00:00:00 IGIHE NETWORK KN KINYARWANDA EN ENGLISH FR FRANCAIS

Kuki Amerika ishidikanya kuri demokarasi y’u Rwanda?

Yanditswe na Musangwa Arthur
Kuya 13 June 2022 saa 07:49
Yasuwe :

Kimwe mu byo Perezida wa Leta Zunze Ubumwe za Amerika, Joe Biden, yasezeranyije abaturage b’igihugu cye ubwo yarimo kwiyamamariza kubayobora, ni ugutegura inama mpuzamahanga igamije kwiga kuri Demokarasi. Ni inama yabaye hakoreshejwe ikoranabuhanga hagati ya tariki 9-10 Ukuboza 2021, itumirwamo ibihugu birenga 100 hirya no hino ku Isi bitarimo u Rwanda.

Iyi Nama yari igamije kurebera hamwe imiterere ya demokarasi ku rwego mpuzamahanga, hagasuzumwa imbogamizi ihura na zo n’uburyo ‘ibihugu bigendera ku mahame ya demokarasi’ bishobora gukorera hamwe mu kurushaho kuyishyigikira, na cyane ko ibipimo mpuzamahanga birimo nk’ibikorwa n’Umuryango ‘Freedom House’ bigaragaza ko demokarasi iri gusubira inyuma ku rwego rw’Isi, aho 2021 yari ku kigero nk’icyo yariho mu 1989.

Mbere y’iyi nama, mu Ugushyingo 2021, Samantha Power, Umuyobozi w’Umuryango Nterankunga wa Amerika, USAID, yari yavuze ko ‘u Rwanda rutujuje amabwiriza agenga igihugu gifite demokarasi yuzuye.’

Usibye Power, abayobozi benshi ba Amerika n’ibindi bihugu byo mu Burayi bakunze kunenga u Rwanda ku ngingo y’uko rutubahiriza amahame ya demokarasi, ingingo yarushijeho kugarukwaho cyane kuva mu 2017, ubwo Abanyarwanda barenga 98% batoraga Perezida Paul Kagame kugira ngo akomeze kubayobora muri manda ya gatatu.

Kenshi niwumva abanenga demokarasi y’u Rwanda, uzumva batanga impamvu zirimo kuba Perezida Kagame yaragize amajwi menshi mu matora y’Umukuru w’Igihugu aheruka, ubundi bakakubwira ko u Rwanda rutagira abatavuga rumwe n’ubutegetsi bafatika, bamwe bakavuga ko u Rwanda rugenzura abaturage ku kigero cyo hejuru, aho nta muntu wemerewe gutanga ibitekerezo binyuranye n’ibyo Leta ishaka n’ibindi birego byinshi.

Kenshi usanga impamvu demokarasi y’u Rwanda ifatwa gutya, biterwa n’ishusho y’icyitwa demokarasi mu bihugu nka Amerika n’ibindi. Nko muri Amerika, usanga ‘ihangana ry’abanyepolitiki’ ari imwe mu ntwaro isobanura iterambere rya demokarasi.

Nyamara kuvuga ko mu Rwanda nta demokarasi ihari byaba ari ukwibeshya kuko hanashingiwe ku bisobanuro by’ijambo ubwaryo; ‘ubutegetsi bw’abaturage, bushyirwaho n’abaturage mu nyungu zabo’, u Rwanda ni kimwe mu bihugu byujuje iki gisobanuro ku kigero cyo hejuru.

Nk’urugero, biragoye kuba wagira akangononwa kuri Leta y’u Rwanda mu gihe Abanyarwanda barenga 98% bitoreye Perezida Kagame. Ubwinshi bw’uyu mubare busobanurwa nk’ikimenyetso cy’uko nta batavuga rumwe n’ubutegetsi bahari, nyamara hakirengagizwa ko bwanaba igisobanuro cy’uko Abanyarwanda bahuje umugambi, bakagira intego imwe kandi bakaba bahuje uburyo bumva yagerwaho, ari na byo bitanga imibare iri hejuru.

Rimwe kandi uzakunda kumva bavuga ko amashyaka yo mu Rwanda adahabwa urubuga rwo gutanga ibitekerezo, nyamara akaba ari mu Ihuriro ry’imitwe ya politiki, aho ahabwa umwanya mu gutanga ibitekerezo ku miyoborere y’igihugu muri rusange, tutibagiwe ko ayemewe na Leta anafite imyanya y’ubuyobozi mu nzego zitandukanye za Leta.

Kubera ko ubu buryo buba budakunze gukoreshwa muri Amerika n’ibindi bihugu byigira abavugizi ba demokarasi, uzasanga bitabyumva. Nyamara impamvu u Rwanda rwabihisemo ziba zumvikana, kuko zishingiye ku ngingo nyinshi zirimo n’amateka y’igihugu, yatanze amasomo y’uko kugira ibitekerezo bitandukanye bidakwiriye kuvamo ihangana. Uretse Ihuriro ry’Imitwe ya Politiki yemewe mu Rwanda, iki gitekerezo ni na cyo gishingirwaho mu nama zirimo Umushyikirano.

Ubundi uzumva ngo u Rwanda ni igihugu kidatanga ubwisanzure bwo gutanga ibitekerezo, wumve ngo biterwa n’uko Leta iba yanga ko abayinenga bavuga, ku buryo ushobora gutekereza ko u Rwanda ari nka ‘Guantanamo’ ya Afurika.

Nyamara iyo biba bimeze gutyo, ntabwo Leta iba ishyira imbaraga mu guteza imbere ibikorwaremezo nka internet bituma abaturage bashobora kuvuga ibyo bashaka, uko babishaka, igihe babishakiye kandi bakabigeza ku Isi yose mu kanya gato.

Ikindi ni uko u Rwanda rutarafata ingamba nk’izo gufunga internet, gushyiraho amananiza nk’imisoro n’ibindi nk’ibyo, ahubwo rugashyira imbaraga zo kugeza telefoni kuri bose, nk’uko gahunda ya ‘Connect Rwanda’ ibigena.

U Rwanda rushyize imbere gahunda yo kugeza ku baturage imiyoboro y'itumanaho nk'imwe mu nzira yo gushyigikira ukwishyira ukizana kw'abaturage, ari nako kuvamo iterambere rya demokarasi

Kuki demokarasi y’u Rwanda idahabwa agaciro?

Iyo ukurikiye abanenga demokarasi y’u Rwanda, usanga bavuga ibintu babica hejuru, abatanga ingero ntibazisobanure, abandi bakaba bafite amakuru y’ibinyoma n’ibindi nk’ibyo. Icyakora iyo bigeze ku bihugu nka Amerika, hari impamvu zikomeye zo kunenga demokarasi y’u Rwanda, zitandukanye kure n’uko yaba ihari cyangwa idahari.

Icya mbere gikwiriye kumvikana, ni uko Leta y’u Rwanda yabashije gukora ibintu bifatwa nk’ibitangaza. Ntabwo byoroshye kuva mu bihe bikomeye nka Jenoside yakorewe Abatutsi n’ingaruka yagize, ngo noneho igihugu cyongere cyiyubake mu gihe gito nk’uko byagenze ku Rwanda.

Ubundi ibihugu byanyuze mu ntambara, bimara igihe kinini cyane bikirwana no kongera kubaka inzego, kurwanya ruswa n’ibindi bitandukanye. U Rwanda rwabashije kugera kuri ibi bikorwa mu gihe gito gishoboka, ku buryo ibi ari isomo rikomeye ku bindi bihugu bya Afurika.

Urebye ibihugu byinshi bya Afurika, bike cyane ni byo bitanyuze mu ntambara cyangwa imyigaragambyo karundura y’ihangana ry’abaturage mu myaka nka 30 ishize. Byinshi muri ibi bihugu biracyarwana no kubaka inzego z’imiyoborere, guhangana na ruswa n’ibindi nk’ibyo, iyi ikaba imwe mu mpamvu zikomeye cyane tubona uyu Mugabane wacu ubayeho mu bukene urimo nubwo ukize ku rugero rutangaje.

Ubu bukene bwa Afurika, buterwa n’uko uyu Mugabane udafite ubuyobozi buhamye, ni inyungu ku bindi bihugu byitwa ko bikize, bikanagendera ku mahame ya demokarasi, kuko bibona uko bitwara umutungo wa Afurika mu buryo bworoshye.

Nk’ubu mu 2017, Afurika yakiriye miliyari 162$ mu buryo bw’inkunga, inguzanyo n’amafaranga yoherejwe n’Abanyafurika batuye hanze yayo. Nyamara muri uwo mwaka, arenga miliyari 203$ yarahotse, menshi agenda mu bikorwa birimo kunyereza imisoro, inyungu y’ibigo by’ubucuruzi bikorera muri Afurika n’ubundi buryo bwiganjemo ubutanoze.

Nibura buri mwaka, miliyari 88$ zisohoka muri Afurika bitewe na ruswa no kunyereza imisoro, aya mafaranga akajya muri banki zo mu bihugu nka Amerika, agateza imbere ubukungu bwabyo. Aya mafaranga ni ½ cy’ayo Afurika ibura kugira ngo izagere ku ntego z’iterambere rirambye (SDGs) mu 2030, agakuba kabiri amafaranga Afurika ikenera buri mwaka mu kuziba icyuho mu kubaka ibikorwaremezo.

Muri rusange, bibarwa ko amafaranga arenga miliyari 1400$ yakuwe muri Afurika mu buryo bufifitse hagati ya 1989 na 2009, aho akubye ishuro 10 amafaranga uyu Mugabane wakiriye nk’imfashanyo.

Ibi byose bishoboka kubera imiyoborere idafashe muri Afurika kandi ntabwo ari igihombo ku bihugu nka Amerika n’u Burayi, kuko ayo mafaranga yinjizwa mu bukungu bwabyo.

Ibihugu byinshi bya Afurika, cyane ibimaze igihe gito bivuye mu ntambara, biri kurebera ku miyoborere y’u Rwanda mu rwego rwo gushyiraho inzego zifatika iwabo. Kugaragaza u Rwanda nk’igihugu kidakurikiza amahame ya demokarasi, ni uburyo Amerika iba ikoresha mu rwego rwo gutesha agaciro ibyo u Rwanda rwagezeho mu bijyanye n’imiyoborere, bityo bigaca intege n’ibindi bihugu byakwifuza kurwigiraho, kuko ubuyobozi bwa Afurika buramutse bukangukiye rimwe, byagira ingaruka ku bihugu birimo na Amerika.

Ntabwo ari uko u Rwanda ruri inyuma mu kubahiriza amahame ya demokarasi, niyo wakurikiza ibipimo bigenderwaho n’ibihugu nka Amerika n’u Burayi, ahubwo ikibazo nyamukuru ni uko ubuyobozi bw’u Rwanda buri gutanga urugero ku bindi bihugu bya Afurika.

Kimwe n’u Rwanda, ibi bihugu biri kwiga kwishakamo ibisubizo bidashingiye ku bihugu byo hanze, ikintu gishobora gutesha agaciro ubuhangange bwa Amerika muri Afurika ari na cyo kintu u Rwanda ruzira.

Urugero rutangwa n'u Rwanda mu kwishakamo ibisubizo ni kimwe mu bituma rukunze gushinjwa ibirimo kutubahiriza amahame ya demokarasi, kugira ngo ibyo rukora biteshwe agaciro ku rwego mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .