Urubyiruko rugera ku 133 ni bo bahawe impamyabumenyi y’ amahugurwa ku ikoranabuhanga no kwihangira imirimo yari amaze amezi atatu.

Ku bufatanye na Dot Rwanda, Inama y’igihugu y’urubyiruko yahuguye urubyiruko rugera kuri 802 mu bice bitandukanye by’igihugu, 133 muri bo nibo bahugurirwaga ku Kigo cy’Abagide i Gikondo, kuri uyu wa Kane bakaba ari bo bahawe impamyabumenyi zabo.

Mu mpanuro bahawe n’umuyobozi wungirije ushinzwe imibereho myiza y’abaturage mu Karere ka Kicukiro, Uwayisaba Florence yababwiye ko impamvu yahawe ayo mahugurwa ari ukugira ngo barwanye kwipfumbata.

Umuyobozi w'Inama y'Igihugu y'urubyiruko ashyikiriza impamyabumenyi umwe mu bahuguwe

Ati ”Mwagize ubushake bwo kuza gukurikirana aya mahugurwa ku buntu ni byiza rero ko murwanya kwipfumbata mugaragaza itandukaniro mu bikorwa mukora”.

Uwayisaba Florence kandi yabashishikarije kurwanya ibiyobyabwenge ndetse no kwirinda SIDA aho ari ho hose ngo kuko imyaka barimo ari yo urubyiruko rupfiramo cyangwa rugakiriramo. Yanabijeje ko abazahanga imirimo bakifashisha akarere kazabafasha mu gihe ari ibikorwa bigaragara.

Uru rubyiruko rwahuguwe mu ikoranabuhanga hibandwa mu kumenya gukoresha mudasobwa bakayibyaza umusaruro bakora ubushakashatsi (research) ndetse no kumenyekanisha ibyo bakora. Banahuguwe kandi mu masomo yo gushora imari, mu kwihangira imirimo mu kuzigama ndetse no kumenya gucunga umutungo wabo neza.

Fatuma wari uhagarariye abahuguwe yavuze ko abenshi mu bahuguwe ubu bamaze gufungura konti mu mabanki nk’urwego rwa mbere rugaragaza ko bamaze gusobanukirwa ko kwizigama ari ingenzi cyane.

Nkuranga Alphonse, Umunyamabanga Nshingwabikorwa w’Inama y’igihugu y’urubyiruko yabwiye urubyiruko rwahuguwe ko guhabwa ubumenyi ari wo musingi wa mbere kugira ngo umuntu abashe kugira aho agera.

Ati ”Guhabwa inyigisho ni kimwe ndetse no gushyira mu bikorwa ni ikindi, ubumenyi mujyanye buruta cyane impamyabumenyi (certificate) kuko umuntu azamenya ko mubufite binyuze mu byo mukora kuko izi mpapuro ni bacye cyane bazamenya ko muzifite.”

Ifoto y'urwibutso ku bahuguwe n'ababahuguye

Mutarutwa Joyeuse ndetse na Jeremie Nshimiyimana bemeza ko nk’abantu barangije amashuri yisumbuye batari bafite ubumenyi kuri mudasobwa no mu kuyibyaza umusaruro bakoresheje interineti ngo ariko ubu bamaze kumenya byinshi harimo nko gushakisha akazi kuri interineti ndetse no gukoresha aderesi ya interineti (e-mail).

Inama y’igihugu y’urubyiruko ndetse na Dot Rwanda bateganya guhugura abanyeshuri 2000 nibura muri buri mezi atandatu. Aya masomo basoje akazakurikirwa n’ikindi cyiciro, aho bakurikiranwa bageze hanze, bagakomeza guhabwa amasomo ku kuba rwiyemezamirimo, kwiga imishinga n’ibindi byo kubafasha kwiteza imbere.