Kayonza: Abaturiye urugomero rwa Kageyo batangiye gusenyerwa n’amazi menshi aruturukamo

Yanditswe na Hakizimana Jean Paul
Kuya 21 Mata 2020 saa 10:50
Yasuwe :
0 0

Abaturage batuye mu Karere ka Kayonza mu Murenge wa Mwiri mu Kagari ka Kageyo hafi y’urugomero ruherutse kubakwa ngo rujye rwifashishwa mu kuhira imirima yabo, baravuga ko amazi aruturukamo yatangiye gusenya inzu zabo bagasaba ko bafashwa kuhimuka.

Ibi aba baturage babigaragaje nyuma y’uko mu cyumweru gishize imvura yaguye ari nyinshi uru rugomero rukuzura, amazi akazamukira mu giturage agasenya inzu eshatu n’ubwiherero burindwi , izindi zigera kuri 30 amazi akuzura mu gikari kuburyo batewe impungenge nayo.

Bamwe mu baganiriye na IGIHE, bavuze ko kuri ubu batewe impungenge n’aya mazi ngo kuko ari kubangiriza inzu kuburyo zishobora kubagwira.

Niyonteze François yagize ati ati “ Ubu amazi agiye kugera ku miryango y’inzu yanjye, dutegereje ko inzu nazo zigwa kuko yamaze gusenya ubwiherero. Twahatuye hataba amazi nyuma haza umushinga uje gukora idamu izajya yuhira imirima, kuva aho bayubatse ugera ku ngo zacu harimo nka metero 50.”

“ Bakiyubaka twabajije niba amazi atazagera ku nzu zacu baraduhakanira ngo babanje kubipima neza none amazi yageze ku nzu zacu.”

Niyonteze yavuze ko mu cyumweru gishize haguye inzu eshatu zabagamo abaturage zihiritswe n’amazi, ngo hanaguye ubwiherero burindwi abandi amazi agera mu bikari byabo kuburyo bafite ubwoba ko inzu nyinshi zizasenyuka.

Izabayo Janvier we yavuze ko kuri ubu amazi yageze mu gikari iwe ku buryo afite impungenge z’inzu ye.

Ati “Muri uku kwezi nibwo amazi yiyongereye cyane aradusatira, ubu yarenze urugo rw’imiyenzi rw’iwanjye agera mu gikari, abaturanyi banjye bo babaye bahunze kuko inzu zabo amazi yazigezemo kuburyo bataziraramo.”

Uyu mugabo yavuze ko icyo bifuza ari uko leta yabafasha abasenyewe bakabarirwa bakimurwa, abashoboye kwiyubakira bagahabwa ibibanza bakimuka.

Umuyobozi w’Akarere ka Kayonza, Murenzi Jean Claude yabwiye IGIHE ko iki kibazo bakizi ndetse banatangiye gushakisha uko bamwe mu baturage bagizweho ingaruka n’aya mazi bimurwa bagatuzwa ahandi.

Yagize ati “Icyo twasabye abaturage ni uko abo amazi yatangiye kwangiriza bakimuka cyane cyane abatuye munsi y’umuhanda bose bakimuka, bagashakisha ahandi baba batuye. Hari ibibanza bimwe byabaye bibonetse dushaka kugira ngo babyubakemo ariho batura.”

Uyu muyobozi yakomeje avuga ko mu kwimuka ubuyobozi bw’Akarere buzafatanya n’abaturage kugira ngo ubuzima bwabo buve mu kaga, ngo abatishoboye bazashakirwa uburyo bubakirwa naho abafite amikoro bahabwe ibibanza biyubakire bahabwe ibikoresho.

Uru rugomero rwatashywe mu mpera z’umwaka ushize. Hanatunganyijwe igishanga gikora ku mirenge itatu kingana na hegitari 462.

Zimwe mu nzu ziri hafi y'urugomero zatangiye gusenyuka
Abaturage baturiye urugomero basabye kwimurwa
Amazi amaze kugera mu nzu zirenga 30 zituriye uru rugomero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .