Kigali: Batangiye kugoboka bagenzi babo barya ari uko bakoze mu gukomeza kwirinda Coronavirus

Yanditswe na Twarabanye Venuste
Kuya 28 Werurwe 2020 saa 12:49
Yasuwe :
0 0

Imwe mu miryango itari iya leta, abantu ku giti cyabo n’imidugudu itandukanye, batangiye kwegeranya ubushobozi no gushyikiriza ibiribwa ab’amikoro make bari kubura amafunguro kubera ko batakibasha gukora biturutse ku kubahiriza ingamba zo kurwanya Coronavirus.

Abaturage bakomeje kubahiriza ingamba zo kwirinda Coronavirus, ndetse kuri uyu wa Gatandatu Leta yatangiye gufasha abadafite uburyo bwo kubona ibibatunga mu gihe batakoze.

Minisitiri w’Ubutegetsi bw’Igihugu, Prof. Shyaka Anastase, yavuze ko ibi biribwa bigomba gutangwa na komite ziri ku Mudugudu no ku Kagali; iz’umurenge zikazunganira.

Yakomeje ati “Abaturage bashaka ubwabo kugoboka abandi, barabimenyesha ubuyobozi bw’ibanze bubegereye kugira ngo twirinde akajagari n’akavuyo! Za komite zavuzwe ni zo zibigeza ku bo bigenewe.”

Ku rundi ruhande, hari abatangiye gushyira mu bikorwa uburyo bwo kugoboka imiryango y’abo bantu barya ari uko bakoze ku munsi; harimo imiryango itari iya leta n’abantu ku giti cyabo.

Imwe mu Midugudu yamaze gukusanya imibare y’abakeneye ubufasha, kurusha abandi ari nako abayituye bishakamo ubushobozi bwo kuba bayigobotse. Umudugudu w’Umurava mu Kagali ka Ruhango mu Murenge wa Gisozi mu Karere ka Gasabo, ni umwe mu yatangarije IGIHE ko yatangiye icyo gikorwa.

Umuyobozi w’uwo Mudugudu, Kamufozi Charlotte yavuze ko hari abari barahashye byinshi n’abacuruzi batanze ibiribwa, abandi batanga amafaranga ariko n’ubundi byose bigakorwa hakurikijwe ingamba zo kwirinda.

Yavuze ko muri uwo Mudugudu babaruye abakeneye kunganirwa mu buryo bwihutirwa bagera ku miryango 25 nubwo mu minsi iri imbere icyorezo kitarangiye vuba hari abandi bazagera muri icyo cyiciro.

Ati “Twahereye cyane cyane kuri babandi bakeneye ubufasha bwihutirwa, hari nk’abantu usanga umugabo yari umupagasi cyangwa se yari umukarani, bari abayede [...] hari aho ugera ugasanga bimeze nabi cyane. Hari abagikanyakanya nibyo wenda bagifite bikeya bari bafite ariko hari na babandi badafite na gatoya.”

Uretse inzego z’ibanze hari imiryango itari iya leta yatangiye gushyikiriza ibiribwa imwe mu miryango ikeneye ubufasha kurusha indi mu rwego rwo kuyifasha kubahiriza ingamba zo kwirinda coronavirus baguma mu ngo zabo.

Umuryango Hagari-Rwanda uzwi mu bikorwa byo kwita ku bahoze bakora uburaya n’abana babo babafasha mu myigire, washyikirije iyo miryango ibiribwa n’indi itishoboye y’aho ukorera.

Umuyobozi w’uwo muryango, Godfrey Rutagengwa, yavuze ko basanze bakwiye gufasha iyo miryango kubona ibyo kurya kugira ngo ibashe kubahiriza ingamba zo kwirinda coronavirus iguma mu ngo.

Ati “Turabashishikariza gukurikiza amabwiriza ya Minisiteri y’Ubuzima turabasaba ngo bagume mu ngo zabo […] kugira ngo iki cyorezo kibashe gucika vuba hashoboka.”

Uyu muryango uri gutanga ibiribwa ku miryango 71 usanzwe ufasha ndetse n’indi miryango 10 y’aho ukorera. Rutagengwa yabwiye IGIHE ko bafite ibiribwa bizagera ku miryango 85 bikazatwara miliyoni ebyiri n’ibihumbi 685 by’amafaranga y’u Rwanda .

Buri muryango uhabwa ibiro 25 by’akawunga cyangwa umuceri, ibiro 10 by’ibishyimbo na litiro ebyiri z’amavuta.

Umwe mu baturage bahawe ibiribwa, yashimiye abagiraneza kuko yari asanzwe akora ibiraka byo guhinga, kuvoma no kumesa imyenda kugira ngo abashe gutunga abana icyenda arera ariko ntibigishoboka kubera gahunda ya Guma mu rugo.

Ati “Nakoraga ibiraka ngahinga; umpaye icyo kuvoma, umpaye icyo gufura nkabikora ariko kugeza ubungubu twari turi mu rugo nta kintu. Byari byashize ngira ngo uyu munsi ntawari gukora ku munwa ni nk’Imana ikoresheje aba bantu.”

Abatangiye iki gikorwa bavuga ko atari ibintu bisaba ubushobozi buhambaye. Banamwana Hoffman Prince w’imyaka 26 wikorera usanzwe afite ikinamba, aherutse kunyuza ubutumwa kuri twitter avuga ko yiyemeje gutunga imiryango 25 y’aho atuye ayiha ifunguro ry’iminsi ibiri.

Uyu musore yabwiye IGIHE ko icyo gikorwa yagikoresheje 60 000 Frw.

Ati “Nemera ko mu bushobozi waba ufite ubwo aribwo bwose ushaka gufasha wafasha, ntabwo nabikoze nirengagije ko wenda nanjye bishobora kuzankomerera mu minsi iri imbere ariko tugomba kwizera ko imbere ari heza.”

Nyuma y’iminsi 14 Icyorezo cya Coronavirus kigaragaye mu Rwanda abacyanduye bamaze kugera kuri 54.

Buri muryango wahawe litiro ebyiri z'amavuta
Umuyobozi w’umuryango Hagari-Rwanda, Godfrey Rutagengwa
Umuyobozi w’Umudugudu w'Umurava, Kamufozi Charlotte avuga ko bishyize hamwe ngo bafashe bagenzi babo kuguma mu rugo bafite ibiribwa
Banamwana Hoffman Prince w’imyaka 26 wiyemeje gutanga ifunguro ry'iminsi ibiri ku miryango 25 itishoboye y'aho atuye
Hagari Rwanda yatanze ibiro 25 by'akawunga ku muryango umwe
Imiryango yafashijwe yishimiye ko igiye kuguma mu ngo ifite icyo kurya
Rutagengwa yabwiye IGIHE ko bafite ibiribwa bizagera ku miryango 85 bikazatwara miliyoni ebyiri n’ibihumbi 685 by’amafaranga y’u Rwanda.
Agafuka k'ibiro 10 by'ibishyimbo buri muryango wahabwaga

Amafoto: Muhizi Serge&Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .