00:00:00 IGIHE NETWORK KN KINYARWANDA EN ENGLISH FR FRANCAIS

Kwibohora28: Ibikorwaremezo 15 bikomeye by’asaga Miliyari 191 Frw byubakiwe Abanyarwanda mu 2021/22 (Amafoto)

Yasuwe :

Mu gihe hizihizwa ku nshuro ya 28 Isabukuru yo Kwibohora kw’Abanyarwanda, hirya no hino mu turere abaturage bishimira ibikorwaremezo bagejejweho by’umwihariko mu mwaka w’ingengo y’imari ya 2021/22.

Ibikorwa 15 byubatswe mu 2021/22 birimo imidugudu n’inzu byatujwemo abaturage byatwaye arenga Miliyari 61.2 Frw; ibitaro n’amavuriro by’asaga Miliyari 29.6 Frw; amashuri makuru y’ubumenyingiro y’asaga Miliyari 4.2 Frw; ibikorwa by’ubuhinzi n’ubworozi by’arenga Miliyari 11.9 Frw; ibiraro n’imihanda by’asaga Miliyari 72.7 Frw; ibikorwa by’amashanyarazi by’asaga Miliyari 4.3 Frw n’izindi nyubako z’arenga Miliyari 7.4 Frw. Byose hamwe byatwaye arenga miliyari 191.7 Frw.

Birimo Umudugudu w’Icyitegererezo wa Munini watwaye asaga Miliyari 15.7 Frw; indi midugudu yatujwemo abaturage mu turere twa Karongi, Rubavu na Nyaruguru y’asaga miliyari 6.7 Frw; amavuriro arimo ibitaro bya Muhanga byatwaye asaga Miliyari 5.7 Frw, ibigo nderabuzima muri Gicumbi, Karongi na Rulindo by’arenga Miliyari 2.5 Frw, amavuriro y’ibanze muri Gakenke, Rulindo na Nyabihu y’arenga Miliyoni 275 Frw.

Hari kandi ikigo kizobereye mu gukora ubushakashatsi mu byo kubaga umuntu hibandwa ku ndwara za kanseri zifata imyanya yo mu nda cy’arenga miliyari 21 Frw; Umudugudu wa Busanza watwaye arenga Miliyari 16.8 Frw watujwemo imiryango 840; umudugudu wa Shimwa Paul& Akayange w’i Nyagatare watwaye arenga miliyari 8.5 Frw; imidugudu 32 yubakiwe abarokotse Jenoside yakorewe Abatutsi mu turere twose y’asaga Miliyari 31 Frw; ibiraro by’amatungo n’amabagiro mu turere 15 by’arenga Miliyari 2.1 Frw.

Imishinga ine yo gusubiza mu buzima busanzwe abasirikare bavuye ku rugerero mu turere twa Musanze, Rusizi n’Umujyi wa Kigali y’arenga Miliyoni 651 Frw; ibikorwa byo guhangana n’ihindagurika ry’ikirere by’asaga Miliyari 1.6 Frw mu Karere ka Gicumbi; amashuri makuru abiri y’imyuga n’ubumenyingiro muri Gasabo na Rulindo y’arenga Miliyari 4.2 Frw.

Ibiraro bine mu turere twa Musanze, Bugesera, Muhanga na Nyanza bya Miliyari 21.4 Frw; imihanda ya kaburimo n’indi y’itaka hirya no hino mu gihugu ya kilometero 469.038 yatwaye asaga Miliyari 51.3 Frw.

Mu buhinzi n’ubworozi hatewe ibiti ku buso bwa hegitali 6.321 mu turere dutatu bitwara asaga miliyari 1 Frw; mu turere dutandatu habungwabunzwe inkengero z’imigezi ku buso bwa hegitali 1835 bitwara asaga Miliyari 1 Frw; haciwe amaterasi y’indinganire ku buso bwa hegitali zirenga 2,243 mu turere 13 bitwara asaga Miliyari 3.5 Frw.

Hegitali zirenga 4.188 zarwanyijweho isuri mu turere 16 haterwa ibiti by’imbuto n’ibivangwa n’imyaka, hacibwa imigende y’amazi n’ibindi bitwara arenga Miliyari 3.8 Frw. Mu turere dutatu haguzwe inka 63, ingurube 48 n’ibyo kurya byazo n’ubwishingizi bw’umwaka umwe bitwara arenga Miliyoni 262 Frw.

Hatanzwe inyongeramusaruro ku bahinzi zirimo ifumbire mvaruganda n’indi miti yica udukoko, ishwagara n’ibindi mu gihugu hose by’asaga miliyoni 60.4 Frw.

Mu bindi hasanwe ibikorwaremezo by’ishuri ry’abaforomo n’ababyaza rya Kabgayi bitwara arenga Miliyoni 220 Frw; gusana no kuvugurura umudugudu wa Mpazi mu Mujyi wa Kigali bitwara asaga Miliyali 1.4 Frw; kubaka parikingi ya Icasa mu Mujyi wa Kigali byatwaye asaga Miliyari 2.2 Frw; cashpower z’amashanyarazi zigera kuri 69.410 n’amapoto n’ibindi bikoresho bijyanye nabyo byahawe imiryango igera ku 69.410 n’amakoperative 17 mu turere umunani tw’igihugu bitwara asaga Miliyari 4.3 Frw.

Nyuma y’imayaka 28 u Rwanda rubohowe abaturage hirya no hino mu gihugu mu turere dutandukanye hatashywe ibikorwaremezo bitandukanye byubatswe na Leta ndetse n’ibindi byagiye byubakwa n’abafatanyabikorwa hagamijwe guteza imbere umuturage.

Ibitaro bya Munini mu Karere ka Nyaruguru byatashywe ku mugaragaro kuri uyu wa Mbere

Mu Burasirazuba

Mu burasirazuba hatashywe bimwe mu bikorwaremezo bikomeye byahinduye imibereho myiza y’abaturage birimo stade eshatu bubakiwe n’Umukuru w’Igihugu zirimo iya Bugesera, Ngoma na Nyagatare buri imwe ikaba yakira abantu 3500 bicaye neza, buri imwe kandi yuzuye itwaye Miliyoni 9 z’Amadorari.

Mu Karere ka Gatsibo hatashywe kandi umuyoboro w’amazi wa Minago utanga amazi ku baturage ibihumbi 27 batuye mu mirenge ine irimo Kabarore, Gitoki, Rugarama na Remera, wuzuye utwaye miliyari 1,9Frw ukaba ufite amavomo 72 afasha abaturage kuvoma amazi meza.

Muri aka Karere kandi hatashywe umuhanda wa kaburimbo wa kilometero 30 uhuza imirenge ya Kiramuruzi, Muhura na Gasange. Uyu Murenge wo wanagejejwemo amashanyarazi n’amazi bwa mbere.

Muri Kayonza hatashywe agakiriro ka Cyarubare n’inzu y’ababyeyi babyariramo iri ku kigo nderabuzima cya Rukara ndetse n’umuhanda wa kilometero eshatu wubatswe Kabarondo. Muri Rwamagana hubatswe ibigega byo munsi y’ubutaka bifata amazi bikayayungurura akongera agakoreshwa.

Muri Kirehe hubatswe ibirometero bine bya kaburimbo mu Mujyi wa Nyakarambi n’ isoko nyambukiranyamipaka rya Rusumo ryuzuye ritwaye miliyari 4 Frw.

Muri Ngoma hubatswe inzu ababyeyi babyariramo ya Gasetsa yatwaye miliyoni 150 Frw, hubatswe kandi imihanda ya kaburimbo ya kilometero 8,5 mu Mujyi wa Kibungo n’umuyoboro w’amazi wa kilometero 56 watangiye gutanga amazi ku baturage bo mu mirenge ya Karembo, Zaza na Mugesera ukaba waruzuye utwaye miliyari imwe na miliyoni 300 Frw.

Muri Nyagatare hubatswe isoko rya Mimuri, Ibiro by’Umurenge wa Rukomo ndetse hanongerewe amasoko y’inka menshi mu gufasha aborozi kugurishiriza hafi. Bugesera hujujwe inzu y’abikorera, isoko rya Mareba, ibitaro byimurwa bizwi nka (Isolation Mobile Hospital).

East Gate Hotel yatumye babona aho kwakirira abashyitsi inazamura Umujyi wa Ngoma

Mu Burengerazuba

Mu Karere ka Nyamasheke abajyanama b’ubuzima batashye inzu bubatse igeretse yuzuye itwaye miliyoni 518Frw. Iyi gorofa yitezweho gukemura ikibazo cy’ ibyumba by’ ubucuruzi muri aka gace ndetse n’ icy’ibiro ku bafatanyabikorwa batandukanye.

Umuyobozi w’Abajyanama b’ Ubuzima bibumbiye muri AKUBU (Akabando k’ Ubuzima) Nyirahabimana Philomène, yavuze ko bayubatse mu rwego rwo guhuza imbaraga kugira ngo bakore ikintu kimwe gifite inyungu rusange avuga ko kandi bahisemo kuyubaka muri iki gice cy’umujyi mu rwego rwo gukemura ikibazo cy’abafatanyabikorwa batandukanye badafite ibiro byo gukoreramo ariko ko n’abacuruzi babonye ahantu heza ho gukorera.

Abo mu Karere ka Rutsiro batashye umuhanda wa Kaburimbo w’ibilometero bine uva ahitwa mu Gisiza ukagera ku bitaro by’Akarere bya Murunda, bavuga ko wagabanyije ibyago byo gutakariza ubuzima mu nzira.

Mu Karere ka Karongi hatashywe uruganda rw’amazi rwa Nyabahanga n’umudugudu w’icyitegererezo wa Rugabano. Uru ruganda rwa Nyabahanga rutunganya metero cube 2000 ku munsi.

Rufite umuyoboro w’amazi w’ibilometero 13, wuzuye utwaye miliyari 1,3 Frw. Uyu muyoboro ugeza amazi ku baturage barenga ibihumbi 37 b’Umujyi wa Kibuye n’amahoteli yegereye ku kiyaga cya Kivu.

Abanyamahoteli n’abaturage bavuga ko amazi yiyongereye basigaye bayabona iminsi yose mu gihe mbere bayabonaga rimwe na rimwe kubera isaranganya.

Abatujwe mu mudugudu w’icyitegererezo wa Rugabano mu Murenge wa Rugabano mu Kagari ka Gitega bavuga ko aho bari batuye hari habi, rimwe na rimwe inkangu zikica abaturage ariko ngo ubu batuye batekanye.

Uyu mudugudu w’inzu umunani mu nzu imwe watujwemo imiryango 40 yimuwe ku misozi yateweho icyayi. Ni umudugudu mwiza urimo amazi, umuriro, n’ivuriro.

Mu karere ka Rubavu hatashywe ibikorwa bitandukanye byiganjemo ibiro by’utugari dutandukanye, amavuriro mato, ibyumba by’amashuri n’umudugudu wubakiwe abarokotse Jenoside yakorewe abatutsi mu 1994 batishoboye ndetse hakaba hanatashywe inkuta zubatswe zikumira imyuzure yaterwaga n’umugezi wa Sebeya.

Mu byo abaturage ba Ngororero bishimira uyu mwaka ni uko babashije kwishyura ubwisungane mu kwivuza ku kigero cya 91,28% hubatswe amavuriro mato 31 , abaturage batagiraga aho kuba bubakiwe inzu 160 abandi 130 basanirwa inzu, hubatswe kandi ubwiherero 211 hasanwa 299.

Abaturage mbere nta mazi meza bari bafite none ubu ngo bageze kuri 84% baha abaturage amazi meza kandi muri 2024 abaturage bazaba bafite amazi meza 100%.

Mu Karere ka Rusizi isabukuru yo kwibohora yizihirijwe mu Murenge wa Nzahaha ku rwego rw’akarere, hakaba hatashywe ibikorwa binyuranye birimo amashanyarazi yahawe abaturage, inzu zubakiwe abarokotse jenoside yakorewe Abatutsi ndetse n’ibiro by’Akagari ka Murya abaturage biyubakiye. Abaturage barashimira byimazeyo Nyakubahwa Perezida wa Repubulika Paul Kagame udahwema kubagezaho ibikorwa by’amajyambere.

Mu Majyaruguru

I Gicumbi mu Murenge wa Rubaya mu Kagari ka Nyamiyaga hubatswe umudugudu w’icyitegererezo wuzuye utwaye miliyari 1,6 Frw watujwemo imiryango 40 irimo itishoboye itaragiraga aho kuba n’indi yari ituye mu manegeka.

Ni umudugudu wubatswe ku nkunga y’Umushinga Green Gicumbi, ukorera muri ako Karere binyuze muri FONERWA, aho wubakishijwe ibikoresho bifite ubushobozi bwo kugabanya iyangirika ry’ikirere.

Hanatashywe kandi amashuri y’imyuga n’ubumenyingiro abiri arimo iya Cyumba n’iya Mukarange yakira n’abahoze mu bikorwa byo gutunda no kwinjiza ibiyobyabwenge bazwi nk’abarembetsi bagera kuri 60. Bigamo imyuga inyuranye buri imwe yatwaye miliyoni 560 Frw.

Mu Karere Gakenke hatashywe ibikorwa byinshi birimo umuhanda wa kilometero 23,5 Gicuba -Janja n’ibirometero 9,3 bijya ku Bitaro bya Gatonde watwaye miliyari eshatu na miliyoni 641 Frw, hanatanzwe imbangukiragutabara yatwaye miliyoni 63 Frw yahawe ibitaro bya Gatonde.

Muri Burera ho hatashywe igishanga cya Kamiranzovu giherereye mu Murenge wa Butaro ahatunganyijwe hegitari 450, abaturage 300 bakaba barabonyemo imirimo ubwo cyatunganywaga kuri ubu kikaba gihingwamo n’amashyirahamwe abiri agizwe n’Abanyamuryango 1800 kugitunganya byatwaye miliyari imwe na miliyoni 240 Frw.

Hari kandi ishuri ryisumbuye rya Bushenga riherereye mu Murenge wa Bungwe rifite ibyumba umunani rikaba ribaye irya mbere rigeze mu Karere ka Burera ryubatswe rigeretse ryuzuye ritwaye miliyoni 640 Frw hanatashywe kandi ishuri ry’imyuga n’ubumenyingiro rya Cyanika iherereye mu Murenge wa Cyanika ryuzuye ritwaye 816Frw.

Muri Rulindo ho hatashywe Ikigo Nderabuzima cya Cyinzuzi n’ibiraro bibiri byo mu kirere byatwaye agera kuri miliyoni 735 Frw.

Minisitiri w’Intebe Dr Ngirente Edouard, ubwo yifatanyaga n’abaturage bo mu Karere ka Nyaruguru kwizihiza ku nshuro ya 28 Isabukuru yo Kwibohora kw’Abanyarwanda, yasabye abaturage gufata neza no kubyaza umusaruro ibikorwa remezo bubakiwe.

Yagize ati “Ndagira ngo mbasabe gufata neza iyi mpano y’Umukuru w’Igihugu y’ibikorwa remezo twakinguye uyu munsi, tubifate neza twumve ko ari ibyacu, tubigire ibyacu ariko tunabibyaze umusaruro utuganisha ku iterambere.”

Yabijeje ko uko ubushobozi buzajya buboneka bizajya byongerwa kuko iterambere rigomba gukomeza.

By’umwihariko yasabye urubyiruko gukora cyane rugamije kubaka igihugu arusaba kwirinda ingeso mbi zirimo ibiyobyabwenge n’ubusinzi.

Abana biga kuri GS Munini bahawe mudasobwa zibafasha kwiga ikoranabuhanga
Abayobozi bakurikiye uko abana bigishwa ikoranabuhanga mu Karere ka Nyaruguru
Aho abanyeshuri bicara mu isomero bahawe mu Karere ka Nyaruguru
Hatanzwe n'imbangukiragutabara zifasha abarwayi kugera kwa muganga byihuse
Ikigo cy'imyuga n'ubumenyingiro cya Cyanika cyatashywe ku mugaragaro
Ikigo nderabuzima vya Gasetsa cyuzuye gitwaye miliyoni 150 Frw kuri ubu cyatumye ababyariraga mu ngo babireka
Imihanda yubatswe mu Mujyi wa Nyakarambi yahinduye isura y'uyu Mujyi
Imihanda ihuza abaturage yo mu Mujyi wa Nyakarambi yashyizwemo kaburimbo
Imiryango itishoboye yahawe inzu zigezweho
Ingurube zahawe abaturage batujwe mu Mudugudu wa Munini zatangiye kubwagura
Iri shuri ryubatswe mu buryo bugezweho
Umudugudu w'icyitegererezo wa Gicumbi watujwemo abari mu manegeka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .