Leta y’u Rwanda igiye gushora miliyoni $ 150 mu korohereza abashaka gutunga inzu bwa mbere

Yanditswe na Twarabanye Venuste
Kuya 21 Ugushyingo 2019 saa 08:28
Yasuwe :
0 0

Banki y’u Rwanda itsura Amajyambere (BRD plc) yatangaje ko ku bufatanye bwa Banki y’Isi na Guverinoma y’u Rwanda hagiye gushorwa miliyoni $ 150 mu kubaka amacumbi aciriritse agera ku 400,000 azahabwa abashaka gutunga inzu ariko nta zindi bafite, bakazihabwa ku nguzanyo izishyurwa mu myaka igera kuri 20.

Ni umushinga uzakurikiranwa na BRD izaguriza amabanki ku nyungu ya 6% hanyuma yubake, uzajya gufata inguzanyo y’inzu akazajya yishyura ku nyungu itarenze 11% kandi yishyure mu myaka 20.

Ntabwo ugurizwa azahabwa amafaranga mu ntoki. Azagirana amasezerano na Banki akorana na yo ubundi ahabwe inzu ye bagirane amasezerano y’inguzanyo nk’uko bisanzwe ku muntu ugiye gufata inguzanyo muri Banki.

Ikidasanzwe ni uko uzahabwa iyo nguzanyo aribwo bwa mbere azaba agiye gutunga inzu kuko bizajya bigenzurwa. Ikindi agomba kuba ari umunyarwanda kandi afite umushahara utarengeje 700,000 Frw, nubwo BRD yirinze gutangaza umushahara muto amabanki azajya aheraho.

Inguzanyo y’inzu iciriritse izajya ifatwa kuri miliyoni 10 Frw ariko itarengeje miliyoni 35 Frw yishyurwe mu myaka igera kuri 20.

BRD itangaza ko umubare w’abazaba batuye mu mijyi uzava kuri 18% babaruwe mu 2017 ugere kuri 35% ari nayo mpamvu hari gushyirwa imbaraga mu myubakire ijyanye n’igihe.

Umuyobozi wa BRD, Eric Rutabana, yavuze ko umushinga watangiye ndetse abashaka izo nguzanyo bashobora gutangira kwegera amabanki bakorana na yo.

Ati “Twatangiye mu kwezi kwa karindwi, ndumva aribwo twabonye amafaranga ya mbere avuye muri Banki y’Isi, turayafite abashaka kuguza ubu bashobora gutangira kuguza banyuze mu mabanki, amabanki yose turateganya gukorana na yo. Ayo tumaze gusinyana na yo ni atatu [Banki ya Kigali, Zigama CSS, Bank of Africa]."

Hari imishinga 17 yo kubaka inzu zicirirtse izasiga izigera ku 12,000. Irimo uwa Rugarana uzubaka inzu zirimo iy’icyumba kimwe na saloon izatangwa kuri miliyoni 12 Frw n’iby’ibyumba bibiri na saloon kuri Miliyoni 18 Frw.

Mu Mujyi wa Kigali hamaze kuboneka ahantu 10 hazubakwa amacumbi.

Umuyobozi w’Ikigo cy’Imiturire, Serubibi Eric, yavuze ko uhereye kuri izi nzu zizatangwamo inguzanyo n’izindi zizubakwa, bigenzurwa ko zujuje ibyangombwa by’amacumbi aciriritse birimo kuba ari ku buso butarenze metero kare 93.

Mu kugabanya ibiciro byazo, yatangaje ko binyuze muri Minisiteri y’Ibikorwa Remezo Guverinoma yegereza abashoramari ibikorwa remezo ahubakwa inzu zicirirtse kugira ngo igiciro kigabanyukeho agera kuri 35%.

Ati "Uruhare rwa Minisiteri y’ibikorwa remezo ahanini ni ukubegereza imihanda, amazi n’amashanyarazi. Byagaragaye ko iyo bibonetse igiciro cy’inzu kigabanyukaho 35% ni no mu rwego rwo gukurura abashoramari."

Uretse mu Mujyi wa Kigali, mu mijyi iwunganira nka Musanze harateganwa kubakwa inzu 240 naho i Rubavu zigera kuri 360. Hari ubutaka i Rwamagana, Nyanza na Nyagatare nabwo butegereje abashoramari.

Mu 2018/19 hubatswe amacumbi aciriritse agera kuri 54 aba make kuko kugeze ubu hari umubare w’abagera ku 700,000 bagaragaje ko bayakeneye. Biteganyijwe ko mu 2019/20 azagera ku 1,128 naho mu 2024 u Rwanda ruzaba nibura rufite 1,500.

BRD yatangaje ko mu gutanga iyo nguzanyo hazajya habaho imikoranire n abashinzwe imiturire kugira ngo bamenye niba uyishaka ari inzu ya mbere agiye gutunga
Umuyobozi wa BRD Eric Rutabana yatangaje ko kwishyura izi nguzanyo bizajya bikorwa mu buryo busanzwe
Serubibi yavuze ko aho ayo macumbi azubakwa leta izajya ihageza amazi amashanyarazi n imihanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza