00:00:00 IGIHE NETWORK KN KINYARWANDA EN ENGLISH FR FRANCAIS

Uruhare rwa Rusesabagina mu bwicanyi n’ubujura byakorewe abaturage muri Nyabimata na Nyungwe (Amafoto na Video)

Yanditswe na Ishimwe Israel
Kuya 1 Mata 2021 saa 08:44
Yasuwe :
0 0

Kuri uyu wa Kane, Ubushinjacyaha bwakomeje gusobanura imiterere y’ibyaha bifitanye isano n’ibikorwa by’iterabwoba biregwa Rusesabagina Paul wahoze ayoboye Impuzamashyaka ya MRCD ndetse n’uburyo yabikoze.

Paul Rusesabagina wari Perezida wa MRCD aregwa muri dosiye imwe na Nsabimana Callixte wiyise Sankara na Nsengimana Herman bahoze ari abavugizi b’Umutwe w’Iterabwoba wa FLN n’abandi barwanyi 18.

Uru rubanza ruburanishwa n’Urugereko rwihariye rw’Urukiko Rukuru ruburanisha Ibyaha Mpuzamahanga n’Ibyambukiranya Imipaka.

Mu iburanisha ry’uyu munsi, Ubushinjacyaha bwakomeje kugaragaza ibyaha Rusesabagina aregwa n’ibimenyetso bushingiraho mu kwerekana ko ari we wakoze ibyo byaha.

Rusesabagina w’imyaka 66 aregwa ibyaha icyenda, ariko Ubushinjacyaha bumaze gusobanura bitandatu birimo Kurema umutwe w’ingabo utemewe, Kuba mu mutwe w’iterabwoba, Gutera inkunga iterabwoba, Ubwicanyi nk’igikorwa cy’iterabwoba, Itwarwa ry’umuntu ritemewe n’amategeko nk’igikorwa cy’iterabwoba no Kwiba hakoreshejwe intwaro nk’igikorwa cy’iterabwoba.

Ubushinjacyaha bwerekanye ko ibitero byagabwe n’abarwanyi ba FLN byaguyemo abaturage b’inzirakarengane, byangiza imitungo yabo, indi iribwa. Bwavuze ko nubwo Rusesabagina atari aho byabereye ariko yagize uruhare rukomeye nk’umuyobozi wa MRCD/FLN.

Rusesabagina Paul ari kuburanishwa atari mu rukiko bitewe n’uko yikuye mu rubanza avuga ko atizeye ko azahabwa ubutabera.

UKO IBURANISHA RYAGENZE:

14:55: Iburanisha ry’uyu munsi rirasojwe. Urubanza ruzakomeza ku wa 21-22 Mata 2021 hasobanurwa ibindi byaha biregwa Rusesabagina n’uko yabikoze. Ubushinjacyaha bumaze kumurega ku byaha bitandatu mu icyenda akurikiranyweho.

14:50: Umushinjacyaha Ruberwa Bonaventure yasobanuye ko abaturage batwawe nta biganiro byigeze bibaho hagati y’ababatwaye na Leta y’u Rwanda ndetse bidakwiye no kwitiranwa no gushimuta kuko ari igikorwa cy’iterabwoba.

14:44: Umushinjacyaha Habimana Jean Cabin yatanze ingero zitandukanye z’abatanze ubuhamya bagaragaza uko abarwanyi ba FLN babasahuye, uko batwitse imodoka ya Gitifu wa Nyabimata, moto ndetse bakanica abantu.

Ati “Ngibyo ibimenyetso dushingiraho mu kugaragaza icyaha gishinjwa Rusesabagina Paul.’’

14:34: Umushinjacyaha Habimana Jean Cabin yavuze ko abaturage ba Nyabimata bibwe ibirimo telefoni, amatungo magufi, ibiribwa n’ibindi.

Yasobanuye ko ibyo bikorwa byabereye mu baturage kandi hari ababikoze n’ababikorewe. Muri raporo yakozwe n’Umurenge wa Nyabimata, hasobanurwa uko abaturage bambuwe imitungo yabo.

Usibye iyo raporo hari n’ubuhamya bw’abagizweho ingaruka n’icyo gikorwa cy’ubujura.

Nsabimana Anastase yabwiye Ubugenzacyaha ko ku wa 1 Nyakanga 2018 hari abantu bitwaje intwaro kandi bambaye imyenda ya gisirikare bamusanze iwe, binjira mu nzu bamutegeka kubaha amafaranga, ibyo kurya na telefoni. Ibyo bintu yahise abyikorezwa, ajyanwa hamwe n’abandi bari bamaze gufatwa icyo gihe.

Mugisha Yves na we mu buhamya yatanze mu Bugenzacyaha yasobanuye ko yatwawe telefoni yo mu bwoko bwa iPhone, imyenda yari mu gikapu n’amadolari 500.

Umushinjacyaha Habimana Jean Cabin yasobanuye uruhare rwa Rusesabagina mu bikorwa byo kwiba abaturage
Habimana Jean Cabin ari mu bagize itsinda ry'abashinjacyaha muri uru rubanza

14:32: Umushinjacyaha Habimana Jean Cabin yakomeje gusobanura icyaha cya gatandatu cyo Kwiba hakoreshejwe intwaro nk’igikorwa cy’iterabwoba Rusesabagina aregwa.

14:30: Umushinjacyaha Habimana Jean Cabin yasubije ko abaturage batwawe bakoreshejwe inama, babwirwa ko nta bwoko bagenderaho, ko muri bo harimo Abahutu, Abatutsi n’Abatwa.

Ati “Icyo dushaka ni uguhindura Leta ya FPR. Mwe mube abahamya b’ibyo dushaka.’’

14:28: Umushinjacyaha Muhima Antoine yabajije Umushinjacyaha niba hari icyo abarwanyi ba FLN basabye Leta y’u Rwanda kugira ngo abaturage batwawe barekurwe.

14:23: Undi mutangabuhamya ku bikorwa by’abafashwe bugwate ni Semushi David. Yabwiye Ubugenzacyaha ko ku wa 15 Ukuboza 2018 ko ubwo yavaga i Nyamasheke yerekeza muri Kigali yafatanywe n’abandi bari kumwe mu modoka ya Omega. Abarwanyi babanje kubambura ibyo bafite, batoranyamo abagabo bajyana na bo.

Umushinjacyaha Habimana Jean Cabin yasobanuye ko Paul Rusesabagina ari we uri inyuma y’ibikorwa byo gutwara abantu kuko ari we wayoboraga MRCD/FLN kandi agatera inkunga uyu mutwe.

14:12: Mu bihe bitandukanye mu 2018, abantu batwawe mu buryo butemewe n’amategeko muri Nyabimata na Kitabi.

Umushinjacyaha Habimana Jean Cabin yasobanuye ko Rusesabagina agomba kuryozwa iki cyaha nk’uwari umuterankunga mukuru wa FLN.

Yavuze ko ikimenyetso cya mbere ari raporo yakozwe na Gitifu w’Umurenge wa Nyabimata, Nsengiyumva Vincent igaragaza ibitero bitandukanye byawugabwemo.

Mu byo igarukaho harimo amazina y’abatwawe n’abagizi ba nabi, baniba amatungo.

Mu batwawe bakikorezwa ibintu byasahuwe harimo Shumbusho Damascène, Ntakirutimana Sylvain, Nsengimana Anastase, Ngendahimana David, Siborurema Venuste na Habyarimana Jean Marie Vianney.

Abo barwanyi ibyo basahuye babyikoreje abari bafashwe bugwate ariko nyuma baje kubarekura.

14:07: Umushinjacyaha Habimana Jean Cabin yasobanuye ko hari ibikorwa by’iterabwoba FLN yakoreye ku butaka bw’u Rwanda by’umwihariko mu Turere twa Nyamagabe na Nyaruguru mu Majyepfo. Yavuze ko muri ibyo bikorwa habaye itwarwa ry’abantu mu buryo butemewe.

Ati “Icyo gikorwa kigomba kibangamiye umudendezo w’umuntu. Bivuze ko uwo muntu yatwawe atabishaka. Ni yo mpamvu tubyita ko ritemewe n’amategeko.’’

14:03: Umushinjacyaha Habimana Jean Cabin ni we ugiye gusobanura icyaha cya gatanu kiregwa Rusesabagina kijyanye n’Itwarwa ry’umuntu ritemewe n’amategeko nk’igikorwa cy’iterabwoba.

13:55: Umushinjacyaha Habyarimana Angelique yasabye urukiko ko rwazemeza ko icyaha cy’ubwicanyi nk’igikorwa cy’iterabwoba kimuhama ndetse akagihanirwa.

13:51: Mu yandi matangazo arimo iryasinyweho na Nsabimana Callixte ‘Sankara’ wari Umuvugizi wa FLN, hari aho yasabye abaturage kutegera mu ishyamba rya Nyungwe kuko ari mu gace k’imirwano.

Ku wa 30 Mata 2019, Rusesabagina Paul yahamagariye Abanyarwanda n’amahanga kwirinda kujya mu gace karimo imirwano. Ubushinjacyaha buvuga ko ibyo byiswe imirwano ari ibitero by’iterabwoba bigamije guhatira Leta y’u Rwanda gufata cyangwa kureka umurongo runaka cyangwa ikagendera ku mahame runaka.

13:47: Umushinjacyaha Mukuru wungirije Habyarimana Angelique yavuze ko ibitero byagabwe na FLN byari mu mugambi wayo wo guhatira Leta y’u Rwanda gufata umurongo ishaka.

Yavuze ko Rusesabagina yagize ubushake bwo gukora icyaha binajyanye n’amatangazo yasohowe na MRCD/FLN kandi agakurikira ibyo bitero.

Ku wa 15 Nyakanga 2018, hasohowe inyandiko yagenewe itangazamakuru igaragaza ko umutwe wa FLN ugamije guhindura ubutegetsi mu Rwanda hakoreshejwe uburyo bwose. MRCD/FLN yo yahisemo gukoresha iterabwoba ari naryo ryavuyemo icyaha cy’ubwicanyi.

13:38: Umushinjacyaha Dushimimana Claudine yasobanuye ko kuba Rusesabagina yari umuyobozi wa MRCD/FLN bihagije ngo akurikiranweho icyaha cy’ubwicanyi nk’igikorwa cy’iterabwoba.

Umushinjacyaha Mukuru wungirije Habyarimana Angelique n'Umushinjacyaha Dushimimana Claudine imbere y'abacamanza basobanura icyaha cy'ubwicanyi nk'igikorwa cy'iterabwoba kiri mu byo Rusesabagina akurikiranyweho

13:28: Umushinjacyaha Dushimimana Claudine yavuze ko hakurikiranywe ubwicanyi nk’icyaha gisanzwe, Rusesabagina yakurikiranwa nk’icyitso ariko mu gihe ari igikorwa cy’iterabwoba, agomba gukurikiranwaho icyaha cy’iterabwoba nk’uwabigizemo uruhare rukomeye.

13:18: Umushinjacyaha Dushimimana Claudine yavuze ko ubwicanyi nk’igikorwa cy’iterabwoba hari ababuregwa kandi barabukoze ndetse hari abari aho byabereye baranabikora.

Yavuze ko Rusesabagina we aregwa iki cyaha nubwo atageze Nyabimata cyangwa muri Nyungwe ahagabwe ibitero kuko ari we icyo yakoze ari igikorwa cyo guteza imbere, gufasha, kwigisha, kugambana, gutegura no gutanga ibikoreshwa hagamijwe gushyigikira bya bikorwa by’ubwicanyi.

13:10: Umushinjacyaha Dushimimana Claudine yavuze ko mu ngingo ya 2 y’itegeko ryo kurwanya iterabwoba isobanura ko ibikorwa by’iterabwoba biri mu byicico bibiri birimo igikorwa cyagambiriwe gishobora guhungabanya umutekano n’ibindi mu gihe ikindi kivuga ku gikorwa cyo guteza imbere, kuyobora, koshya, guha ubufasha, gutegura cyangwa gutanga ibikoreshwa mu iterabwoba.

13:08: Iburanisha rirasubukuwe. Ubushinjacyaha bugiye gukomeza busobanura imiterere y’icyaha cy’ubwicanyi nk’igikorwa cy’iterabwoba n’uburyo Rusesabagina Paul yagikoze. Iki cyaha ni icya kane mu icyenda biregwa uyu mugabo w’imyaka 66.

11:53: Iburanisha rirasubitswe. Umucamanza Muhima Antoine yasabye Ubushinjacyaha gusobanura neza ibyo Rusesabagina aryozwa ko yakoze mu bwicanyi ndetse n’amabwiriza nyayo yatanze arebana n’ibitero byagabwe. Biteganyijwe ko izi ngingo ari zo ziherwaho hatangwa ibisobanuro nyuma y’akaruhuko.

11:36: Ubushinjacyaha bwavuze ko hari ingero z’izindi manza zaciwe zerekana ko uyoboye ibikorwa by’iterabwoba kumukurikirana bidasaba ko we ubwe aba ari we wayoboye igikorwa cy’iterabwoba mu gihe icyaha cyakorwaga.

Bwavuze ko kuba yaratanze amabwiriza bihagije gusa kugira ngo uwo muyobozi abe yakurikiranwa.

Bwanagaragaje ko inyandiko zitandukanye zivuga ko ibikorwa by’iterabwoba bidakwiriye guhanwa gusa ababikoze gusa ahubwo n’ababiyoboye, ababiteguye n’abandi bagira uruhare ngo ibyo bikorwa by’iterabwoba bibashe gushoboka.

11:21: Ubwo yabazwaga n’Ubugenzacyaha, Paul Rusesabagina yavuze ko ari mu batanze amabwiriza mu bikorwa byavuyemo ibitero byagabwe mu Rwanda, ndetse agashimangira ko ibyakorwaga byanyuzwaga muri Collège des presidents yarimo Gen Irategeka Wilson wayoboraga CNRD Ubwiyunge, Nsabimana Callixte ‘Sankara’ wa RRM, na we wayoboraga PDR Ihumure, amashyaka yose yihurije hamwe agakora MRCD.

Mu Bugenzacyaha yemeye ibikorwa MRCD yakoze anabisabira imbabazi avuga ko we atageze kuri terrain muri Nyamagabe na Rusizi.

Ubushinjacyaha buvuga ko yemera ibikorwa abarwanyi ba FLN bakoze ndetse akabisabira imbabazi.

Ati "Sinigeze mbatuma kubikora, asa n’ushaka kugaragariza ubushinjacyaha ko adakwiye kubibazwa. Iyi mvugo tubona itamukuraho uburyozwacyaha ku bwicanyi bwakozwe na MRCD/FLN nk’igikorwa cy’iterabwoba. Iyi mvugo y’uko atabibatumye cyangwa abisabira imbabazi, turasanga mu gihe urukiko ruzasanga icyaha kimuhama, yagihanirwa.’’

11:18: Ubushinjacyaha kandi bwavuze ko MRCD/FLN yanigambye ibikorwa by’ubwicanyi bwakorewe muri Nyabimata.

Mu kiganiro yagiranye n’umunyamakuru icyo gihe yagize ati “Ni byo koko Nyabimata twagiyeyo, twaraharashe.’’

11:15: Nyuma yo kwerekana amashusho yumvikanamo Nsabimana Callixte ‘Sankara’ wari Umuvugizi wa FLN yigamba ibitero byagabwe muri Nyungwe, Ubushinjacyaha bwasobanuye ko ibitero byagabwe muri Nyungwe byakozwe hagamijwe guhatira Leta gukora ibiri mu bushake bwabo.

Buti “Kwica abantu muri ibi bitero ni ukugaragaza ko bahari nk’abarwanyi, ko hari icyo bifuza gukoresha ubutegetsi buriho no gukora ibikorwa by’ubwicanyi bagamije gushyiraho ka gahato.’’

11:06: Ubushinjacyaha bwasobanuye ko ibi bitero bikimara kugabwa, uwari Umuvugizi wa FLN, Nsabimana Callixte ‘Sankara’ yagiye abyigamba ko ari we wabikoze.

Ku wa 14 Kanama 2018, Sankara yatangarije umunyamakuru wa Radio Ubumwe witwa Mukashema Esperance wamubazaga niba ari bo bakoze ibyo bikorwa. Icyo gihe yamusubije ati “I Nyabimata twagiyeyo, twarabarashe.’’

Sankara kandi mu kindi kiganiro yavuze ko inyeshyamba za FLN zafashe Nyungwe ndetse abuza abaturage kutagenda muri ako gace yise ’ak’imirwano.’

11:01: Undi mutangabuhamya wemeza ubwicanyi bwakozwe nk’igikorwa cy’iterabwoba ni Uwimana Sabin na we ari mu modoka yavaga i Rusizi igafatirwa ku Kitabi.

Ubwo yari imbere y’Ubugenzacyaha, Uwimana yavuze ko muri icyo gitero cyagabwe muri Nyamagabe, yavuze ko abarwanyi ba MRCD/FLN, barashe ku modoka barimo bamwe bahita bicwa abandi barakomereka.

10:57: Ngirababyeyi Désiré wari umushoferi w’imodoka ya Alpha yatanze ubuhamya bw’uburyo bahagaritswe muri Nyungwe bageze Nyamagabe.

Yasobanuye ko bateweho grenade ndetse hanaraswa amasasu yafashe Mutesi Jacqueline Diane mu mutwe ahita yitaba Imana.

10:50: Umushinjacyaha Habyarimana Angelique yavuze mu guhitamo abaraswa hatoranywaga abahagarariye abayobozi muri ako gace [Nyabimata].

Havugimana Jean Marie Vianney wifashishijwe mu kwerekana aho bamwe batuye na we yaterwaga ubwoba abwirwa ko na we agomba kumviraho.

Ati “Raporo yakozwe n’inzego z’ibanze yerekana ko muri iryo joro hateye abarwanyi bari hagati ya 50 na 80. Ibyo bitero byaguyemo abantu babiri.’’

Ibyo bitero byahereye muri Nyabimata ariko no mu Karere ka Nyamagabe, abarwanyi ba FLN na ho hagabwe ibitero bagamije kugira abo bambura ubuzima.

10:48: Ubushinjacyaha bwifashishije ubuhamya bw’abantu batandukanye. Bwavuze ko Habarurema Joseph yafashwe agasabwa kwerekana aho Gitifu wa Nyabimata atuye. Nyuma yo kubasubiza ko atahazi, bahise bamurasa arapfa.

Buti “Ibi tubabwiye ni ibyo abatangabuhamya biboneye ubwabo muri kiriya gihe. Umugambi wo gushyira mu bikorwa inshingano aba barwanyi bari bahawe n’abayobozi ba MRCD/FLN harimo gutanga ubutumwa bwerekana abagomba kwibasirwa bwa mbere.’’

10:38: Mu nyandiko mvugo ye ubwo yabazwaga n’Ubugenzacyaha, Munyaneza waguye mu bitero bya FLN yasobanuye uko igitero cyabaye ku wa 19 Kamena 2018 mu Murenge wa Nyabimata mu Karere ka Nyaruguru cyagenze. Yavuze ko yahamagawe n’umuturanyi we witwa Habimana amubwira ko hari imodoka ziri gushya n’inzu ziri gutwikwa.

Ubwo bavuganaga yahamagawe na Gitifu wa Nyabimata, agiye ku ruhande ngo yumve icyo amubwira, yahise abona abambaye igisirikare, bamusaba telefoni, bamubwira kugenda.

Agishingura ikirenge aho, yarashwe amasasu abiri mu kuguru kw’ibumoso no mu kuboko kw’ibumoso. Akimara kugwa hasi, abo basirikare bamukubise imigeri ahantu hose bakeka ko yapfuye.

Munyaneza Fidèle wari Perezida wa Njyanama y’Umurenge wa Nyabimata yaje kujyanwa mu bitaro ariko aza kubigwamo kubera ibikomere yari yagize.

-  Amazina ya bamwe mu baguye mu bitero bya FLN

Ubushinjacyaha bwagaragaje ko mu baguye mu bitero bya FLN barimo Mutesi Jacqueline Diane witeguraga gushyingirwa, Atete Ornella w’imyaka 13, Mukabahizi Hilarie, Nteziryayo Samuel, Niyubuhungiro Jeannine, Niyonshuti Isaac, Maniraho Anathole, Habimana Joseph na Munyaneza Fidèle.

10:31: Umushinjacyaha Mukuru wungirije Habyarimana yavuze ko ibikorwa by’ubwicanyi byakozwe na FLN byakorewe mu Murenge wa Nyabimata mu Karere ka Nyaruguru ndetse no mu Murenge wa Kitabi mu Karere ka Nyamagabe.

Ibi bitero byagabwe n’abarwanyi ba FLN mu bihe bitandukanye byaguyemo abantu icyenda bishwe kandi byagambiriwe.

10:24: Umushinjacyaha Mukuru wungirije Habyarimana Angelique ni we ugiye gusobanura imiterere y’icyaha cya kane, Rusesabagina Paul aregwa cy’Ubwicanyi nk’igikorwa cy’iterabwoba.

  • Ibyaha biregwa Rusesabagina Paul

- Kurema umutwe w’ingabo utemewe

- Kuba mu mutwe w’iterabwoba.

- Gutera inkunga iterabwoba.

- Ubwicanyi nk’igikorwa cy’iterabwoba.

- Itwarwa ry’umuntu ritemewe n’amategeko nk’igikorwa cy’iterabwoba.

- Kwiba hakoreshejwe intwaro nk’igikorwa cy’iterabwoba.

- Gutwikira undi ku bushake, inyubako, ibigenewe gutwara abantu cyangwa ibintu nk’igikorwa cy’iterabwoba.

- Ubwinjiracyaha bw’ubwicanyi nk’igikorwa cy’iterabwoba.

- Gukubita no gukomeretsa ku bushake nk’igikorwa cy’iterabwoba.

10:17: Umushinjacyaha Dushimimana Claudine yifashishije inyandiko za Loni yavuze ko zerekana ko mu gukora iterabwoba hashyirwa imbaraga mu bikorwa birimo kugura intwaro, uburyo bwo gukora ingendo n’ibindi.

Ati “Uwateye inkunga iterabwoba afite uruhare mu gufasha uwagiye kuri terrain kubasha kugira ibyo akora. Uburyo ibyaha byo kurema no kuba mu mutwe w’iterabwoba ni ibikorwa bitandukanye no gutera inkunga iterabwoba. Mu gihe umuntu yakoze ibikorwa byombi, dusanga ari ibyaha bitandukanye kandi bikwiye kuryozwa uwabikoze.’’

10:10: Umushinjacyaha Dushimimana Claudine yasobanuye ko ibikorwa Rusesabagina yakoze, itegeko ryabisobanuye nko gutera inkunga iterabwoba.

Ati “Abantu bose bari muri MRCD/FLN ntabwo bateye inkunga ibikorwa by’iterabwoba.’’

10:08: Umucamanza Muhima Antoine yabajije abashinjacyaha niba Rusesabagina warezwe gushinga MRCD/FLN yakongera no gushinjwa kuwutera inkunga.

-  AMAFARANGA AZWI RUSESABAGINA YATANZE MU GUSHYIGIKIRA ITERABWOBA

10:01: Ubushinjacyaha bwavuze ko mu gutera inkunga ibikorwa by’iterabwoba, Rusesabagina yatanze ibihumbi 20 by’amadolari, yoherereje Nsabimana Callixte ‘Sankara’ amayero 1000 abinyujije ku mugore we Mukangamije Thacienne ndetse yanatanze amafaranga yo kugura telefoni zo kwifashisha mu guhana amakuru.

Ubushinjacyaha buvuga ko “Hari iperereza rikomeje gukorwa mu Bubiligi kandi nihaboneka ibindi bimenyetso bizashyikirizwa urukiko.’’

Bwagaragaje ko hari ubundi buryo Rusesabagina yavuze ko abaperezida bakusanyaga amafaranga agahabwa abacungamutungo, agashyirwa mu bikorwa bitandukanye.

Ubushinjacyaha kandi bwavuze ko muri PDR Ihumure na ho hakusanyirizwagamo imisanzu nk’uko byakorwaga mu yandi mashyaka.

Ahandi havaga inkunga ni muri MRCD aho binyuze muri groupe “Abadasigana ba MRCD’’ Rusesabagina yari akuriye aba-cadres b’uwo mutwe kandi mu biganiro bitandukanye byasanzwe muri telefoni ze harimo n’ibyerekana ko yemeraga gushaka inkunga ishyigikira FLN.

Ubushinjacyaha buvuga ko ubwo ari uburyo bwose bwerekana uruhare rwa Rusesabagina mu gutera inkunga iterabwoba.

09:51: Ubushinjacyaha bwavuze ko itangazo ryo ku wa 30 Mata 2019, ryerekana ko Paul Rusesabagina yari azi neza icyo inkunga ye muri MRCD/FLN yabaga igiye gukora.

Muri iryo tangazo avuga ko FLN ikomeje imirwano ndetse ko ifatwa rya Nsabimana Callixte ‘Sankara’ [wari umaze gufatwa] ritabaciye intege ko ahubwo ingabo za FLN zihagurukanye ikibatsi.

Iri tangazo ryagiye hanze nyuma y’ibitero bitandukanye byagabwe mu bice bitandukanye by’igihugu, bikibasira abasivili.

Buti “Ikibatsi ingabo za FLN zahagurukanye ni cyo cyavuyemo ibindi bikorwa. Ibi ntibigaragaza ko Rusesabagina Paul yatangaga amafaranga gusa ntamenye icyo yakoreshejwe.’’

09:43: Ubushinjacyaha bwagaragaje ko mu byavuye mu isaka Polisi y’u Bubiligi yakoreye mu rugo rwa Rusesabagina Paul, muri telefoni ye hasanzwemo ibyo yaganiriye na Twagiramungu Faustin.

Kimwe muri byo ni icyo mu 2018 aho avuga ko “Abahungu banjye bari mu muriro. Ubu sindi hafi, ndi kwiruka hirya no hino nshakira abahungu banjye uko icyo kibazo cyakemuka no kubashakira uko babona ibikoresho ariko ubu simpari.’’

Ubushinjacyaha buvuga ko inkunga Rusesabagina yateye FLN yabaga azi neza icyo izakora.

09:36: Ubushinjacyaha bwerekana ko mu mashusho ya Rusesabagina yizeza ubufasha bwe ndetse akanahamagarira abandi bantu bose gutera inkunga ibikorwa bya FLN.

Buvuga ko nyuma yo kumenya ibyakozwa za Nyabimata, abantu bakicwa we akomeza kwizeza gushyigikira ibyo bikorwa by’iterabwoba.

Buti “Iki ni ikimenyetso kimwe kigaragaza ko Rusesabagina nk’uwari uyoboye umutwe wa MRCD/FLN yari azi ibizakorwa. Iyo yahabwaga raporo, bagakusanya amafaranga, yabaga azi neza ibyo azakoreshwa. Ni ibintu yari azi neza kandi na nyuma y’aho yakomeje kwemera ko azakomeza gushyigikira iterabwoba.’’

Umushinjacyaha Dushimimana Claudine asobanurira urukiko imiterere y'icyaha cyo gutera inkunga ibikorwa by'iterabwoba Rusesabagina aregwa
Paul Rusesabagina yagiye yumvikana yigamba ibikorwa by'iterabwoba byagabwe n'abarwanyi ba FLN ku butaka bw'u Rwanda

09:31: Ubushinjacyaha bwavuze ko atari bwo bwafashe video ariko bugasaba urukiko ko mu gihe bizaba ngombwa ko hashyirwaho umuhanga wo kugenzura umwimerere w’ayo mashusho ‘nta kibazo bubifiteho.’

Bwongeyeho ko ari amagambo ya Rusesabagina kandi mu ibazwa rye ntiyigeze ahakana ko ari aye.

Mu magambo ye avuga ko FLN yatangije urugamba rwo kubohora igihugu.

Ubushinjacyaha buvuga ko ibyo bikorwa byahawe amazina meza ariko ari iby’iterabwoba kuko byanibasiye abaturage b’inzirakarengane.

09:25: Umushinjacyaha Dushimimana Claudine yagarutse ku mashusho yanyujijwe kuri YouTube yerekana Rusesabagina yemera uruhare rwe mu gushoza intamba ku Rwanda bigizwemo uruhare na FLN.

Iyi video iri kuri YouTube ifite umutwe ugira uti “Rusesabagina claims deadly attacks on Rwandan territory”.

Mu magambo ye, Rusesabagina yavuze ko mu 2018 ingabo za FLN hatangijwe urugamba rwo kubohora igihugu kandi ko mu 2019 ibyo bikorwa bigomba kwihutishwa mu guhagarika ibikorwa na FPR.

Ati “Uburyo bwose bwa politiki bwarakoreshejwe ariko nta cyagezweho. Ndahamagarira cyane urubyiruko rwa FLN ko rukwiye kugaba ibitero ngo rubohoze Abanyarwanda kandi bagomba kumva ko ubu ari bwo buryo bwonyine busigaye.’’

Dushimimana yasabye urukiko kuzashingira kuri iki kimenyetso rukagiha agaciro nyuma yo kugisuzuma.

AMAZINA YAHIMBWAGA ABARWANYI, UBUSHINJACYAHA BUYASHINGIRAHO NK’INDI GIHAMYA KO RUSESABAGINA YATEYE INKUNGA ITERABWOBA

09:15: Umushinjacyaha Dushimimana Claudine yavuze ko mu ibazwa rye, Rusesabagina Paul yemeye ko bakoreshaga amazina atandukanye mu biganiro byabo aho abarwanyi bitwaga abahinzi, imbunda [amasuka], imbuto [amasasu] mu gihe Champs de bataille yitwaga umurima.

Dushimimana yavuze ko ‘umuntu umenya imvugo zikoreshwa imbere kandi zitamenywa na buri wese ari igihamya ko yateye inkunga iterabwoba.’

Yakomeje ati “Ntabwo yagarukiraga ku mwanya wa Présidence kuko n’abari kuri terrain baraganiraga bakamubwira ibyo bakeneye bigomba guhabwa inkunga. Mu gukora ibikorwa byose, Rusesabagina yari azi ko bizakoreshwa mu bikorwa by’iterabwoba.’’

09:05: Umushinjacyaha Dushimimana Claudine yagaragaje ko mu butumwa Munyemana Eric wari Umucungamutungo yandikiye abari bahuriye muri groupe ya WhatsApp yitwa “Abadasigana ba MRCD’’ barimo na Rusesabagina ababwira ko mu isanduku nta kintu kirimo kandi abahinzi [abarwanyi] bakeneye gufashwa byihutirwa.

Icyo gihe Munyemana yavuze ko muri uwo mwaka [kugera muri Nzeri] hari hamaze koherezwa ibihumbi 150 by’amayero. Yasabye ko hashakwa ibihumbi 500 by’amayero yihutirwa.

Rusesabagina Paul ubwo yabazwaga umubare w’amafaranga yahawe MRCD/FLN yavuze ko atamenya neza umubare ariko ko agera mu bihumbi 300 by’amayero.

Umushinjacyaha Dushimimana Claudine

08:55: Ubushinjacyaha bwavuze ko mu bimenyetso byerekana ko Rusesabagina yateye inkunga iterabwoba harimo n’ikiganiro cyo ku wa 29 Mutarama 2019, yagiranye na Gen Hakizimana Antoine uzwi nka Geva wari Umuyobozi wa FLN.

Muri icyo kiganiro, Gen Hakizimana yabwiye Rusesabagina ko ibirindiro byabo byatewe n’ingabo za FARDC, ariko bicamo bamwe.

Mu byo yamubwiye harimo ko kugaburira abarwanyi barenga 1000 bitoroshye kuko bavuye mu byo bahinze bitewe n’uko bisaba guhaha gusa. Yamubwiye ko bashaka uko bakwegera ‘iwacu’ mu Rwanda

Rusesabagina yamusubije ko “Waramutse neza, wakoze kuri raporo irambuye, natwe ku ruhande rwacu turacyakubita inzu ibipfunsi. Ndizera ko mu minsi itari myinshi tuzaba hari icyo twagezeho.’’

Buvuga ko ari igihamya ko Rusesabagina yari azi neza uko amafaranga yoherezwa muri FLN yakoreshwaga bitandukanye n’ibyo yavuze ko atazi uko amafaranga yakoreshwaga.

Ubushinjacyaha bwasobanuye ko Rusesabagina yemeye ko iyo telefoni yari iye ndetse ariyo yakoreshaga mu Bubiligi. Ni nayo yakoreshaga muri groupe ya WhatsApp aho izina yakoreshaga ari “Pas Besoin.’’

  • Rusesabagina ari kuburanishwa atari mu rukiko

Ubushinjacyaha bwatangiye gusobanura ibyaha byose Rusesabagina Paul ashinjwa. Uyu mugabo w’imyaka 66 ari kuburana atari mu rukiko kuko yikuye mu rubanza avuga ko ‘nta butabera’ yizeye kubona.

08:44: Umushinjacyaha Dushimimana Claudine yatangiye asobanura ko mu mikorere ya MRCD, urwego rw’umucungamutungo rwabaga rufite imikoranire ya hafi n’abayobozi bakuru b’iyi mpuzamashyaka ku buryo ibyakorwaga byabaga bizwi.

08:40: Inteko iburanisha yageze mu byicaro byayo. Urubanza rugiye gutangira Ubushinjacyaha busobanura ibyaha biregwa Paul Rusesabagina.

Nsabimana Callixte 'Sankara' yahoze ari Umuvugizi wa FLN akana na Visi Perezida wa Kabiri wa MRCD
Bamwe mu baregwa baganira n'umunyamategeko wabo

Urutonde rw’abaregwa muri uru rubanza

1. Nsabimana Callixte alias Sankara

2. Nsengimana Herman

3. Rusesabagina Paul

4. Nizeyimana Marc

5. Bizimana Cassien, alias BIZIMANA Patience, alias Passy, alias Selemani

6. Matakamba Jean Berchmans

7. Shabani Emmanuel

8. Ntibiramira Innocent

9. Byukusenge Jean Claude

10. Nikuze Simeon

11. Ntabanganyimana Joseph alias Combe Barume Matata

12. Nsanzubukire Félicien alias Irakiza Fred

13. Munyaneza Anastase alias Job Kuramba

14. Iyamuremye Emmanuel alias Engambe Iyamusumba

15. Niyirora Marcel alias BAMA Nicholas

16. Nshimiyimana Emmanuel

17. Kwitonda André

18. Hakizimana Théogène

19. Ndagijimana Jean Chrétien

20. Mukandutiye Angelina

21. Nsabimana Jean Damascène alias Motard

KANDA HANO UREBE ANDI MAFOTO MENSHI

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .