00:00:00 IGIHE NETWORK KN KINYARWANDA EN ENGLISH FR FRANCAIS

Kwica abana b’imfubyi ku Gikongoro; kimwe mu bimenyetso by’umugambi wa Jenoside wo kumaraho Abatutsi

Yanditswe na Prudence Kwizera
Kuya 9 May 2022 saa 10:29
Yasuwe :

Ubwo hibukwaga ku nshuro ya 28 Jenoside yakorewe Abatutsi mu 1994 mu Kigo cyita ku bana b’imfubyi n’abatagira kivurira cya SOS Nyamagabe, hagaragajwe ibimenyetso byerekana ko Jenoside yateguwe ikanashyirwa mu bikorwa hagamijwe kumaraho Abatutsi.

Ubuhamya bwatanzwe bwagaragaje ko abo bana bishwe n’Interahamwe ku itariki ya 7 Gicurasi 1994 zihagejejwe n’uwari Umuyobozi w’icyo Kigo, Nyombayire Venuste.

Nyombayire ashinjwa kuba yaravanguye abana 11 b’Abatutsi barimo abari baturutse i Kigali bahungishijwe, abashyira ukwabo mu cyumba, arangije abaha Interahamwe zirabica.

Uwimbabazi Amina Marie Josée wahunganye abo bana abavana i Kigali abajyanye ku Gikongoro, yavuze ko byasabye gutanga amafaranga ku Nterahamwe zari kuri bariyeri kuri Nyabarongo kugira ngo babone uko batambuka.

Yakomeje avuga ko bageze muri SOS Gikongoro bakiriwe nabi n’umuyobozi w’icyo kigo abima ibiryo n’amazi.

Ati “Venuste Nyombayire ntabwo yigeze yishimira ko bahari kandi abashyira kure y’abandi bana muri iki kigo. Banze kubaha ibiryo n’amazi kugeza ubwo yatumiye Interahamwe kugira ngo zibice. ”

Abitabiriye igikorwa cyo kwibuka abo bana bavuze ko kwica abana b’imfubyi ari kimwe mu bimenyetso byerekana ko Jenoside yakorewe Abatutsi yari yarateguwe hagamijwe kumaraho Abatutsi bose.

Perezida w’Inama Njyanama y’Akarere ka Nyamagabe, Uwamahoro Clothilde, yavuze ko Jenoside yakorewe Abatutsi yateguwe ikanashyirwa mu bikorwa hagamijwe kurimbura Abatutsi.

Yasabye ababyeyi n’abarezi kujya babwira abana babo amateka y’ukuri kugira ngo bashobora guhangana n’abahakana bakanapfobya Jenoside.

Ati “Abana bigishwe ukuri, ubumwe, gukunda igihugu, ubworoherane no guharanira kwihesha agaciro tubategurire ejo heza habo heza.”

Abitabiriye igikorwa cyo kwibuka ku nshuro ya 28 Jenoside yakorewe Abatutsi muri SOS Nyamagabe basuye Urwibutso rwa Jenoside rwa Murambi ruruhukiyemo imibiri irenga 50.000.

Muri SOS Gikongoro habereye umuhango wo kwibuka ku nshuro ya 28 Jenoside yakorewe Abatutsi mu 1994
By'umwihariko hibutswe abana b'imfubyi 11 biciwe muri SOS Gikongoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .