‘Kudakuraho sitati y’ubuhunzi ku banyarwanda sibyo twari twiteze kuri Uganda’

Yanditswe na Habimana James
Kuya 21 Ugushyingo 2018 saa 09:52
Yasuwe :
0 0

Umuyobozi Ushinzwe Ibibazo by’Impunzi muri Minisiteri ishinzwe ibikorwa by’Ubutabazi, Rwahama Jean Claude, yavuze ko kuba Uganda ishaka gukuraho sitati y’ubuhunzi ku banyarwanda bahungiyeyo ari ikintu cyiza, cyane ko hatatekerezwaga ko byagera uyu munsi hari abanyarwanda b’impunzi bakiriyo.

Sitati y’ubuhunzi ku Banyarwanda bahunze kuva mu 1959 kugeza 1998 yarangiranye na tariki 31 Ukuboza 2017, icyo gihe gisiga Abanyarwanda bagera ku 16 000 bambuwe ubuhunzi.

Gusa aho kwifatanya n’abandi muri uyu mugambi, Uganda binyuze ku Umunyamabanga wa Leta Ushinzwe kurwanya Ibiza no kwita ku mpunzi, Musa Ecweru, muri Mutarama yabwiye itangazamakuru ko bidashoboka guhita bavanaho sitati y’ubuhunzi.

Ati “Byari kuba bisobanuye ko sitati y’ubuhunzi ivanweho iyo u Rwanda ruba rutagisigaranye impunzi n’imwe mu gihugu icyo aricyo cyose ku Isi. Bivuze ko zari kuba zatashye zose cyangwa izisigaye zigahabwa ubwenegihugu bw’ibihugu zirimo.”

Gusa mu cyumweru gishize Uganda yatangaje ko irimo kureba uko yavanaho sitati y’ubuhunzi ku banyarwanda 14000 bari muri iki gihugu, kuko ngo inzira zo kubabwira gutaha zisa nk’izananiranye.

Minisitiri Ushinzwe Ubutabazi no kurwanya Ibiza, Hillary Onek, yabwiye abadepite b’Inteko Ishinga amategeko y’Umuryango wa Afurika y’Iburasirazuba, EALA, ko hari kurebwa uko havanwaho sitati y’ubuhunzi, hagatangwa uburenganzira bwo kuba muri Uganda bw’igihe gito.

Yagize ati “Turi kureba uko twakorana n’Urwego rushinzwe abinjira n’abasohoka kugira ngo kuguma muri Uganda kwabo kugengwe n’amategeko y’abinjira n’abasohoka, ateganya ko uhabwa viza yo kuguma mu gihugu amezi atatu. Nyuma y’icyo gihe usabwa gusobanura impamvu ushaka kuguma mu gihugu.”

Mu kiganiro cyihariye na IGIHE, Rwahama yavuze ko bishimishije ndetse nta kintu cyagombye kubuza Abanyarwanda gutahuka.

Ati “Igihugu cya Uganda ni igihugu duturanye, ni igihugu dusangiye byinshi, ni igihugu twanaganiriye muri iyi gahunda yo kurangiza sitati y’ubuhunzi ku mpunzi z’abanyarwanda, ni kimwe mu bihugu leta y’u Rwanda yagiye ijyamo gushishikariza impunzi gutahuka haba gukoresha Ambasade yacu iri hariya, ikindi nakubwira ni uko abadipolomate bacu bagiye basura impunzi zitandukanye bazigezaho amakuru y’igihugu cyabo.”

“Ubundi twumvaga Uganda ari kimwe mu bihugu bizakuraho sitati y’ubuhunzi ku banyarwanda, gusa siko byagenze muri icyo gihe twari tubitegereje. Kuba bateye iyo ntambwe navuga ko ari ibintu byiza bishimishije, nta mpamvu ihari yatuma abanyarwanda aho bari hirya no hino bakomeza kwitwa impunzi kuko mu Rwanda ni amahoro.”

Rwahama avuga ko iki cyemezo nikiramuka gishyizwe mu bikorwa, aba mbere kizagirira inyungu ari abo banyarwanda bari muri ubwo buzima bw’impunzi.

Ati “Ntekereza ko bizatuma izi mpuzi nizitaha zizisanzura kuko muzi ko abaturage bo muri ibi bihugu bagirana urujya n’uruza bakoresheje irangamuntu, ku mpunzi ho ntabwo byashobokaga. Urumva ko kuvanaho sitati y’ubuhunzi kuri abo bantu bizabafasha nabo kujya muri icyo cyiciro cy’abantu bafite uburenganzira bwo kugenda.”

Rwahama avuga ko u Rwanda ruhora rwiteguye kwakira abaturage barwo, ku buryo n’abazava muri Uganda bazakirwa nk’abana b’u Rwanda.

Ati “Ariko urumva ko bitazaba byagenze neza aho bazaba baturutse, muzi ko iyo umuntu abyutse mu gitondo akavuga ati sinkushaka ku butaka bwanjye, ntabwo ugira igihe cyo kwitegura cyangwa kuba wagira ibyo utwara nk’imitungo cyane cyane itimukanwa. Bashobora kukubwira bati iyo mitungo yisige, icyo tudashaka ni wowe.”

Avuga ko mu gihe cyashize abanyarwanda bagiye babwirwa gutahuka biciye mu bitangazamakuru bitandukanye, bityo kuba barimo kuvanirwaho sitati bari basanzwe barahawe umuburo.

Minisiteri y’Ubutabazi ivuga ko kuva hakurwaho sitati y’ubuhunzi, u Rwanda rumaze kwakira abanyarwanda barenga ibihumbi 15.

Ibihugu byari bicumbikiye impunzi nyinshi z’Abanyarwanda nka Congo Brazaville, Zambia, Mozambique n’ibindi, byamaze gushyira mu bikorwa umwanzuro wo gukuraho sitati y’ubuhunzi ndetse Abanyarwanda bakomeje gushakisha uburyo bwatuma bubahiriza amategeko.

Iyo impunzi ikuriweho sitati bisobanuye ko iba ikuriweho imfashanyo yahabwaga, ikamburwa uburenganzira nk’impunzi ndetse ibihugu biyicumbikiye bigasigarana uburenganzira bwo kuyifata nk’umwimukira utemewe n’amategeko.

Bamwe mu mpunzi z'Abanyarwanda muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza