Leta iracyafite ibirarane by’ingurane ku mitungo y’abaturage birimo n’ibyo mu 2012

Yanditswe na Iradukunda Serge
Kuya 2 Ugushyingo 2020 saa 09:22
Yasuwe :
0 0

Umuryango urwanya Ruswa n’Akarengane (Transparency International Rwanda) wagaragaje ko leta igifitiye imyenda abaturage ijyanye n’ingurane ku mitungo yabo irimo n’iyo mu 2012, ibintu ivuga ko binyuranye n’itegeko rirengera abimurwa mu byabo hagamijwe inyungu rusange.

Umuhuzabikorwa wa Transparency International mu Ntara y’Uburengerazuba n’iy’Amajyaruguru, Mukarukundo Odette, yavuze ko nubwo itegeko rigena ibijyanye n’ingurane risobanutse hakigaragara ikibazo cy’abaturage batinda kuzihabwa ku mitungo yabo.

Yatanze urugero rw’abaturage bo mu Turere twa Burera na Gicumbi bakishyuza ingurane zo mu 2012.

Ati “Ikibabaje siko bimeze ubu. Urugero, hari uduce two muri Burera na Gicumbi ahanyujijwe umuriro w’amashanyarazi mu 2012. Abo baturage kugeza n’uyu munsi baracyakurikirana ngo bishyurwe, bagiye basezeranywa ko bazashyirwa mu ngengo y’imari y’umwaka utaha none imyaka umunani irashize.”

Asubiza kuri iki kibazo Umunyamabanga uhoraho muri Minisiteri y’Ubutegetsi bw’Igihugu, Dusengiyumva Samuel, yabwiye The NewTimes ko ikibazo cy’abaturage batinda guhabwa ingurane gihari ariko giterwa n’impamvu zitandukanye.

Yavuze ko hari imishinga yo kwimura abantu yagiye itangira itubahirije inzira ziteganywa n’amategeko, ikaba intandaro y’imanza z’ingurane zikiri mu nkiko no mu biro by’umuvunyi mukuru.

Dusengiyumva yakomeje avuga ko hashyizweho ingamba zigamije gukemura iki kibazo cy’abaturage batinda guhabwa ingurane.

Ati “Haracyari kandi imbogamizi iyo bije ku gutegura ingengo z’imari. Itegeko rirasobanutse, rivuga ko nta murimo n’umwe ugomba gutangira gukorerwa ku butaka bw’umuntu, mbere y’uko yishyurwa amafaranga yose. Buri wese wakoze ikinyuranyije n’itegeko yakoze ikosa kuri ubu, twashyizeho ingamba zigamije gukemura ibyo.”

Zimwe ngo mu mpamvu zituma kugeza n’ubu hakiri abaturage leta ibereyemo ibirarane harimo kuba hari abagiye bimurwa ariko ntibabashe kugaragaza ibyangombwa byerekana ko ubutaka ari ubwabo, abandi ngo ntibagiye bahabwa ingurane kubera ko ubutaka bwabo bwari buri mu makimbirane y’imiryango.

Dusengiyumva avuga ko Leta yagiye ikora byinshi mu kwishyura ibi birarane, cyane cyane ibyari bifitwe n’inzego z’ibanze dore ko muri Mata byabarirwaga muri miliyari 2.7 Frw, ubu hakaba hasigayemo ibigera kuri miliyoni 200 Frw.

Ati “Kugeza muri Mata, twari dufite dosiye 5532 zifite agaciro ka miliyari 2.7 Frw nk’umwenda wari ufitwe n’uturere 27. Muri izi twamaze gukemura dosiye 4958. Dusigaranye ibirarane bifite agaciro ka miliyoni 200 Frw duteganya kwishyura mbere y’uko uyu mwaka urangira biramutse bikunze.”

Raporo yakozwe muri Gashyantare 2020 igakomatanyiriza hamwe ibibazo by’ingurane leta itararangiza kwishyura igaragaza ko iki gihe Leta y’u Rwanda yari ibereyemo abaturage miliyari 33 Frw z’ingurane ku mitungo yabo.

Muri aya mafaranga agera kuri miliyari 31 Frw (angana na 97% by’uyu mwenda wose) ni ayagombaga kwishyurwa n’inzego nkuru z’igihugu mu gihe agera kuri miliyari 2.7 Frw ( 3%) yo yagombaga kwishyurwa n’inzego z’ibanze.

Muri izi nzego za Leta, Akarere ka Nyarugenge kagombaga kwishyura agera kuri miliyari 3.8 Frw, Kicukiro ikishyura miliyari 1.1 Frw.

Mu tundi turere twari dufite imyenda tugomba kwishyura harimo Muhanga ifite miliyoni 407 Frw, Gicumbi (miliyoni 760 Frw), Gasabo (miliyoni 555 Frw), Burera (miliyoni 293 Frw), Gakenke (miliyoni 228 Frw), Ngororero (miliyoni 190 Frw) na Nyanza yagombaga kwishyura miliyoni 157 Frw.

Transparency International yagaragaje ko hari abaturage leta yagombaga guha ingurane zirimo n'izo mu 2012 itarishyura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .