00:00:00 IGIHE NETWORK KN KINYARWANDA EN ENGLISH FR FRANCAIS

Kurega undi umubeshyera: iturufu nshya ku bashakanye bashaka kwikizanya

Yanditswe na Iradukunda Serge
Kuya 28 Nzeri 2022 saa 04:21
Yasuwe :

Urwego rw’Ubugenzacyaha, RIB rwagaragaje ko muri iyi minsi ibyaha byo kurega undi umubeshyera no gutanga ubuhamya bw’ibinyoma biri kugenda bifata indi ntera, ruburira ababyijandikamo ko bazakomeza gukurikiranwa.

Icyaha cyo kurega undi umubeshyera giteganywa n’ingingo ya 152 mu gitabo cy’amategeko ahana y’u Rwanda.

Iyi ngingo ivuga ko “Umuntu wese urega undi ku mugenzacyaha, ku mushinjacyaha cyangwa ku mucamanza kandi azi neza ko amubeshyera, aba akoze icyaha.”

“Iyo abihamijwe n’urukiko, ahanishwa igifungo kitari munsi y’amezi abiri ariko kitageze ku mezi atandatu n’ihazabu y’amafaranga y’u Rwanda atari munsi y’ibihumbi magana atatu ariko atarenze ibihumbi magana atanu cyangwa kimwe gusa muri ibyo bihano.

Icyaha cyo gutanga ubuhamya bw’ibinyoma cyo giteganywa n’ingingo ya 255, aho ivuga ko “Umuntu wese utanga, abigambiriye, ubuhamya bw’ibinyoma mu nzego z’ubutabera, aba akoze icyaha.”

“Iyo abihamijwe n’urukiko, ahanishwa igifungo kitari munsi y’umwaka umwe ariko kitarenze imyaka itatu n’ihazabu y’amafaranga y’u Rwanda atari munsi y’ibihumbi magana atanu ariko atarenze miliyoni imwe.”

Iyi ngingo ikomeza ivuga ko “Iyo ubuhamya bw’ibinyoma bwatanzwe mu rubanza rw’inshinjabyaha uregwa yakatiwemo igifungo kirenga imyaka itanu (5), uwamutanzeho ubuhamya bw’ibinyoma abigambiriye ahanishwa igifungo kitari munsi y’imyaka itatu (3) ariko kitarenze imyaka itanu (5) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW).”

Imibare yakusanyijwe n’Urwego rw’Igihugu rw’Ubugenzacyaha mu gihe cy’imyaka itatu, igaragaza rwakiriye ibirego 64 ko icyaha cyo gutanga ubuhamya bw’ibinyoma.

Mu mwaka wa 2019/20, RIB yakiriye ibirego 20, mu 2020/21 rwari rwakiriye ibirego 23 mu gihe 2021/22 hakiriwe ibirego 21.

Ku bijyanye n’icyaha cyo kurega undi umubeshyera muri iyi myaka itatu, RIB yakiriye ibirego 86.

Mu 2019/20, hakiriwe ibirego 20, mu 2020/21 hakirwa ibirego 32, mu gihe mu 2021/22 hakiriwe ibirego 34.

Hashingiwe kuri iyi mibare biragaragara ko ubukana bw’ibi byaha bugenda burushaho gufata indi ntera mu muryango nyarwanda.

Icyaha cyo gutanga ubuhamya bw’ibinyoma, RIB igaragaza ko hari igihe gikorerwa mu Bugenzacyaha, mu Bushinjacyaha cyangwa se mu rukiko.

Iki cyaha cyiganje mu kigero cy’abantu bari hagati y’imyaka 40 na 89, aho bangana na 62% mu gihe abari hagati y’imyaka 20 na 39 bagikora ari 38%.

Iyo urebye usanga abagabo ari bo bagize umubare munini w’abakora iki cyaha cyo gutanga ubuhamya bw’ibinyoma kuko bangana na 63,3%, abagore bakangana na 33,7%.

Mu kiganiro Umuvugizi wa RIB, Dr Murangira B. Thierry yagiranye na IGIHE yavuze ko iki cyaha cyo gutanga ubuhamya bw’ibinyoma kigaragara mu manza zitandukanye.

Ati “Ibi byaha byo gutanga ubuhamya bw’ibinyoma bikunze kugaragara cyane hagati y’abashakanye cyangwa se hagati y’abashaka imitungo, aho umwe asaba ubundi kuzemeza ibyo bumvikanye imbere y’urukiko.”

“Bikunze no kugaragara no mu birego by’imbonezamubano nk’izungura ku bashakanye, abashaka indonke bigaragara kandi no mu bashaka kuzamurwa mu ntera mu kazi. Ibi byaha bijyana n’ikindi cyaha cyo gukora cyangwa se gukoresha inyandiko mpimbano.”

Yavuze ko hari nk’abantu ugenda usanga bakoresheje impapuro z’impimano bagaragaza ko ari abana b’umuntu runaka kugira ngo bazazungure. Icyo gihe icyaha cyo gutanga ubuhamya bw’ibinyoma gihita gihurirana n’icyo gukoresha impapuro mpimbano.

Icyaha cyeze mu bashaka kwikizanya

RIB igaragaza ko icyaha cyo kurega undi umubeshyera kigaragara cyane mu byiciro bitandukanye by’Abanyarwanda nk’aho umukobwa ashobora kubeshyera umuhungu bakundana ko yamusambanyije ku gahato.

Murangira ati “Iki cyaha gikunze kugaragara nk’ahantu barega umuntu bamubeshyera ko yasambanyije umwana, ugasanga abantu bari kuvuga ko umuntu runaka yasambanyije umukozi wo mu rugo utaruzuza imyaka y’ubukure. Ntabwo tuvuga ko ibi byaha bitabaho, bibaho ariko hari ababyitwaza bakabeshyera abandi, ugasanga umugabo arashinjwa gusambanya umwana we.”

Yavuze ko “Iki cyaha gikunze kandi kugaragara mu bashakanye iyo umwe ashaka kwivuna undi cyangwa se kumwikiza bishingiye ku makimbirane y’imitungo, aho umwe ashaka kwikiza undi akavuga ati ‘nibamufunga imyaka 20 azasanga umutungo narawigaruriye.”

Ahandi iki cyaha cyo kurega undi umubeshyera gikunze kugaragara ngo ni hagati y’umusore n’inkumi bakundanaga.

Ati “Hari igihe usanga bari barumvikanye kubana hagira umwe ubeshya undi, mugenzi we akababara, uwo wababaye akaba yashaka uburyo yakwihorera ku bwo guhemukirwa na mugenzi we, ugasanga aravuze ati kanaka yansambanyije ku gahato.”

Ahandi iki cyaha kigaragara ni mu bijyanye n’ubujura aho usanga nk’umukoresha ushaka kwikiza umukozi we ku mpamvu zitandukanye amubeshyera ko yamwibye.

Murangira ati “Ushobora gusanga umukoresha arimo umukozi amafaranga menshi yarabuze uko amwishyura, akamurega ngo yibye. Akamurega icyaha cy’ubujura.”

Murangira yavuze ko iyo hakozwe iperereza bagasanga hari abatanze ubuhamya bw’ibinyoma nabo bahanwa.

Ati “Nta gitangaza ko ushobora kuza mu Bugenzacyaha, uje kurega bikarangira ari wowe ukurikiranywe, ugasanga umuntu ari kuvuga ngo ‘naje kurega none ninjye mufunze.”

Iturufu mu bashakanye bashaka amafaranga

Urwego rw’Igihugu rw’Ubugenzacyaha rwagaragaje ko abandi bantu bakunze kugaragara mu cyaha cyo gutanga ubuhamya bw’ibinyoma ari abashakanye aho umugabo n’umugore bashobora kugambanira undi mugabo.

Murangira ati “Aha usanga abashakanye bumvikana, hakaba hari umuntu bashaka gukuraho amafaranga runaka wenda waterese umwe muribo noneho bakumvikana umwe akazaza akavuga ko yasanze uwo muntu ashaka gusambanya mugenzi we bashakanye.”

Ibi ngo bigaragara cyane ku bashakanye bashaka kurya umuntu amafaranga. Aho nk’umugabo ashobora kugambana n’umugore we, ati ‘uzabeshye uriya mugabo ufite amafaranga ko mugiye kuryamana noneho njye nzahita nza, tumukuremo amafaranga kugira ngo tutamurega.”

Murangira yavuze ko iyo iki cyaha gikorewe umuntu ufite izina rikomeye usanga yifuza gutanga amafaranga yose ashoboka kugira ngo izina rye ridahindana.

Yasabye abakorerwa iki cyaha kugira umuhate wo kurega kuko iyo atabikoze usanga aba bantu bakomeza gukoresha ubu buryo mu kumurya amafaranga.

Bamwe mu babikora batangiye guhanwa

Umwe mu bantu baherutse gukurikiranwaho iki cyaha cyo kurega umuntu umubeshyera ni umukobwa wo mu Karere ka Rubavu wareze Umuyobozi w’Umurenge amushinja kumukubita no kumukura iryinyo nyuma y’uko baryamanye.

Mu kirego uyu mukobwa wakoraga mu kabari yatanze, yavuze ko Gitifu yari amaze igihe amusaba ko baryamana undi akabyanga, nyuma ngo yaje kumufata adafite ibyangombwa by’uko yikingije aramukubita amukura iryinyo.

Dr Murangira yavuze ko mu iperereza RIB yakoze yasanze uyu mukobwa yarabeshye ahubwo yarareze uyu muyobozi ku kagambane ku mukoresha we wo mu kabari wari wararakajwe n’uko yagiye acibwa amafaranga menshi kubera kutubahiriza ingamba za COVID-19.

Uyu nyiri akabari ngo yaje kurakarira uyu muyobozi bituma anoza umugambi wo kumwikiza abinyujije muri uyu mukobwa.

Kugeza ubu umukobwa yamaze gutabwa muri yombi mu gihe uyu mukoresha we akiri gushakishwa.

Dr Murangira B. Thierry yagaragaje ko uretse kuba uwakoze ibi byaha afungwa biteza n’izindi ngaruka zirimo inzangano mu miryango.

Ati “Turasaba Abanyarwanda kwirinda ibi byaha kuko ingaruka zirimo ari nyinshi, uretse ibijyanye n’ibihano byo kuba umuntu yafungwa, usanga ibi ari ibyaha bikurura inzangano hagati y’abantu ugasanga harimo inzika cyangwa kwangana bidafite impamvu yumvikana bishingiyeho.”

Mu Rwanda imibare y'abatabwa muri yombi bakurikiranyweho icyaha cyo kurega abandi babashyera ikomeje kuzamuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .