Umugabo w’imyaka 32, ari mu maboko ya polisi akekwaho icyaha cyo gukwirakwiza amafaranga y’amiganano, afatirwa mu murenge wa Kinyinya ubarizwa mu karere ka Gasabo.

Inkuru yo ku rubuga rwa Polisi, ivuga ko uyu mugabo yafatiwe ahazwi nka Gacuriro ku wa 23 Ukuboza agafatanwa ibihumbi 17,000 by’amafaranga y’u Rwanda, agizwe n’inoti z’amafaranga 1000 ndetse n’iza 2000.

Umuvugizi wa Polici hagati mu gihugu, Spt Modeste Mbabazi, yavuze ko uyu mugabo yafashwe bitewe n’amakuru yatanzwe n’umwe mu batwara abagenzi kuri moto, wari wahawe imwe muri izo noti ziganwe.

Yakanguriye abaturage kuba maso, bakagenzura amafaranga ayo ariyo yose bahawe.

Uyu wafashwe, acumbikiwe kuri sitasiyo ya polisi i Remera ngo hakorwe iperereza ryimbitse.

Uyu musore nahamwa n’icyaha azahanwa hifashishijwe ingingo ya 604 mu gitabo cy’amategeko ahana y’u Rwanda, aho ashobora guhabwa igihano kuva ku myaka ibiri kugera kuri itanu n’ihazabu y’amafaranga akubye incuro 10 amafaranga yafatanwe.