00:00:00 IGIHE NETWORK KN KINYARWANDA EN ENGLISH FR FRANCAIS

M23 yashinjwe kugaba ibitero ku birindiro bya Monusco

Yanditswe na Mukwaya Olivier
Kuya 9 June 2022 saa 04:49
Yasuwe :

Igisirikare cya Leta ya Repubulika Iharanira Demokarasi ya Congo, FARDC, cyatangaje ko abasirikare batatu ba Tanzania bo mu Ngabo z’Umuryango w’Abibumbye zishinzwe kubungabunga Amahoro muri RDC (MONUSCO) bakomerekeye mu mirwano n’Umutwe wa M23.

FARDC yemeje aya makuru binyuze mu itangazo ryasohowe n’Umuvugizi wa Guverineri w’Intara ya Kivu, Général de Brigade Sylivain Bomusa Ekenge.

Yemeje ko umwe muri aba basirikare yakomeretse bikomeye cyane.

Général de Brigade Sylivain Ekenge yemeje ko M23 yagabye igitero ku Ngabo za Monusco cyakomerekeyemo abasirikare batatu ba Tanzania cyiyongera ku cyahanuye kajugujugu.

Yagize ati “Ingabo za M23 zagabye ibitero ku birindiro by’Ingabo z’Umuryango w’Abibumbye biri i Muhati hafi ya Bikenge muri Gurupoma ya Jomba muri Teritwari ya Rutshuru mu gihe zari mu kazi gasanzwe. Abasirikare batatu bo muri Tanzania bakomeretse, umwe ameze nabi.’’

“Ibi bije bikurikira aho bahanuye kajugujugu ya Monusco hakagwamo abasirikare umunani.’’

Ingabo z’Umuryango w’Abibumbye zibinyujije kuri Twitter zamaganye Umutwe wa M23 ziwushinja kuzigabaho igitero ku birindiro bya Shangi muri Teritwari ya Rutshuru.

Abasirikare bivugwa ko bakomerekeye muri iki gitero bari kuvurirwa mu Mujyi wa Goma.

Monusco yakomeje itangaza ko izakomeza kurwana ku ruhande rw’ingabo za Leta, FARDC, mu guhashya M23.

Tanzania ifite abasirikare barenga 800 mu mutwe udasanzwe w’Ingabo za MONUSCO ziri mu Burasirazuba bwa RDC akaba ari na zo zagize uruhare runini mu guhashya M23 mu 2013, ubwo watangazaga ko uhagaritse intambara, ugannye inzira y’ibiganiro byavuyemo amasezerano atarubahirijwe ari na yo nkomoko y’intambara nshya.

Ku wa 7 Kamena 2022, M23 na yo yashinje MONUSCO gufatanya n’ingabo za RDC, FARDC n’Umutwe w’Iterabwoba wa FDLR mu bikorwa byo kuyigabaho ibitero.

M23 yavuze ko ubu bufatanye bwatangiye kugaragara cyane mu bitero FARDC yayigabyeho guhera ku wa Mbere, bigakomeza no ku wa Kabiri. Uretse Monusco, FARDC na FDLR ibi bitero ngo biri no kugaragaramo abarwanyi ba Mai Mai Nyatura.

M23 yashinjwe kugaba ibitero ku birindiro bya Monusco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .