00:00:00 IGIHE NETWORK KN KINYARWANDA EN ENGLISH FR FRANCAIS

Kicukiro: KTN Rwanda yishyuriye mituweli abatishoboye 400

Yanditswe na Manzi Angelo
Kuya 6 Ukuboza 2022 saa 08:11
Yasuwe :

Ikigo gihuza abaguzi n’abagurisha, KTN Rwanda, cyatanze ubwisungane mu kwivuza ku bakirisitu 400 bo muri Paruwasi yitiriwe Mutagatifu Yozefu ya Gahanga, binyuze muri Caritas, kugira ngo bajye babasha kubona serivisi z’ubuvuzi zibahendukiye.

Kuri uyu Kabiri tariki ya 6 Ukuboza 2022, nibwo KTN Rwanda yaremeye imiryango y’abatishoboye batuye mu Karere ka Kicukiro mu Murenge wa Gahanga.

Mu rwego rwo gukomeza gufasha abagorwa no kubona mituweli, KTN Rwanda yiyemeje ko buri mwaka izajya yishyurira ubwisungane mu kwivuza abaturage 400.

Ubwisungane mu kwivuza bwishyuriwe aba baturage ni ubw’umwaka wa 2021/22 na 2022/23.

Raporo y’Ikigo cy’Igihugu cy’Ubwiteganyirize (RSSB), igaragaza ko ubwitabire mu kwishyura Mituweli 2022/2023, uturere tugize Umujyi wa Kigali tuza ku myanya itatu ya nyuma mu gihe raporo yo ku itariki 13 Nyakanga 2022 Akarere kaza ku mwanya wa nyuma ari Kicukiro gafite 39%.

Abishyuriwe ubwisungane mu kwivuza babwiye IGIHE ko bishimye cyane kuko bazafasha kwivuza bahendukiwe, cyane ko basanzwe bagorwa no kubona ubushobozi bwo kwiyishyurira mituweli.

Niyonizera Florida uri mu bafashijwe yagize ati “Mfite Papa wanjye ni umurwayi wa Asthma kugira ngo muvuze byari ikibazo kubera ko ashaje, mfite n’umwana ukunda kurwara umusonga byangoraga ku muvuza mu bitaro bya Masaka ariko ubu bigiye ku nyorohera ku muvuza kuko KTN Rwanda yadufashije ndayishimira cyane.”

Uwingeneye Clarisse we ni umubyeyi w’abana barindwi, uvuga ko mituweli yamugiriye akamaro cyane kuko mbere abana baremberaga mu rugo kubera ubushobozi buke.

Ati “Abana banjye mbere bararwaraga bakaguma mu rugo kubera ubukene bigatuma njya kugura imiti muri Farumasi ugasanga mfite amadeni menshi ariko ubu mituweli bampaye yangiriye akamaro kuko abana banjye bararwara nkabajyana mu bitaro i Masaka.”

Padiri Mukuru wa Paruwasi yitiriwe Mutagatifu Yozefu Gahanga yashimiye KTN kubera ubufasha iki kigo cyageneye abakirisitu babo.

Yagize ati “Kuva Paruwasi yacu yashingwa mu 2021, iyi sosiyeti yahise itangirana gukorana natwe, badufashiriza abakirisitu binyuze mu gikorwa cya Caritas ya Paruwasi kandi Caritas ivuga urukundo ntago ireba abakirisitu gusa harimo ntabatari abakirisitu gatorika ariko ba bakene ba babatangira mituweli mu gikorwa cyo ku bafasha kwivuza.”

Umuyobozi Mukuru wa KTN Rwanda, Hagenimana Philemon yavuze ko bahisemo iki gikorwa cyo gufasha kuko bemera ko bagomba kugira uruhare mu guhindura imibereho y’Abanyarwanda.

Ati "Gufasha ntibisaba ko ari sosiyeti igurisha ibibanza ahubwo ni umutima, KTN Rwanda imaze igihe kinini ifasha abatishoboye mu bijyanye na mituweli, kuko twafashije abatuye mu Murenge wa Gikondo, Kigarama, twafashije n’ibigo by’abafite ubumuga mu bana n’abakozi bagera kuri 60 muri EAV Bugesera ubu rero ni bintu biri ku mutima wacu gutanga ubwisungane ku bantu badafite ubushobozi bwo kwivuza."

Yakomeje avuga ko bahisemo kwishyurira abaturage ubwisungane mu kwivuza kuko ikintu cya mbere ari ubuzima.

Ati "Kuba umuntu ashobora kurwara akarembera mu rugo cyangwa afite abana bakarinda bapfa kubera kutivuza byatumye dukomeza gufasha muri bike Imana iduha, kandi biteza imbere n’iterambere ry’igihugu."

Mu 2014 nibwo KTN Rwanda yatangiye gufasha abatishoboye bo mu bice bitandukanye by’igihugu, aho mu myaka umunani bamaze gufasha abantu barenga 2000 binyuze mu bikorwa by’urukundo.

Abatishoboye 400 bo muri Paruwasi ya Gahanga bishyuriwe ubwisungane mu kwivuza na KTN Rwanda
Padiri mukuru wa Paruwasi yitiriwe Mutagatifu Yozefu i Gahanga, yashimiye KTN ku gikorwa cy'urukundo yakoze
Umuyobozi Mukuru wa KTN Rwanda, Hagenimana Philemon, yavuze ko gufasha bidasaba kuba utunze byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .