Kigali: Abamotari bahawe umwambaro mushya uriho nimero ya moto n’iya nyirawo

Yanditswe na Baryaherezahe Léonce
Kuya 19 Nzeri 2019 saa 07:29
Yasuwe :
0 0

Ikigo cy’itumanaho Airtel Tigo Rwanda, ku bufatanye n”ikigo cy’ubwishingizi cya Prime Insurance na Polisi y’u Rwanda, batangije igikorwa cyo gutanga umwambaro mushya w’abamotari.

Umwambaro mushya watanzwe kuri uyu wa Kane utandukanye cyane n’uwari usanzwe kuko umushya ukozwe mu gitambaro gikomeye, ukozwe mu buryo bwa ‘gilet’, kandi unagaragaza nimero ya moto ya nyiri uwo mwambaro.

Ni nyuma y’uko hari hashize igihe hagaragara ibibazo bitandukanye birimo iby’imyambarire idahwitse ya bamwe mu batwara abagenzi kuri moto, umwanda ku bijyanye n’imyambarire, gutwara abagenzi basinze, ubujura n’ibindi.

Umuyobozi w’Ishami rya Polisi rishinzwe Umutekano wo mu Muhanda, CP Rafiki Mujiji, yashimiye abamotari ku bufatanye bwiza na Polisi y’u Rwanda mu kurwanya ibyaha, abasaba kwambara umwenda ubaranga no kwita ku isuku yawo, kuba inyangamugayo no kubikangurira bagenzi babo.

Yagize ati “Tumaze kubona abamotari umubare mwiza bubahiriza abanyamaguru, umuntu wese ubikora turamushimira kandi akomeze abyigishe n’abandi.”

Umuyobozi wa Airtel ushinzwe abakozi, Andry Henintsoa Ratsimbason, yishimiye ko bakomeje ubufatanye na FERWACOTAMO, bugamije kuzamura imibereho myiza y’Abanyarwanda muri rusange.

Perezida w’ishyirahamwe ry’abamotari mu Rwanda (FERWACOTAMO) Ngarambe Daniel, yavuze ko bishimiye uyu mwambaro kuko uzabafasha kugira isuku, ukanabafasha gutahura no gukumira abiyititiraga umwuga bakora bagakora ibyaha bityo bikabitirirwa.

Yagize ati “Mu bamotari havugwaga isuku nke kuko batagiraga umwambaro wa gilet. Ngira ngo uyu munsi nibwo tuwugaragaje kandi mbere yo kuwambara hari ibyo umumotari agomba kuba yujuje”.

Ngarambe avuga ko mu minsi iri imbere uzaba adafite umwambaro umuranga atazakora akazi ko gutwara moto.

Iki gikorwa cyatangirijwe mu mujyi wa Kigali kandi abamotari n’abitabiriye iki gikorwa basobanuriwe uburyo bwo gukoresha imashini y’itumanaho n’amakarita bagiye guhabwa n’uburyo bwo kwishyurwa n’abagenzi bakoresheje itumanaho rya Airtel Money.

Muri iki gikorwa, hatanzwe imyambaro ku bamotari 3000, mu gihe cy’ukwezi ngo intego ni uko buri mu motari azaba yamaze guhabwa uyu mwambaro umuranga aho ari hose mu Rwanda.

Abamotari basobanurirwa ibijyanye n'umwambaro mushya
Abamotari bamaze kwambikwa umwambaro mushya
CP Rafiki yambika umumotari umwambaro mushya
Umwambaro mushya wahawe abamotari
Abakozi ba Airtel Rwanda basobanuriye abitabiriye igikorwa n'abamotari imikoreshereze y'imashini n'ikarita izahabwa buri mumotari
CP Rafiki Mujiji, Umuyobozi wa Polisi ushinzwe umutekano wo mu muhanda na Perezida w’ishyirahamwe ry’abamotari mu Rwanda (FERWACOTAMO) Ngarambe Daniel
Umuyobozi wa Airtel ushinzwe abakozi,Andry Henintsoa Ratsimbason yishimiye gukomeza ubufatanye na FERWACOTAMO

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza