00:00:00 IGIHE NETWORK KN KINYARWANDA EN ENGLISH FR FRANCAIS

Kigali: GS Kagugu yahakanye amakuru y’uko hari umunyeshuri wayo wahindutse inzoka (Video)

Yanditswe na Ntabareshya Jean de Dieu
Kuya 28 Ukwakira 2022 saa 07:00
Yasuwe :

Urujijo ni rwose ku babyeyi n’abarerera mu Rwunge rw’amashuri rwa Kagugu ruherereye mu Mujyi wa Kigali, aho bivugwa ko hari umwe mu banyeshuri wiga muri iki kigo wahindutse inzoka.

Iyi nkuru yatangiye gukwirakwira hose ahagana Saa Sita zo kuri uyu wa Kane, gusa aya makuru yageze hanze bitinze kuko byabanje kuvugwa mu bwiru birangira biteje impagarara kubera ko ababyeyi na bamwe mu banyeshuri bahisemo kuzenguruka uruzitiro rw’ishuri basaba ko abana babo bacyurwa mu rugo.

Nyuma yo kubona ko ababyeyi bakamejeje bashaka kwinjira muri iki kigo cy’ishuri ngo babaze abayobozi bacyo niba abana babo bameze neza cyangwa bari mu bagize ikibazo, kuri iri shuri hahise hahurira inzego zitandukanye zirimo iz’umutekano n’ubuyobozi bw’inzego z’ibanze.

Bamwe mu baturage n’abanyeshuri baganiriye na IGIHE bagaragaje ko muri iki kigo habayemo ibintu bidasanzwe ngo kuko umwana yahindukaga ikindi kiremwa ari nabyo byateje impagarara ku bana.

Umunyeshuri wiga mu mwaka uyu mwana bivugwa ko yahindukaga yigamo yavuze ko impinduka zatangiye kugaragara kuri uwo mwana ku munsi w’ejo hashize nyuma gato y’imvura yaguye ku mugoroba.

Ati “Ubundi ejo ni mugoroba nibwo byatangiye kuko twagiye kubona tubona yahindutse akajya atubwira ko imvura iri kugwa ngo yatwaye imva ya papa we. Mu gitondo yaje ariko atavuga ndetse biza kurangira tutamenye uko bigenze akajya ahinduka.”

Yavuze ko hazanywe n’abanyamasengesho ngo basengere uwo mwana ariko ngo ubwo bamusengeraga yahindukaga ikindi kintu ku bw’amahirwe aza gukira ndetse asubizwa mu rugo.

Aba banyeshuri bahishuye ko ubwo uyu mwana yashyikirizwaga umubyeyi we babakoranyirije hamwe ndetse ubuyobozi bw’ishuri bubihaniza ko nta n’umwe ukwiye guhingutsa amakuru y’uko mu kigo hari abazimu bateye abana.

Bamwe mu bize igitondo babashije gusohoka gusa bagenzi babo ntibatahiye igihe kubera ko ababyeyi babaye nk’abakora imyigaragambyo mu marembo y’ikigo.

Abaganiriye na IGIHE bagaragazaga ko bakeneye ko babaha abana babo bari mu kigo cy’ishuri kuko ngo umutekano wabo utizewe nyuma y’ibyavuzwe ko byabereyemo.

Ati “Nagiye kubona abandi banyeshuri banzaniye agakapu karimo ibikoresho by’umwana bambwira ko bamubuze rero nashakaga kumenya niba koko ahari kuko atigeze ataha nk’abandi.”

Umuyobozi w’Urwunge rw’amashuri rwa Kagugu, Padiri Jean Bosco Bizumuremyi, we yemeza ko ibiri kuvugwa ari ibihuha, asaba ababyeyi kugira ihumure.

Yagize ati “Muri iki kigo nyoboye, hadutse ikintu cy’igihuha kidafite ishingiro, kivuga y’uko harimo umuzimu. Urumva nyine ishuri rifite abana basaga 7000, iyo hari abumvise ikintu nk’icyo, biroroshye kugikwirakwiza, bamwe bakaba bakizamura cyane. Byabaye mu masaha yo gutaha, abana bamaze gufungura, batashye nyine bagenda bakwiza icyo kintu ariko mu by’ukuri nta kibazo cyabaye.”

Nubwo bimeze bityo ariko mu kigo hari hatuje ndetse n’abana bakomeje amasomo kuko nta muntu watambaga hanze ahubwo inyuma y’uruzitiro niho byari byakomereye.

Bamwe mu babyeyi bakomeje kwitonganya hanze y’uruzitiro rw’ishuri bavuga ko abana babo ni basohokamo amahoro bizagorana kubasubizayo.

Abantu benshi bari baje gushungera
Abamotari nabo bari baje gushungera
Gs Kagugu yahakanye amakuru y’uko hari umunyeshuri wayo wahindutse inzoka
Ibyabaye byateye benshi kwibaza byinshi
Mu kigo hari umutuzo abana bakomeje n'amasomo
Umuyobozi w’Urwunge rw’amashuri rwa Kagugu, Padiri Jean Bosco Bizumuremyi yavuze ko ibivugwa ari ibihuha

Amafoto na Video: Ntabareshya Jean de Dieu


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .