kagame yagaragaje ko ubudaheranwa bw’abapfakazi barokotse Jenoside yakorewe Abatutsi mu 1994 bibumbiye mu muryango AVEGA-Agahozo, bwatumye bakora ibikorwa bikomeye birimo kurera imfubyi, komora ibikomere ku rugero rurenze urw’undi muntu wese ndetse bakagira uruhare rukomeye mu guhuza Abanyarwanda bose.

Ni ubutumwa yagejeje ku banyamuryango ba AVEGA -Agahozo kuri uyu wa 14 Kamena 2024, ubwo bari mu gikorwa cyo kwibuka ku nshuro ya 30 Jenoside yakorewe Abatutsi mu 1994, banazirikana imyaka 30 y’ubudaheranwa bwabaranze.

Madamu Jeannette Kagame yagaragaje ko Jenoside yakorewe Abatutsi ikimara guhagarikwa n’ingabo zari iza RPA, abapfakazi bayirokotse batanze byinshi birenze n’ibyo bari bafite bubaka umuryango nyarwanda.

Ati “Kubitegereza uyu munsi muri ababyeyi bizihiye u Rwanda mutaraheranwe, ni ibyo kwizihiza koko. Mwabaye inkingi n’ingabo ikingira umuryango ngo abo mureberera baba abakuru n’abato, batagira ikibahungabanya.”

Yanavuze ko uyu muryango watanze umusanzu ukomeye mu kuvura ibikomere byari byinshi mu Banyarwanda, unafasha mu kububakamo ubumwe.

Ati “Uyu muryango wabaye agahozo koko mu bihe byari bikomeye, utanga ihumure ndetse mwagerageje no komorana ibikomere bitari komorwa n’uwo ari we wese. Rimwe mu masomo akomeye twabigiyeho, ni imbaraga n’ubushobozi mwishatsemo bwo kumenya uko muhuza Abanyarwanda nyamara nta mahugurwa mwabiherewe.”

“Mwarabishoboye, mubasha gufatanya ubwanyu ariko natwe twese nk’Abanyarwanda. Mwakomeje kutwerera imbuto z’urukundo, kwihangana, ubunyangamugayo n’ibindi byose biranga umubyeyi ubereye u Rwanda.”

Madamu Jeannette Kagame yasobanuye ko urugendo rw’ubudaheranwa Abanyarwanda bizihiza mu myaka 30 ishize umuntu yarurebera mu bice bitatu, aho imyaka 10 ya mbere yari iyo kunamira abarenga miliyoni bishwe muri Jenoside yakorewe Abatutsi, no kubasubiza icyubahiro bambuwe bagashyingurwa mu cyubahiro.

Ati “Byari ibihe bikomeye by’agahinda kenshi byanaturemereye cyane, ibikomere ku mubiri no ku mutima byari bikiri byinshi. Cyari igihe cyo kwirabura ariko cyari igihe cyo gukemura ibibazo by’imibereho bari byugarije abanyamuryango.”

Indi myaka 10 yakurikiyeho yabaye iyo kuremera abarokotse jenoside “duhereye kuri bike haba amacumbi, amavuriro, kwigisha abana amashuri kandi na byo ntibyari byoroshye.”

Ni mu gihe imyaka 10 yindi yabaye iyo gutsura imibereho myiza n’iterambere bityo icyari icyizere gihinduka ubushobozi n’imbaraga.

Mukabayire Valerie wayoboye Umuryango AVEGA-Agahozo mu bihe byashize yagaragaje ko uyu muryango watangiranye intego yo kubaka ubushobozi bw’abapfakazi barokotse Jenoside yakorewe Abatutsi kandi iyo ntego yagezweho.

Ati “Ubu umupfakazi [warokotse Jenoside] ari kumwe n’abandi mu gihugu, ni umuturage nk’abandi ari mu bikorwa byose by’igihugu, ubu ntabwo wajya hariya abantu batuye no mu giturage ngo uvuge ngo ruriya rugo ni urw’umupfakazi. Rurasa n’izindi ndetse ahenshi rusa neza kurusha n’izirimo abagabo.”

Minisitiri w’Ubumwe bw’Abanyarwanda n’Inshingano Mboneragihugu Jean Damascène Bizimana, yagaragaje ko ubudaheranwa bw’abagize umuryango AVEGA-Agahozo bwatumye bashikama batanga ubuhamya mu nkiko bwatumye gusambanywa ku gahato bishyirwa mu byaha bya Jenoside yakorewe Abatutsi.

Ati “Mu bikorwa ntagereranywa byaranze ubudaheranwa bw’abapfakazi ba Jenoside yakorewe Abatutsi harimo ubuhamya bwatanze umusaruro ukomeye mu rwego rw’amategeko mpuzamahanga, nko kugaragaza ubukana bw’icyaha cyo gusambanywa ku gahato cyakoreshejwe nk’igikoresho cya jenoside. AVEGA na SEVOTA bagize uruhare mu gufasha abahuye n’iri shyano kwerura bakajya kubigaragaza mu nkiko. Byatanze umusaruro ukomeye kuko iki cyaha kitari guteganyijwe mu byaha bigize jenoside.”

Yasobanuye ko mu rubanza rwa Jean Paul Akayesu wari Burugumesitiri wa Taba (ubu ni mu karere ka Kamonyi), rwaburanishijwe n’Urukiko Mpuzamahanga Mpanabaha rwashyiriweho u Rwanda, abacamanza bumvise uburemere n’ubugome bw’iki cyaha cyakorewe abakobwa n’abagore b’Abatutsikazi, bafata icyemezo cyo kwinjiza gusambanywa ku gahato mu byaha mpuzamahanga bigize Jenoside.

Ati “Ni intambwe ikomeye yavuye mu budaheranwa bwanyu, bw’umuryango AVEGA-Agahozo.”

Umuryango AVEGA-Agahozo washinzwe mu 1995 n’abapfakazi barokotse Jenoside yakorewe Abatutsi mu 1994, ugamije guhumurizanya no gufashanya kongera kwiyubaka.

Madamu Jeannette Kagame yavuze ko AVEGA-Agahozo yagize uruhare mu komora ibikomere bya benshi bari bamaze kurokoka Jenoside yakorewe Abatutsi
Iki gikorwa cyabimburiwe no gufata umunota wo kunamira abazize Jenoside yakorewe Abatutsi
Mdamu Jeannette Kagame ubwo yari ageze ahabereye igikorwa cyo kwibuka imyaka 30 y'ubudaheranwa ya AVEGA-Agahozo
Umuryango AVEGA-Agahozo wageneye Madamu Jeannette Kagame impano
Umuyobozi Mukuru wa AVEGA-Agahozo, Kayitesi Immaculée, yashimye ubufasha Leta itahwemye kubaha
Minisitiri Dr Bizimana yagaragaje ko ubudaheranwa bw'abagize AVEGA-Agahozo ari bwo bwatunye icyaha cyo gusambanywa ku ngufu kijya mu bya Jenoside
Umuhanzi Suzana Nyiranyamibwa yashimye Madamu Jeannette kagame wababaye hafi mu bihe byose
Ibiganiro byagarutse ku rugendo rw'ubudaheranwa rw'abagize umuryango AVEGA-Agahozo
AVEGA-Agahozo yishimiye imyaka 30 y'Ubudaheranwa
Bashimiye Leta uburyo yababaye hafi mu rugendo rw'ubudaheranwa rw'imyaka 30
Madamu Jeannette Kagame yashimiye abanyamuryango ba AVEGA-Agahozo
Abanyamuryango ba AVEGA-Agahozo bashimiye Madamu Jeannette Kagame utarahwemye kubaba hafi
Madamu Jeannette Kagame yafatanye ifoto n'abanyamuryango ba AVEGA-Agahozo

Amafoto: Kwizera Herve


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .