Iri huriro rya munani ry’abagize umuryango Unity Club Intwararumuri ryabaye kuri uyu wa 6 Ugushyingo 2015, rifite insanganyamatsiko ’Abarinzi b’Igihango mu mujishi wa "Ndi Umunyarwanda”.

Mu ijambo yagejeje ku bagize guverinoma n’abahoze bayirimo hamwe n’abo bashakanye, Madamu Jeannette Kagame yabasabye kurinda igihango ari nako bashorera imizi yacyo mu rubyiruko rukazasigarana igihugu kirangwa n’indangagaciro.

Yagize ati “Impamvu ituma tugaruka no kuri gahunda ya ‘Ndi Umunyarwanda” nuko twese twemera ko twarezwe n’ubuyobozi bubi, byatugizeho ingaruka binagera no kubadukomokaho,indorerwamo zitureba n’amaso atwitegereza bifite icyo bituvugaho”

Yasobanuye ibikomere urubyiruko rufite agendeye ku gitabo “Un Papa de Sang” cya Jean Hatzfeld waganiriye n’urubyiruko agaragaza ishusho yarwo mu buryo bubiri.Yagaragaje ko hari abagitewe ipfunwe n’ibyaha ababyeyi n’imiryango yabo bakoze ndetse n’urubyiruko rubana n’umubabaro rudateze kuzibagirwa.

Yagize ati “Hari urubyiruko rukomoka ku babyeyi bakoze Jenoside, hari urubyiruko rwacitse ku icumu, urwavutse ku babyeyi bafashwe ku ngufu n’urubyiruko rwabakuriye hanze y’Igihugu."

Avuga ko hakozwe byinshi mu kubanisha Abanyarwanda, kwimakaza ubworoherane n’ubwiyunge ariko hakaba hakiri urugendo rurerure mu kubaka ubumwe.

Ati “Dukwiye kwibaza impamba twaha uru rubyiruko kugirango ibyakozwe bigere ku bunyarwanda burambye, tutababeshye, tutabatera ubwoba ariko tunabategura neza”

Yakanguriye abayobozi kwimika igihango bafitanye n’u Rwanda aho abato batozwa kuzakura baziko kubahana ,kubana mu bwisanzure no mu bwubahane ari umurage ugomba gukomeza.

Yakomeje agira ati “Bayobozi bavandimwe igihugu cyacu kiri mu isi igenda yiruka, turakurikira kuko ntitwasigara, ariko turakurikira n’ingendo yacu itubereye."

Umurinzi, Igihango, Umujishi

Aya ni amagambo asobetse ari mu nsanganyamatsiko y’uyu munsi twavuze haruguru yagarutsweho na Madamu Jeannette Kagame ndetse n’abagiye batanga ibiganiro bose.

Madamu Jeannette Kagame yavuze ko umurinzi cyari igiti Abanyarwanda bahaga agaciro gakomeye naho umujishi ukaba ugomba kuba utanaze,urinda Abanyantege nke n’ibifite agaciro.

Naho kuba umujishi ari ukuba umutabazi, gukorana ibakwe ukagendana n’abandi kuko iyo munyuranyije ubangamira uwo mutwaranye muri uwo mujishi.

Perezida wa Komisiyo y’Ubumwe n’Ubwiyunge, Bishop John Rucyahana nawe yavuze ko umurinzi ari uwiyeguriye kurinda ikiza, umujishi utanaze urinda umunyantege nke, urinda igifite agaciro ngo kidahutazwa.

Ati “Kera abantu bajishaga inka,igisabo,ingobyi ihetse umwana, ingobyi yahekaga abageni ikaba itandukanye n’ingoyi ndetse n’umugozi uzirika ibindi."

Umuyobozi wa CNLG, Dr Bizimana Jean Damascene, nawe yashimangiye ko urubyiruko rukwiye kwitabwaho.

Ati “Urubyiruko nirwo ruzasigara rwubakira ku nkingi z’aya mateka n’indangagaciro ngo igihugu gikomeze kuba igihugu nkuko cyahoze.”

Senateri Gasamagera Wellars nawe yavuze ko u Rwanda ari igihugu gifite umwihariko wo,kwigenga,kugira izima ry’ukuri,kwihitiramo abo rubana ntawuruhatiye.

Ati “Indangakamere zidutemba mu maraso tuzaziraga nabo tubyaye kuko arizo zituma tugira amahoro n’umutekano.”

Ihuriro rya 8 rije no kwizihiza Abarinzi b’Igihango batoranyijwe, bazatwara urumuri rukagera kuri bose, buri Munyarwanda agahabwaho isoko y’ishema n’umuco w’ubupfura nkuko byasobanuwe.

Umurinzi w’igihango w’Ikirenga ni Perezida wa Repubulika Paul Kagame uza kugeza ijambo kubitabira umugoroba w’ubusabane uberamo umuhango wo kumurika Abarinzi b’Igihango ku rwego rw’Igihugu.

Madamu Jeannette Kagame yasabye abayobozi kuba imizi y’igihango izashorera mu rubyiruko

Email:[email protected]