Kuki abenshi mu bagaragayeho Coronavirus mu Rwanda baturutse i Dubai?

Yanditswe na Rabbi Malo Umucunguzi
Kuya 27 Werurwe 2020 saa 05:47
Yasuwe :
0 0

Imibare y’abamaze kwandura Coronavirus mu Rwanda igaragaza ko ari bantu 54, barimo 45 bayiturukanye hanze, banduza abandi icyenda mu gihugu. Urebye aho abavuye hanze baturutse, abarenga 20 bavuye i Dubai muri Leta Zunze Ubumwe z’Abarabu.

Ni imibare Minisitiri w’Ubuzima Dr Ngamije Daniel avuga ko ubwinshi bw’ubwandu bwaturutse i Dubai, bushobora kuba bufitanye isano no kuba ari umujyi Abanyarwanda benshi bahahiramo.

Dubai ni umujyi mpuzamahanga w’ubucuruzi, uretse ibyo ukaba n’ahantu hakorerwa ubukerarugendo n’abatari bake, ku babaga bashaka kuruhuka cyangwa kwishimisha. Ubu si ko bikimeze kuko muri uyu mujyi ibikorwa byinshi byafunzwe mu gukumira Coronavirus.

Minisitiri Ngamije yabwiye RBA ati “Muri iki cyumweru mu by’ukuri mu mibare twabonaga buri munsi wabonagamo abantu baturutse i Dubai ari benshi, nkeka ko ari no kubera imiterere ya hari ya hantu, ni isoko mpuzamahanga, Isi yose ijya kuhahahira, Isi yose iza kuhagurisha ibintu, Abanyarwanda bariyo abenshi bari mu bucuruzi.”

“Bityo rero usanga bafite ibyago byo guhura n’abantu bashobora kuba banduye. Igihe cyarageze cyo kuvuga ngo tugiye gufunga ingendo z’abantu mu ndege, ubwo bahitamo gutaha, bazira icya rimwe, bituma tubasuzuma ari benshi icya rimwe, nta cyatangaza ko muri iyo mibare wasangamo abaturutse Dubai banduye ari benshi.”

Ku wa 29 Mutarama 2020 nibwo abarwayi ba mbere bagaragaye mu Mujyi wa Dubai, uwo ukaba ari umuryango w’abantu bane wari uturutse mu Bushinwa, muri icyo gihe bwari bwugarijwe n’icyorezo cya Coronavirus.

Icyo gihe ingendo z’indege zari zikomeje, nta wikangaga ko ubwandu bushya bushobora kwiyongera, nubwo hari ingamba zimwe zahise zifatwa.

Umujyi wa Dubai ni wo winjije Coronavirus muri Uganda by’umwihariko, kuko hafi abarwayi icumi ba mbere yagaragayeho bari baturutse i Dubai. Uganda ivuga ko ubwo yakoraga urutonde rw’ibihugu abantu baturukamo bagahita bashyirwa mu kato, Dubai itariho kubera amakuru Minisiteri y’Ubuzima ivuga ko yahabwaga.

Ku wa 24 Werurwe Minisitiri w’Ubuzima wa Uganda, Dr. Jane Ruth Aceng, yabwiye abanyamakuru ko batazi niba amakuru bahabwaga kuri Dubai ari ukuri.

Ati “Dubai ntabwo yabaga mu bice twavugaga ko birimo ibyago byinshi, kubera ko imibare yatangazwaga ku rwego mpuzamahanga ntiyagaragazaga Dubai nk’ahantu hari ibyago byinshi. Ariko ugendeye ku byo turimo kubona, ntabwo tuzi neza niba ibyatangazwaga byari ukuri, kubera ko abantu bose turimo kubona banduye muri Uganda, baturutse i Dubai.”

Ubwo umuntu wa mbere wanduye Coronavirus mu Rwanda yabonekaga hafunzwe amashuri n’insengero mu gihe cy’ibyumweru bibiri, icyo gihe kiza gushyirwa ku rundi rwego hafungwa imipaka y’igihugu, ingendo z’indege ndetse n’ingendo zitari ngombwa mu gihugu zirahagarikwa, imodoka rusange zitwara abagenzi zikurwa mu mihanda.

Minisitiri Dr Ngamije avuga ko guhagarika indege ari ingamba ikwiye gukomeza muri iyi minsi, kubera ko byagaragaye ko indege yavaga hanze itaburagamo nibura umuntu umwe cyangwa babiri bafite Coronavirus.

Yakomeje ati “Bityo rero kuva twazihagarika, ubu tuzi abaje, abamaze kwandura n’abo bahuye nabo turi kubakurikirana, ariko ntabwo buri munsi hariya twakira abarwayi babiri cyangwa batatu baje mu gihugu bafite ubwo burwayi. Icyo cyagiye ku ruhande.”

“Ubu tugomba kureba rero ku mipaka yo hasi, izo ngamba zirahari. Umuntu wese wambutse umupaka wo hasi na we arasuzumwa, kugira ngo hatabamo icyuho bukaba ubundi buryo bwo kugira ngo indwara ikomeze kwiyongera mu gihugu.”

Ibyo ngo bitanga icyizere ko mu minsi mike iri imbere abarwayi bemezwa ko banduye Coronavirus batangira kugabanuka, kugeza ubwandu bushya buhagaze.

Dubai yakajije ingamba

Nyuma yo kubona neza ko bugarijwe, Leta Zunze Ubumwe z’Abarabu zakajije ingamba zirimo ko abakozi bose baba aba leta n’abikorera bagomba gukorera mu rugo, mu masaha y’ijoro ingendo zose zigahagarikwa, kuko hagiye guterwa imiti igamije kwica Coronavirus muri uyu mujyi mu gihe cy’iminsi itatu, igikorwa cyiswe “National Disinfection Programme.”

Iki gihugu kizwiho ubucuruzi bukomeye kimaze kwemeza ko abantu 333 banduye Coronavirus ndetse babiri imaze kubahitana, ibintu byatumye ingamba zikazwa.

Amabwiriza mashya avuga ko abantu batemerewe gukora ingendo nijoro guhera kuri uyu wa Kane kugeza ku Cyumweru, hakazajya haterwa imiti hagati ya 8:00 z’ijoro kugeza 6:00 za mu gitondo, ku isaha yo muri icyo gihugu.

Guverinoma ya Leta Zunze Ubumwe z’Abarabu yategetse za minisiteri n’ibigo bya leta kimwe n’inzego z’abikorera, bigomba kugabanya abakozi bajya mu kazi mu buryo bwa buri munsi nibura kuri 30%. Ni imyanzuro itareba ariko serivisi z’ibanze nk’ubuvuzi, imari, ingufu, itumanaho, umutekano, igisirikare, ubwikorezi bw’imizigo n’ibiribwa.

Mu bindi bikorwa byafunzwe harimo inzu zikorerwamo imyitozo ngororamubiri, ahareberwa sinema, inzu zitunganya imisatsi y’abagabo n’abagore, ahakorerwa inanura ry’ingingo n’aho abantu baruhukira, hose hagomba gufungwa mu byumweru bibiri.

Muri za restaurant abantu bashobora gutumayo ibyo kurya, bidasabye ngo bicare hamwe bafungure. Banki zo zirakomeza gukora nk’ibisanzwe, ariko zigendeye ku mabwiriza ya Banki Nkuru, ashobora no guhinduka, kandi hakitabwa ku mabwiriza y’isuku no guhana intera hagati y’abantu babiri.

Abaturage mu gihirahiro

Akenshi iyo abantu bagumye mu ngo gutya, ni igihe bagerageza gushaka uko birengagiza ibihe barimo, bamwe bakegura mudasobwa zabo, bagacana televiziyo, abandi bakabona umwanya wo kuvugisha bagenzi babo badaherukanye, haba mu buryo bw’amajwi cyangwa amashusho.

Muri iki gihe muri UAE biragoye kuko serivisi zimwe zarafunzwe nka Facetime, WhatsApp na Skype isanzwe idashobora guhamagara byaba mu buryo bw’amajwi cyangwa amashusho, ku buryo bibasaba gukoresha uburyo butwara amafaranga, bw’ibigo by’itumanaho nka Etisalat na Du.

Ku wa Kabiri nibwo Guverinoma yoroheje amabwiriza mo gake ifungura imiyoboro ibiri ifasha mu kuvugana n’abandi, hatangirirwa ku ikoreshwa mu bucuruzi irimo Skype for Business na Google Hangouts.

Ubu abenshi barimo gukoresha uburyo bwo guhamagarana abantu barebana buzwi nka Zoom, burimo kwifashishwa na miliyoni z’abakozi muri iki gihe bategetswe gukorera mu rugo, abarimu bakigishiriza kuri internet, inshuti n’abavandimwe bakavuganiraho kuko badashobora guhura amaso ku maso.

Umuturirwa wa Burj Khalifa uriho ubutumwa busaba abantu kuguma mu rugo
Dubai mu ijoro nta ngendo zirimo gukorwa
Inzego z'ubuzima zirimo gutera imiti hanze y'inyubako
Imodoka zabigenewe hamwe na drones birimo gukoreshwa mu gutera imiti
Imodoka nini zirimo kwifashishwa mu gutera imiti ku nyubako
Hanze y'inyubako harimo guterwa imiti nijoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .