Leta ikeneye abarimu 6000 bo kwigisha mu mashuri abanza n’ayisumbuye

Yanditswe na Evariste Nsengimana
Kuya 15 Mutarama 2020 saa 07:57
Yasuwe :
0 0

Ikigo cy’Igihugu cy’Uburezi (REB) cyatangaje ko kirimo gukora ibishoboka byose ngo kizibe icyuho cy’umubare muke w’abarimu aho mu mashuri abanza n’ayisumbuye gusa hakenewe abagera ku bihumbi bitandatu muri uyu mwaka w’amashuri wa 2020.

Imibare ya Minisiteri y’Uburezi igaragaza ko abarimu bigisha mu mashuri abanza bavuye kuri 43 558 mu 2016 bakagera kuri 44 544 mu 2018, ibigo by’amashuri bigishaho biva kuri 2 842 bigera kuri 2 909.

Mu mashuri yisumbuye bavuye kuri 28 785 bagera kuri 30 040, ibigo by’amashuri bigishaho biva ku 1 575 bigera ku 1 728 muri icyo gihe.

Gusa ngo uko imyaka ishira indi igataha niko umubare w’abana batangira amashuri ugenda urushaho kwiyongera ku muvuduko usumba uw’ubwiyongere bw’ibyumba by’amshuri.

Ubwo yashyikirizaga diplôme 3859 abayobozi b’ibigo byigisha amasomo y’inderabarezi (abayobozi ba TTC) z’abanyeshuri basoje amasomo mu mwaka w’amashuri wa 2019 kuri uyu wa 14 Mutarama, Umuyobozi wa REB, Dr. Ndayambaje Irénée, yavuze ko hakiri icyuho cy’abarimu bagera ku 6000.

Dr Ndayambaje ati “Uyu mwaka twari dukeneye abarimu bakabakaba hafi 6000 mu mashuri abanza n’ayisumbuye. Urumva ko ari abarimu benshi, niyo mpamvu rero hari abarimu bari ku isoko ariko hari n’aba bagomba kwinjira ku isoko barenga 380.”

REB ivuga ko izi diplôme zatangiye gukorwa ku wa 4 Mutarama 2020, zikorwa vuba bishoboka kugira ngo izibe icyo cyuho, igasaba abayobozi ba TTC kwihutira kuzigeza ku banyeshuri kugira ngo bazifashishe bashaka akazi.

Umuyobozi wa TTC Kabarore, Ngabonziza Joseph, yavuze ko abagana amashuri Nderabarezi bakiri hasi ariko ubukangurambaga bumaze igihe bukorwa hari impinduka burimo kugaragaza.

Ati “Ubu turi kubakira kandi turabona barimo kuza ari benshi ugereranyije na mbere.”

Yavuze ko kuba impamyabumenyi z’aba banyeshuri zihise zitangwa vuba bigiye kuba igisubizo ku bigo by’amashuri wasangaga bifite umubare muke w’abarezi.

Ibipimo biteganya ko umwarimu umwe mu cyumba kimwe cy’ishuri adakwiye kurenza abanyeshuri 46 kurikirana. Gusa REB igaragaza ko hari aho usanga barenga 60 mu cyumba bikabangamira uburyo abakurikirana bose.

Umuyobozi wa REB, Dr. Ndayambaje Irénée, yavuze ko hakiri icyuho cy’abarimu bagera ku 6000
Muri uyu muhango TTC Mururu yahembwe Flat TV kubera ko yahize izindi 116 zose ziri mu gihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza