Karongi: Undi mukozi wa ISCO yirashe arapfa

Yanditswe na Twarabanye Venuste
Kuya 3 Werurwe 2020 saa 08:10
Yasuwe :
0 0

Rukundo Jean w’imyaka 40 y’amavuko wakoreraga Sosiyete icunga umutekano ya ISCO mu Karere ka Karongi mu Ntara y’Uburengerazuba yirashe arapfa, kuri uyu wa Kabiri tariki 3 Werurwe 2020.

Rukundo ukomoka mu Murenge wa Gitesi yarindaga umutekano kuri imwe mu mabanki akorera i Karongi; impamvu yatumye yiyahura ntiramenyekana.

Umuvugizi wa Polisi mu Burengerazuba, CIP Twizere Karekezi Bonaventure, yabwiye IGIHE ko uwo mukozi yirashe ahagana saa Sita na 45 ari mu kazi ke ko gucunga umutekano.

Ati “Nibyo koko yaje kwirasa saa 12h na 45 gusa impamvu zo kuba yirashe nizo zigikurikiranwa, iperereza riracyakorwa kugira ngo tumenye icyatumye yiyica. Ku kazi nta kibazo yari afite.”

CIP Twizere yavuze ko mu makuru bamaze kumenya ari uko nta kibazo yari afitanye n’abo bakorana i Karongi. Yavuze ko hatangiye gukorwa iperereza ngo hamenyekane icyateye urupfu rwe.

Rukundo yabaye umukozi wa kabiri wa ISCO wiyahuye mu mezi abiri ya mbere ya 2020. Yakurikiye uwitwa Ntatinya Audace ukomoka mu Karere ka Gicumbi wiyahuye muri Mutarama na we wirashe arapfa. Uyu mukozi yari agiye gusimbura mugenzi we waraye izamu aho yakoreraga ku Kicukiro.

Mu butumwa butangwa n’inzego zirimo iz’ibanze n’iz’umutekano ni uko abantu badakwiye guheranwa n’ibibazo ku buryo bigeza aho bahara ubuzima bwabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .