KIM University yafunze imiryango kubera ibibazo by’amikoro

Yanditswe na Iradukunda Serge
Kuya 4 Ugushyingo 2020 saa 10:09
Yasuwe :
0 0

Ubuyobozi bwa KIM University, bwatangaje ko iyi kaminuza yafunze imiryango kubera ibibazo by’amikoro, isaba abanyeshuri bayigagamo kujya aho ikorera bagahabwa ibyangombwa byatuma bajya mu zindi kaminuza.

Uyu mwanzuro wafashwe nyuma y’ibibazo by’ubukungu iyi kaminuza yahuye nabyo byatewe n’ukugabanuka k’umubare w’abanyeshuri, ibintu byatangiye mu 2016.

Umwe mu bayobozi bayo yabwiye IGIHE ati “Tubikoze kugira ngo tureke gukomeza gutesha igihe abanyeshuri bategereje kandi tubona bitari mu nzira yo gukemuka vuba (ibibazo by’amikoro).”

Uyu muyobozi yakomeje avuga ko iyi Kaminuza idafunze burundu. Ati “Izina rya KIM ryo riracyahari, ndacyeka mutigeze mwumva guverinoma ibitangaza ko yafunzwe, tubikoze kugira ngo tureke gukomeza gutesha igihe abanyeshuri bategereje kandi tubona bitari mu nzira yo gukemuka vuba.”

Iyi kaminuza ifashe uyu mwanzuro mu gihe yari imaze igihe ivugwamo ibibazo by’amikoro ahanini byatewe n’uko umubare w’abanyeshuri wagiye ugabanuka, kubera ko abanyeshuri bamwe baburaga amafaranga y’ishuri bigatuma bahagarika amasomo yabo.

Muri Mata uyu mwaka byari byagiye binugwanugwa ko iyi kaminuza ishobora gufungwa cyangwa igatezwa cyamunara ariko abayobozi bayo baza kubihakana bavuga ko ibibazo bafite bigenda bikemuka.

Intandaro y’ibibazo by’ubukungu KIM irimo

Kuva mu 2016 iyi kaminuza yagize ikibazo cy’ubukungu biturutse ku mubare w’abanyeshuri wagiye ugabanuka, bitewe n’uko abanyeshuri bamwe baburaga amafaranga y’ishuri bigatuma bahagarika amasomo yabo.

Mu bahagarikaga amashuri muri ubwo buryo, hari abagendaga batishyuye ndetse bamwe kugeza n’uyu munsi bakaba bagifitiye amadeni iyi kaminuza.

KIM yasobanuye ko ibyo byateje ibibazo bikomeye bigera no mu kwishyura imishahara y’abakozi, ariko abayobozi bayo bakagerageza kwishyura ibirarane mu mafaranga abonetse yose.

Iyi kaminuza ivuga ko hari n’ideni rya banki yafashe mu 2016 yubaka andi amashuri kuko ayari asanzwe yari make, bituma abanyeshuri batiga neza. Ibibazo byiyongereye ubwo yazaga kubura uwayishinze, Peter Rutaremara, witabye Imana muri Mata 2019 kandi yari afite uruhare runini cyane muri iyi kaminuza.

Muri Mata 2020 umwe mu bashinze iyi Kaminuza, Rachel Kayisengerwa, yari yagaragaje ko hari icyizere cy’uko ibibazo barimo bizakemuka vuba afatanyije n’inama y’ubutegetsi ya KIM.

Yavuze ko bari bafite gahunda yo gukemura iki kibazo, ariko byabaye ngombwa ko bayisubika kubera icyorezo cya Coronavirus, yizeza ko iki cyorezo nigihagarara bazasubukura gahunda zose basubitse mu rwego rwo kwirinda.

KIM University ikorera mu Mujyi wa Kigali mu karere ka Kicukiro mu Murenge wa Nyarugunga. Yashinzwe muri 2006 yitwa Kigali Institute of Management, iza guhindura izina muri 2015 yitwa KIM University.

Ni yo yatangije mu Rwanda amasomo y’ibaruramari n’icungamutungo (CAT na CPA), ubu abamaze kurangiza ayo masomo y’umwuga muri KIM barenga 300.

Iyi Kaminuza kandi itanga amasomo y’icyiciro cya kabiri mu micungire y’ubucuruzi (Bachelor’s degree in Business Management), ubukungu (Economics), Ubumenyi mu bya mudasobwa (Computer Science), gucunga ibikorwa no kubikwirakwiza (Bachelor of Logistics and Supply Chain Management) n’amasomo y’icyiciro cya gatatu cya kaminuza mu micungire y’ubucuruzi (Masters in Business Administration, MBA).

KIM Univeristy yabaye ifunze imiryango kubera ibibazo by'amikoro
KIM Univeristy yabaye ifunze imiryango kubera ibibazo by'amikoro

Inkuru irambuye ni mukanya...


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .