00:00:00 IGIHE NETWORK KN KINYARWANDA EN ENGLISH FR FRANCAIS

Kubera iki icyemezo cy’ubuhuza kidashyirwaho kashe mpuruza?

Yanditswe na Kanamugire Emmanuel
Kuya 25 Ugushyingo 2022 saa 09:45
Yasuwe :

Guverinoma y’u Rwanda n’abafatanyabikorwa bayo batangije uburyo bwo gukemura amakimbirane binyuze mu buhuza hagamijwe gufasha abakeneye kubona ubutabera budasiga inzigo mu muryango nyarwanda.

Gahunda y’imyaka irindwi yo kwihutisha iterambere, NST1, igena ko ibijyanye n’ubuhuza bishyirwa mu mategeko mu rwego rwo gukemura ibibazo bitabaye ngombwa ko ababifitanye babanza gusiragira mu nkiko.

Muri Nzeri uyu mwaka Inama y’Abaminisitiri yemeje politiki yo gukemura ibibazo bitabanje kujya mu nkiko cyane ko atari ibintu bishya mu muco w’u Rwanda nk’uko Umuyobozi Mukuru ushinzwe guhuza ibikorwa by’Ubutabera muri Minisiteri y’Ubutabera, Nabahire Anastase, yabigarutseho kuri uyu wa Gatanu tariki 25 Ugushyingo 2022.

Nabahire yari yitabiriye ibiganiro byateguwe na Transparency International, ishami ry’u Rwanda hagaragazwa ibyakozwe mu mushinga wo gukemura amakimbirane binyuze mu bwumvikane, byabereye mu Mujyi wa Kigali.

Yagize ati “Ubuhuza burakenewe cyane kuko atari ikintu duhimbye cyangwa dukuye ahandi. Guhuza abantu, kubaka amahoro mu gihugu, ku musozi aho abantu batuye ni umuco nyarwanda.”

“Guverinoma iri kubyubakiraho ngo Abanyarwanda bagaruke ku kabo keza ko kumva ko turemye mu buryo bunyuranye, twibuka ko tutari abamalayika ko ari wowe uyu munsi, ejo undi twese dushobora gukosa kandi ukosheje bitaremereye ataba aciye inka amabere, bikwiye kujya hagati y’abantu bagasasa inzobe, bagaca urubanza kandi ntibubake amakimbirane arambye n’inzigo.”

Inkiko Gacaca ni imwe muri gahunda yagereranywa n’ubuhuza yatanze umusanzu mu gukemura mu gihe gito bimwe mu bibazo biremereye u Rwanda rwari rufite nyuma ya Jenoside yakorewe Abatutsi.

Hari kandi urwego rw’Abunzi na rwo rufasha mu kumvikanisha abaturage bafitanye ibibazo mbere yo kugana inkiko aho batakaza amafaranga arimo ay’ingendo n’amagarama y’urubanza ndetse igihe bagombye kuba bakora ibindi bikorwa bibubaka bakakimara mu manza.

Umuyobozi Nshingwabikorwa wa Transparency Rwanda, Mupiganyi Appolinaire, yavuze ko mu bushakashatsi uyu muryango wakoze harebwa uko inzego zikoresha ubundi buryo bushoboka kurusha gufunga abakurikiranyweho ibyaha wasanze gereza zo mu Rwanda zirimo abafungwa benshi barenze n’ubushobozi bwazo.

Ugukemura ibibazo binyuze mu buhuza ngo byafasha mu gukemura ibyo bibazo by’ubucucike mu magereza nk’uko Mupiganyi yabivuze.

Ati “Ni koko iyo hitabajwe inkiko hari utsinda n’utsindwa ariko birangira bitandukanyije umuryango nyarwanda. Iyo habayeho gukururana bituma na rwa ruhande rwashakaga ubutabera rubihomberamo kandi n’ubundi ubutabera umuntu yabubona binyuze mu buhuza kandi bikagabanya n’ikiguzi ndetse n’akazi kakorwaga n’inzego zibishinzwe.”

Umuyobozi Mukuru ushinzwe guhuza ibikorwa by’Ubutabera muri Minisiteri y’Ubutabera, Nabahire Anastase

Kashe mpuruza ku cyemezo cy’ubuhuza

Nubwo inzego zishishikarizwa kuyoboka uburyo bwo gukemura amakimbirane binyuze mu buhuza, kugeza ubu icyemezo cy’ubuhuza ntibiremerwa ko gishyirwaho kashe mpuruza nk’ikimenyetso cy’uko uwaburanaga agize uburenganzira busesuye ku kiburanwa.

Nabahire yasobanuye ko biterwa n’imiterere y’ayo masezerano n’aho yakorewe.

Ati “Kugeza ubu ntibirahabwa umurongo wo gushyirwaho kashe mpuruza kubera ko icyo cyemezo kiba ari amasezerano mbonezamubano hagati y’abantu babiri.”

“Iyo cyakozwe n’umukozi wa leta bwo hahita hajyaho kashe. Nk’ubu ubuhuza buba mu bibazo by’ubucuruzi kuko biba byakozwe n’umukozi wa leta wemerewe no gukoresha iyo kashe. Ariko ubundi mu buhuza hanze y’urukiko nta wagufatiye icyemezo ahubwo gifatwa na babiri bafitanye ikibazo kubera ko bagize ibyo biyemeza kandi bakubakira ku kuri buri wese abona muri mugenzi we.”

Nabahire yakomeje avuga ko n’ubundi impamvu abantu baba bashaka kashe ari uko baba batizeranye ariko ayo masezerano aba ashingiye ku bupfura n’icyizere buri muntu yagiriye mugenzi we.

Yavuze ko hashize imyaka ine hasinywe amasezerano mpuzamahanga yemerejwe Singapore agena ko impaka zose zikemuwe mu rwego rw’ubuhuza n’ubwunzi mu by’ubucuruzi zishyirwaho ikimenyetso cyo guhita zishyirwa mu bikorwa nta zindi ngorane bikaba bishobora kugira impinduka bizana ku rwego rw’u Rwanda.

Ati “Ubwo isi yerekera ahongaho, dushobora no kuzareberaho tukavuga ngo ibibazo byanyujijwe mu buhuza ino bishobora guhabwa umurongo w’uko nta wushobora kubigarukaho.”

Uhereye mu 2009, Transparency International Rwanda yakira ibibazo by’abaturage bagizweho ingaruka na ruswa n’akarengane ikabakorera ubuvugizi ndetse ikanabaha ubujyanama mu by’amategeko. Ibi bikorwa binyuze mu mushinga w’ubuvugizi n’ubujyanama mu by’amategeko ’ALACs (Advocacy and Legal Advice Centers).

Muri uyu mwaka TI Rwanda yakiriye ibibazo 4084 byatanzwe n’abaturage 1880 aho 97% byakemuye mu gihe 3% bigikurikiranwa. Ibyakemuwe binyuze mu buhuza bigera kuri 228 bihwanye na 6%.

TI Rwanda kandi yatangiye igeragezwa ry’umushinga wo gukemura amakimbirane binyuze mu buhuza mu turere 10 turimo Kicukiro, Gasabo, Ruhango, Nyanza, Kayonza, Ngoma, Musanze, Gakenke, NYamasheke na Kayonza nk’uko byavuzwe na MUkarukundo Odette uhagarariye uwo mushinga.

Bamwe mu bitabiriye ibiganiro byateguwe na Transparency International Rwanda, hagaragazwa ibyakozwe mu mushinga wo gukemura amakimbirane binyuze mu bwumvikane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .