Kirehe: Gitifu w’Umurenge aratungwa agatoki guha amafaranga ya VUP abantu ba baringa

Yanditswe na Hakizimana Jean Paul
Kuya 10 Nzeri 2020 saa 07:27
Yasuwe :
0 0

Umunyamabanga Nshingwabikorwa w’Umurenge wa Kigina, Kabandana Patrick, aratungwa agatoki mu guhimba imyirondoro y’abaturage batazwi akabaha amafaranga yari agenewe abaturage batishoboye muri gahunda ya leta yo gutera inkunga abari mu cyiciro cya mbere n’icya kabiri cy’ubudehe kugira ngo biteze imbere.

Iyo nkunga ingana n’ibihumbi 100Frw bihabwa abaturage batishoboye mu gihe bagaragaje imishinga bagiye kuyakoresha, ubusanzwe aba baturage batoranywa na komite ngishwanama ku iterambere ibarizwa ku Kagari ariko muri uyu Murenge siko byagenze.

Hahimbwe imyirondoro ya bamwe mu baturage batazwi bahabwa amafaranga yari agenewe abatishoboye nyamara bataba muri uyu Murenge, hari kandi bamwe mu barimu bagiye bongerwa ku ntonde nyamara batabyemerewe.

Raporo IGIHE ifitiye kopi yakozwe tariki ya 4 Werurwe 2020 igakorwa n’abakozi b’Akarere ka Kirehe bashinzwe VUP, igakorerwa mu Murenge wa Kigina igashyikirizwa umuyobozi w’Akarere, igaragaza ko gutanga iyi nkunga muri uyu Murenge byagiye bihera ku Murenge aho kuba ku Kagari muri komite ngishwanama ku iterambere.

Ikomeza igaragaza ko mu tugari tune aritwo; Gitarama, Rugarama, Rwanteru na Ruhanga, nibura Akagari kamwe ari ko komite ngishwanama ku iterambere yagize uruhare mu gutoranya abahabwa iyi nkunga ahandi hose ngo byagiye bikorerwa ku Murenge, abakozi bo ku Murenge bakagaragaza ko byakorwaga n’Umunyamabanga Nshingwabikorwa wenyine ariwe Kabandana Patrick.

Muri iyi raporo bagaragaza ko nko mu Kagari ka Ruhanga abaturage 85 bahawe inkunga ingana na 8 500 000 Frw hakiyongeraho miliyoni 2 400 000 Frw yahawe itsinda, mu gukurikirana ngo babajije abayobozi b’imidugudu basanga abahawe amafaranga batazwi.

Bagaragaje bimwe mu bibazo biteye impungenge birimo ; gutanga inguzanyo bitubahirije amabwiriza abigenga, guha abantu inguzanyo batabanje kuzigaho ngo bikorerwe ku Kagari, kuba haratanzwe inguzanyo zingana na miliyoni 35 800 000 Frw mu buryo butubahirije amabwiriza no kuba amafaranga yatanzwe atazakoreshwa icyo yakiwe.

Bamwe mu bahawe aya mafaranga batayakwiriye IGIHE yamenye harimo abarimu n’abandi baturage bavuka muri uyu Murenge ariko bagiye batuye mu tundi turere nka Bugesera na Nyagatare, aho bashyizwe kuri uru rutonde nyamara batabarizwa muri uyu Murenge.

Umuyobozi w’Umudugudu wa Nyakarambi II uherereye mu Kagari ka Ruhanga Byimana François, yabwiye IGIHE ko mu mudugudu ayobora hari abantu babiri ba baringa bahawe amafaranga nyuma bakabashakisha bakababura, yavuze ko mu kwandika abaturage bahabwaga aya amafaranga nta ruhare babigizemo ari naho havuye kuyaha n’abandi baturage bishoboye batari bayakwiriye.

Umuyobozi w’Umudugudu wa Bugarura uherereye mu Kagari ka Rwanteru Kabera Edouard we yabwiye IGIHE ko nabo batunguwe nuko hari abaturage bagiye bashyirwa ku rutonde rwo mu Mudugudu wabo nyamara batahatuye, urugero ngo ni Mukashyaka Clenie usigaye utuye mu Bugesera.

Umunyamabanga Nshingwabikorwa w’Umurenge wa Kigina Kabandana Patrick we yabwiye IGIHE ko ibyo abo bayobozi bamushinja ari ibinyoma ngo kuko mu mpera z’Ukwakira 2019 mbere yuko hatangwa amafaranga, bakoze inama y’umutekano buri muyobozi w’Umudugudu agahabwa urutonde rw’abaturage batoranyijwe mu Mudugudu we kugira ngo arebe neza niba ntawe bibeshyeho.

Yavuze ko ibyo kuvuga ko hari abaturage yagiye yongeramo ari ukumubeshyera ngo kuko ibyakozwe byose byabaye akiri mushya aribwo akigera muri uyu Murenge.

Umuyobozi w’Akarere ka Kirehe Muzungu Gerard yemereye IGIHE ko hari amakosa yabaye mu gutanga iyi nkunga ya VUP muri uyu Murenge ndetse anahamya ko uyu Munyamabanga Nshingwabikorwa benda kumuhanira amakosa yakoze.

Yagize ati “Ubwo bugenzuzi nitwe twabukoze ntabwo hari umuntu yashyizemo nyuma, babikoreye hamwe mu nama batubahirije inzira zisabwa, yabikoranye n’ikipe bafatanya turabimubaza nawe arabyemera, ni amakosa yakoze kubera kutabimenyera ariko biri mu nzira bijyanye n’amategeko no gukurikirana kugira ngo abibazwe abihanirwe.”

Meya Muzungu yavuze ko abantu bahawe amafaranga batabikwiriye bagomba kuyagaruza ndetse ngo bamaze no kubibasaba. Ku kijyanye nuko hashize amezi atandatu iyo raporo ikozwe kandi hakaba ntakirakorwa yavuze ko uyu muyobozi yandikiwe ( Gitifu w’Umurenge) asabwa ibisobanuro agasubiza bakaba bari mu nzira zo kugira icyo babikoraho.

Mu Murenge wa Kigina hatanzwe inguzanyo ya VUP mu byiciro bibiri mu mwaka wa 2019/2020 icyiciro cya mbere inkunga yahawe abaturage 428 naho icyiciro cya kabiri hahabwa abaturage 320 bose hamwe baba 748 n’amatsinda abiri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .