Kurwanya Coronavirus byakajijwe: Imipaka yafunzwe, abantu basabwa kuguma mu ngo zabo

Yanditswe na Rabbi Malo Umucunguzi
Kuya 21 Werurwe 2020 saa 07:40
Yasuwe :
0 0

Minisitiri w’Intebe Dr Edouard Ngirente, yatangaje ko hashingiwe ku ntera icyorezo cya Coronavirus kimaze gufata n’uburyo ibindi bihugu bihangana nacyo, hafashwe ingamba zirimo gufunga imipaka, abantu badafite ibikorwa byihutirwa bakaguma mu ngo mu rwego rwo gukumira ikwirakwira ryacyo.

Minisitiri w’Intebe yavuze ko byagaragaye ko hakwiye kongera imbaraga mu gukumira ikwirakwira ry’icyo cyorezo mu Rwanda, ku buryo ingamba zakajijwe mu gihe cy’ibyumweru bibiri ndetse bishobora kongerwa.

Kugeza kuri uyu wa Gatanu umubare w’abari bamaze kugaragaraho Coronavirus mu Rwanda bari 17, mu gihe umuntu wa mbere yabonetse ku wa 14 Werurwe 2020.

Mu myanzuro igomba gutangira kubahirizwa uhereye kuri uyu wa Gatandatu 23:59, irimo ko ingendo zitari ngombwa zibujijwe.

Itangazo rikomeza riti "Gusohoka mu rugo nta mpamvu zihutirwa birabujijwe, keretse abajya gutanga no gushaka serivisi z’ingenzi harimo kwivuza, guhaha, serivizi za banki n’izindi."

Kwishyurana hakoreshejwe ikoranabuhanga bigomba gukoreshwa ahashoboka hose kurusha kujya muri za banki na za ATM.

Indi myanzuro yafashwe

- Abakozi ba leta bose n’abikorera barasabwa gukorera akazi mu ngo zabo keretse abatanga serivisi z’ingenzi zavuzwe haruguru.

- Imipaka yose irafunzwe, keretse ku Banyarwanda bataha ndetse n’abandi batuye mu Rwanda byemewe n’amategeko, abo bose bakaba bazashyirwa mu kato mu gihe cy’ibyumweru bibiri (2) ahantu hateganyijwe.

- Ubwikorezi bw’ibicuruzwa byinjira cyangwa bisohoka mu Rwanda burakomeza.

- Ingendo hagati y’imijyi n’uturere tw’igihugu ntabwo zemewe keretse ku bajya kwivuza cyangwa abafite impamvu zihutirwa.

- Ubwikorezi bw’ibicuruzwa burakomeza nk’uko bisanzwe.

- Amasoko n’amaduka birafunzwe keretse abacuruza ibiribwa, ibikoresho by’isuku, za farumasi, lisansi na mazutu n’ibindi bikoresho by’ibanze.

- Za moto ntabwo zemerewe gutwara abagenzi keretse izigemuye ibicuruzwa,

- Imodoka zitwara abagenzi mu mijyi zirakomeza gukora hubahirijwe intera ya mereto imwe hagati y’abagenzi,

- Utubari twose turafunzwe, resitora zirakomeza gukora hatangwa serivisi yo guha ibyo kurya abakiliya bakabitahana.

Minisitiri w’Intebe yasabye abayobozi b’inzego z’ibanze n’umutekano gushyira mu bikorwa aya mabwiriza, kandi Abanyarwanda basabwa kwita ku mabwiriza bahabwa.

Minisante imaze iminsi iteguza

Minisiteri y’Ubuzima imaze iminsi itanga integuza ko bitewe n’uburemere bw’ikibazo, igihe cy’ibyumweru bibiri cy’ifungwa ry’amashuri n’insengero cyemejwe ku wa 14 Werurwe 2020 gishobora kongerwa, ndetse kigashyirwa ku zindi nzego.

Aya mabwiriza mashya asimbuye arimo ayatanzwe na Minisiteri y’Ubutegetsi bw’Igihugu, yari yatangaje ko guhera kuri uyu wa Gatanu tariki 20 Werurwe 2020, utubari two mu mujyi tuzajya dufunga saa tatu z’ijoro naho mu cyaro dufunge saa moya. Ubu twose twafunzwe.

U Rwanda kandi rwaherukaga guhagarika ingendo z’indege ziva n’izinjira mu Rwanda zitwaye abagenzi - harimo na RwandAir - ariko rwemeza ko indege z’imizigo zo zikomeza gukora.

Minisiteri y’ubuzima isaba kwita ku gukaraba intoki, kwirinda kujya ahantu hateraniye abantu benshi no gusiga intera ya metero imwe hagati y’abantu no kwirinda ingendo zitari ngombwa.

Ibimenyetso bya Coronavirus birimo kugira umuriro, ibicurane, umunaniro n’inkorora ijyana no kubabara mu mihogo, guhumeka nabi bishobora kugera aho bitera umusonga nawo ushobora kubyara urupfu.

Ishobora kwandura binyuze mu kuramukanya abantu bahana ibiganza, hakabaho guhererekanya amatembabuzi yaturutse mu myanya y’ubuhumekero y’umuntu wanduye, maze uyakozeho akaza kwikora ku munwa, ku mazuru cyangwa mu maso, agahita yandura. Umuntu ashobora no gukura iyi virusi ku kintu yaguyeho, kandi iyo gikomeye ishobora kumaraho amasaha menshi yagera no ku minsi itatu.

Minisante itanga inama ko umuntu ugaragaje ibimenyetso bya Coronavirus yakwihutira guhamagara umurongo utishyurwa wa 114, agahabwa ubufasha adahise akora urugendo, cyangwa akitabaza umujyanama w’ubuzima umwegereye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .