00:00:00 IGIHE NETWORK KN KINYARWANDA EN ENGLISH FR FRANCAIS

Kuki mu Rwanda abagore aribo bahembwa make?

Yanditswe na Ferdinand Maniraguha
Kuya 21 June 2022 saa 07:23
Yasuwe :

Mu myaka hafi 20 ishize, ubwo Hélène [izina ryahinduwe] yigaga mu mashuri yisumbuye mu Rwanda, mu biruhuko yakundaga kujya gutera ibiraka muri imwe muri hoteli ku Kacyiru.

Muri ibyo biraka byo kwakira abagana hoteli, habaga harimo n’abahungu bangana, baje gushakisha amafaranga bazifashisha ku ishuri mu gihembwe gitaha, nyamara abakobwa n’abahungu ntibahembwaga amafaranga amwe.

Hélène avuga ko umukoresha wabo yari yarababwiye ko uburyo umuhungu yihuta mu kwakira abakiliya atari ko umugore yihuta.

Ati “Yavugaga ko umukobwa agenda gahoro kandi akagira utuntu twinshi tumurangaza.”

Nyuma y’imyaka 20, ubusumbane mu mishahara hagati y’abagabo n’abagore mu Rwanda burakigaragaza, nk’uko byagaragajwe na Raporo y’Ikigo cy’Igihugu cy’Ibarurishamibare ku murimo ya Gashyantare uyu mwaka, igaragaza uko impuzandengo y’umushahara mu Rwanda ihagaze.

Iyo raporo igaragaza ko muri rusange impuzandengo y’umushahara ku kwezi ari 26.000 Frw ariko ku bagore ari 20.000 Frw. Byumvikane neza, hashobora kuba hari abagore bahembwa amafaranga menshi, ariko uteranyije na benshi cyane bahembwa make, impuzandengo iragabanyuka.

Raporo igaragaza ko n’ubusanzwe abagore ari bo bake mu bafite umurimo mu Rwanda kuko basaga miliyoni 1,6, mu gihe abagabo basaga miliyoni 1,8.

Ntabwo raporo ijya mu mizi y’imirimo abagore bahembwamo menshi n’amake ariko igaragaza ko hakiri ubusumbane cyane.

Umuyobozi ushinzwe kongera ubushobozi mu Mpuzamiryango Pro-Femmes Twese Hamwe, Nkundimfura Rosette, yabwiye IGIHE ko impamvu abagore bahembwa make, ari uko mu myanya myinshi ifata ibyemezo ari bake.

Ati “Nushaka uhere muri politiki, imyanya myinshi ya politiki irimo abagabo benshi kurusha abagore. Nujya mu bayobozi b’imiryango itegamiye kuri Leta, abenshi ni abagabo kurusha abagore.”

“Jya mu bikorera, ho abagabo nibo bari mu bikorwa bifatika. Abagore bari mu bucuruzi buto cyane. Nujya mu bacuruza udutaro n’abazunguzayi, umubare munini ni abagore.”

Mu 2021 u Rwanda rwari ku mwanya wa karindwi ku rwego rw’Isi mu guteza imbere uburinganire, rukaba urwa kabiri muri Afurika inyuma ya Namibia.

Icyuho cy’umushahara hagati y’abagabo n’abagore, nka kimwe mu bipimo by’ingenzi bigaragaza urwego rw’uburinganire mu gihugu, u Rwanda rwakigabanyije ku kigero cya 80%.

Nubwo bimeze gutyo, urugendo ruracyari rurerure nk’uko Nkundimfura Rosette abivuga.

Ati “Hari n’abanga guha akazi abagore ngo ntibabishobora, bityo ugasanga bagiye ku myanya yo hasi cyane. Nujya muri sosiyete zikora isuku, uzasanga umubare munini ari abakobwa n’abagore bahembwa ibihumbi 20Frw. Nujya ku bakubura mu muhanda, abenshi ni abagore n’abakobwa. Uhita wumva ko harimo ubusumbane.”

Depite Marie Médiatrice Izabiliza yabwiye IGIHE ko akenshi ubusumbane mu mishahara bugaragara mu bikorera, ari nabo batanga akazi ku gice kinini cy’abaturage.

Ku bakora mu mirimo ya Leta, yavuze ko ubusumbane butashingira ku mishahara ahubwo byagendera ku rwego rw’akazi bakora bitewe n’ubumenyi bafite.

Ibyo bijyana n’uko mu gihe abagore baba batarabashije kwiga ngo bagere kure, nubwo bajya mu nzego zitandukanye bazisanga mu myanya yo hasi mu gihe iyo hejuru isaba urwego runaka rw’amashuri.

Icyakora Depite Izabiriza yavuze ko hakwiriye no kujya harebwa ku gaciro k’imirimo myinshi abagore bakora badahemberwa, cyane cyane mu ngo zabo.

Kuba iyo mirimo idakunze kubarirwa agaciro kandi bayitakazaho umwanya munini, ngo biri mu bibagaragaza nk’aho ibyo bakora ari bike cyangwa bidakomeye kandi atari ko kuri.

Rosette Nkundimfura we yasabye abagore kwitinyuka, bagahatanira imyanya babona ko bafitiye ubushobozi bwo gukora kuko nabyo bibasubiza inyuma.

Raporo y’Ikigo cy’Ibarurishamibare igaragaza ko mu bagore bari bafite icyo bakora kugeza muri Gashyantare uyu mwaka, 993.414 bari mu buhinzi n’ubworozi, ubucuruzi ni 203.774, abari mu nganda ni 85.956, abari mu bwubatsi ni 54.746, abari mu kazi ka Leta no mu nzego zishinzwe umutekano ni 11.566.

Abagore bagize 50% by’abaturage ba Afurika, ariko bakagira uruhare rungana na 33% ku musaruro mbumbe w’uyu Mugabane, nyamara Ubushakashatsi bwakozwe n’Urubuga ‘Hive’ mu 2018, bwagaragaje ko nko mu mirimo yo mu biro, abagore batanga umusaruro uruta uw’abagabo ku kigero cya 10%.

Ishusho igaragaza imirimo myinshi abagore bagaragaramo mu Rwanda
Raporo yagaragaje ko hakiri icyuho mu mishahara y'abagore ugereranyije n'abagabo bari mu mirimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .