Kigali: Umugabo afunzwe akekwaho gukoresha inyandiko mpimbano akiba uruganda amabati ya miliyoni 29 Frw

Yanditswe na IGIHE
Kuya 21 Ukwakira 2020 saa 11:40
Yasuwe :
0 0

Urwego rw’Ubugenzacyaha rwatangaje ko rwataye muri yombi umugabo witwa Ntitenguha Arnaud, ukurikiranweho gukoresha inyandiko mpimbano akiba amabati afite agaciro ka 29.000.000 Frw mu ruganda rwitwa TEMBO ruherereye i Gahanga mu Karere ka Kicukiro.

Mu butumwa yatangaje kuri uyu wa Gatatu, RIB yagize iti “Amabati yafatiwe aho yari yagiye kuyahisha mu Karere ka Nyanza. Iperereza rirakomeje kugira ngo hamenyekane n’abandi bagize uruhare muri ubu bujura, hanakorwe dosiye ishyikirizwe Ubushinjacyaha.”

Afungiye kuri Station ya RIB ya Kicukiro, aramutse ahamwe n’icyaha yahanishwa ingingo ya 276 y’itegeko riteganya ibyaha n’ibihano cy’igifungo kitari munsi y’imyaka itanu ariko kitarenze imyaka irindwi n’ihazabu itari munsi ya miliyoni eshatu ariko zitarenze eshanu.

Umuvugizi wa RIB, Dr Murangira B. Thierry yabwiye IGIHE ko uru rwego rutazigera rwihanganira umuntu uwo ariwe wese wishora mu byaha.

Ati “RIB iragira inama abantu bose baba bari mu bikorwa biganisha ku gukora icyaha, ko izo nzira bazivamo, ntabwo izihanganira uwo ariwe wese uzishora mu byaha. Ubumenyi n’ubufatanye burahari mu kurwanya byaha”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .