Kigali: Bamwe mu bacuruzi bafatiwe ibihano kubera kuzamura ibiciro

Yanditswe na Iradukunda Serge
Kuya 19 Werurwe 2020 saa 04:54
Yasuwe :
0 0

Mu rwego rwo kurengera abaguzi, Minisiteri y’ubucuruzi n’inganda (MINICOM) yatangiye guca amande bamwe bacuruzi bihisha inyuma y’ibihe bidasanzwe by’icyorezo cya Coronavirus bakazamura ibiciro by’ibicuruzwa mu buryo bunyuranyije n’amategeko.

Ni ingamba ziri gufatwa mu igenzura riri gukorwa n’itsinda ririmo umunyamabanga uhoraho muri MINICOM, Michel Minega Sebera, aho riri gusura amasoko atandukanye yo mu Mujyi wa Kigali.

Muri iri genzura abacuruzi bari gusangwa baranyuranyije n’ibyo iyi Minisiteri iherutse gutangaza ko ntawukwiye kuririra ku bibazo igihugu kirimo kubera Coronavirus ngo azamure ibiciro, baracibwa amande ndetse bamwe bagahagarikirwa ubucuruzi bwabo by’agateganyo nk’uko amategeko abiteganya.

Umukozi ushinzwe itumanaho muri Minicom , Hakizimana Jean Claude yavuze ko uretse kuzamura ibiciro hari n’abari guhanwa bazira andi makosa.

Ayo makosa arimo no kutamanika ibiciro ahagaragara ku baguzi, gukoresha iminzani itujuje ubuziranenge no gutanga inyemezabwishyu zitajyanye n’ibiciro.

Yakomeje avuga ko hamaze guhanwa abacuruzi 24 kandi igenzura rikaba rikomeje. Ati “Kugeza ubu abamaze guhanwa ni ibigo 24 byaciwe amafaranga nk’uko amategeko abiteganya, kandi biracyakomeje kuko kugeza n’uyu munsi igenzura rirakomeje.”

Abaciwe amande ni abacuruzi basanzwe muri aya makosa barimo abakorera mu isoko rya Kimironko, Zinia n’irya Nyarugenge ndetse bahita basabwa kwishyura bitarenze iminsi irindwi.

Izi ngamba zije nyuma y’uko Ku wa 15 Werurwe, Minisitiri w’ubucuruzi n’inganda Soraya Hakuziyaremye yihanangirije abacuruzi bari batangiye kuzamura ibicuruzwa bitwaje Coronavirus.

Aganira na TVR, Minisitiri Soraya Hakuziyaremye yagize ati “Ibiciro by’ibiribwa by’ibanze ntibigomba guhinduka, ibyinshi nk’umuceri, ibirayi, imboga byose ni ibyo twihingira hano iwacu,…., Turasaba abafite amaduka, kuturiza ibiciro bitwaje iki cyorezo”

Yakomeje asaba abaturage gutanga amakuru aho babonye iki kibazo “turasaba abaturage ko mu gihe habaho ko abacuruzi runaka bazamura ibiciro bitwaje ibi bihe bidasanzwe, kwegera inzego z’ibanze, kuko dufatanyije nazo ndetse n’ikigo cy’Igihugu gifite mu nshingano kurengera umuguzi mu kurwanya ibi."

kuba umucuruzi atemerewe kuzamura ibiciro bigenwa n’Itegeko Nº 36/2012 ryo kuwa 21/09/2012 rigenga ihiganwa mu bucuruzi no kurengera abaguzi ndetse no mu ngingo yaryo ya 5, riSaba abacuruzi ku masoko n’amamurikagurisha kugaragariza ibiciro abaguzi.

Ibi bigakorwa bishyirwa ku gicuruzwa cyangwa ku ipaki igicuruzwa gifunzemo, ku cyapa kiri ku gicuruzwa cyangwa hafi yacyo, cyangwa ku cyapa kimwe rusange.

Abari gusangwa burije ibiciro bari gucibwa amande
Umunyamabanga Uhoraho muri Minicom, Michel Minega Sebera agenzura ibiciro muri rimwe mu masoko yasuwe
Iri tsinda ryasabye abacuruzi kwirinda kuzamura ibiciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza