00:00:00 IGIHE NETWORK KN KINYARWANDA EN ENGLISH FR FRANCAIS

Kigali: Baravuga imyato Ejo Heza yatumye bateganyiriza izabukuru

Yanditswe na Manzi Angelo
Kuya 7 Ugushyingo 2022 saa 02:49
Yasuwe :

Bamwe mu baturage bo mu Mujyi wa Kigali barishimira ko guverinoma y’u Rwanda ibinyujije mu kigo cy’igihugu cy’ubwiteganyirize (RSSB), yabafashije guteganyiriza izabukuruzabo binyuze muri Ejo Heza.

Ubwo hasozwaga icyumweru mpuzamahanga cyahariwe kwizigamira, ikigo cy’igihugu cy’ubwiteganyirize (RSSB) cyafashije abaturage kwiyandikisha, kwizigamira abandi bakareba ayo bamaze kwizigamira muri Ejo Heza.

Ejo Heza ni ubwizigame bw’igihe kirekire, bwashyizweho na Guverinoma y’u Rwanda, bufasha kwizigamira bityo ukagira amasaziro meza.

Aba baturage baganiye na IGIHE bishimira ko muri iki gihe hariho uburyo bwo guteganyiriza izabukuru binyuze muri Ejo Heza, bitandukanye n’uko byari byifashe mu myaka yo hambera.

Twahirwa Joachim utuye mu Karere ka Nyarugenge avuga ko Leta ntakibi yabazanira bityo, yatanze umusanzu kuri buri muntu wo muryango we kubera ko ntawe umenya ejo hazaza dore ko umuntu agera mu zabukuru atakibasha kwikorera.

Yagize ati “RSSB ihora ibidushishikariza ariko nyuze muri Car Free Zone mbona bari kwiyandikisha ari benshi mpitamo guhita mfatirana umwanya mbonye kuko nari narabuze umwanya kandi nkurikije uko bansobanuriye iyi gahunda, ntawumenya uko aramuka ariko Ejo Heza nizeye ko izamfasha kugira amasaziro meza.”

Umutoni Zawadi ufite imyaka 20 ati “Ndishimye cyane kuba nkanjye nk’urubyiruko ningera ku myaka 55, ubwizigame bwanjye muri Ejo Heza nzatangira kubuhabwa nka pansiyo ya buri kwezi. Turashima cyane iyi gahunda ya Leta ahubwo abandi ndabasaba kujya muri Ejo Heza”.

Umuyobozi Nshingwabikorwa w’Akarere ka Nyarugenge, Ngabonziza Emmy yavuze ko babona Ejo Heza nk’igisubizo cy’iterambere rirambye, rishingiye ku muturage.

Ati “Turimo turagenda tubona impinduka nyuma yuko abizigamiye muri Ejo Heza babona inyungu ya 10% buri mwaka usanga ari gipimo cyiza ugereranije n’ubundi bwishingizi.”

Umuyobozi Mukuru wa gahunda ya Ejo Heza, Gatera Augustin, yavuze ko ushaka kwiteganyiriza muri Ejo Heza nta kintu asabwa kandi abikora ku bushake bwe, akaba ashobora guhabwa ubwiteganyirize bwe igihe akiriho, ariko yanapfa abasigaye be bakagira ibyo bagenerwa.

Ati “Mu gihe yitabye Imana tukagoboka umuryango we ni ikintu gitanga icyizere ku banyamuryango bacu n’abandi bazaba abanyamuryango ejo, kumva ko ibyo Leta yiyemeza ibishyira mu bikorwa. Biraza gutuma bakomeza kwizigamira bagiremo amafaranga atubutse kugira ngo na ya ntego yuko abaturage bazagira amasaziro meza izagerweho.”

Kugeza ubu Abanyarwanda basaga Miliyoni ebyiri n’ibihumbi 100 bamaze gutanga imisanzu yo kwiteganyiriza muri Ejo Heza, bakaba bamaze gutanga imisanzu isaga Miliyari 36Frw kuva muri 2018 gahunda ya Ejo Heza yatangira.

EjoHeza yashyizweho na Leta y’u Rwanda binyuze muri Minisiteri y’Imari n’Igenamigambi, igenwa n’itegeko N° 29/2017 ryo kuwa 29 Kamena 2017. Ejo Heza ni ubwizigame bw’Igihe kirekire bukorwa ku bushake hafungurwa konti yo kuba umunyamuryango.

Twahirwa yasobanuriwe ibyiza bya Ejo Heza yiyemeza kuyijyamo
Gatera uyobora Ejo Heza yavuze ko kwiteganyiriza ari ubushake
Ngabonziza uyobora Akarere ka Nyarugenge yavuze ko Ejo Heza izafasha abaturage kugira amasaziro meza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .