Karamaga wahanganye n’Interahamwe mu Bisesero yitabye Imana, Ibuka yashimye ubutwari bwe

Yanditswe na Habimana James
Kuya 22 Gicurasi 2020 saa 10:30
Yasuwe :
0 0

Karamaga Siméon uri mu bahanganye n’Interahamwe zicaga Abatutsi bo mu Bisesero mu 1994, yitabye Imana azize indwara y’umwijima.

Uyu musaza w’imyaka 76 yatabarukiye mu Bitaro bya Ngoma mu Murenge wa Gishyita mu Karere ka Karongi aho yari arwariye, ku wa 21 Gicurasi 2020.

Izina rya Karamaga rizwi mu mateka ya Jenoside yakorewe Abatutsi mu Bisesero, ubu ni mu karere ka Karongi. Uyu musaza yari azwiho ko we na bagenzi be barwanyije ibitero by’Interahamwe mu 1994 kugera aho bazambura imbunda.

Bisesero ni agace kari gatuwemo n’Abatutsi benshi bivugwa ko bageraga ku 60 000, mu gihe cya Jenoside habereye amateka yo kwirwanaho kw’Abatutsi mu buryo bukomeye ku buryo bagejeje muri Gicurasi 1994 abicanyi batarabasha kubameneramo.

Abatutsi barwanaga bari bayobowe n’uwitwaga Birara Aminadabu, umuhungu we Nzigira, Segikware, Habiyambere, Paul Bitega aba bakaba baraje kwicwa. Hari kandi abashoboye kurokoka barimo Karamaga Siméon, Aron Gakoko na Vincent Munyaneza.

Muri Jenoside, abavandimwe ba Karamaga bagera kuri barindwi n’ababyeyi be barishwe, arokokana na mugenzi we umwe ariwe Gokoko. Yanabuze umugore we wicanwe n’abana be bane yari afite.

Nyuma ya Jenoside yakorewe Abatutsi, Karamaga yaje kwiyubaka yongera gushaka undi muryango, ubu yari afite umugore n’abana batandatu.

Mu burwayi bwe bw’umwijima yivurije ahantu hatandukanye, kugera no mu Mujyi wa Kigali.

Umuyobozi w’Umuryango uharanira Inyungu z’Abacitse ku icumu rya Jenoside yakorewe Abatutsi mu 1994, IBUKA, muri Karongi, Habarugira Isaac, yabwiye IGIHE ko Karamaga ari mu ntwari zagerageje kurwanya ibitero byo mu Bisesero, aho yari ku mwanya wa gatatu mu bashoboye kwambura imbunda Interahamwe.

Yagize ati “Turihanganisha umugore n’abana be batandatu. Turanashima ubutwari bwamuranze ndetse n’umuryango we nabo bagakomeza ubutwari bwe, ubu butwari kandi bukwiye kuranga buri Munyarwanda.”

-  Uko Abanyabisesero birwanyeho

Ku wa 7 Mata 1994 inkuru imaze kumenyekana ko Habyarimana yapfuye, mu duce tumwe twa Kibuye na Gikongoro Abatutsi baho batangiye kwicwa bahungira mu Bisesero.

Ntibyatinze, Abasesero nabo byabaye ngombwa ko bava mu nzu zabo bahungira mu misozi ya Muyira na Gitwe. Abandi batutsi bahahungiraga ni ababaga bacitse ku icumu mu bindi bice baturutse za Mubuga kuri Kiliziya, Rwamatamu, Gitwa, mu Mujyi wa Kibuye, Rutsiro, Kayove n’ahandi.

Mu Bisesero bahabaye igihe kinini bahangana n’ibitero by’abicanyi bakabitsimbura ndetse bakicamo abicanyi benshi bakanabambura imbunda n’ubwo batari bazi kuzikoresha ngo zibe zabafasha kwirwanaho.

Amateka yabo mu butwari bwo kwirwanaho yarakomeje igihe kinini, barwana n’abicanyi bafite intwaro zitandukanye zirimo imbunda bo bakoresha inkoni, amabuye, amacumu n’imiheto.

Abatutsi baturukaga mu Gisovu na Rwankuba barwaniraga ku musozi wa Muyira abandi bagateranira ku musozi wa Gitwe, bakaba ariho barwaniraga n’Ibitero by’abicanyi.

Uburyo bakoreshaga bwari ukwiroha mu bitero by’abicanyi bakarwana nabo n’ubwo bagira abicwamo muri bo ariko nabo bakagira abo bica muri abo bicanyi kandi kenshi barabaneshaga abicanyi bagacika intege bagahunga cyane cyane ko babaga bambuwe n’intwaro zabo.

Icyo gihe bishyiraga hamwe bakamenya aho ibitero byaturukaga bakajya kubihagarika bakabibuza kwinjira mu Bisesero. Mu gitondo, iyo abicanyi bazaga, Abatutsi babaga bari mu mpinga z’imisozi bakabatera amabuye yamara gushira bakamanukira rimwe bose uruvunge babasanga kugira ngo batica abagore n’abana cyangwa bakabarira inka noneho bakarwana n’abicanyi kugeza babarushije imbaraga bagahunga.

Abatutsi babaga bagiye kurushwa imbaraga n’Interahamwe basangaga bagenzi babo ku yindi misozi bakungikanya imbaraga kugira ngo barebe ko bazitsinda.

Baje kuganza abicanyi ariko mu ntangiriro za Gicurasi 1994, bamaze ibyumweru bibiri biga amayeri, banisuganyiriza kugaba ibitero byo kurimbura Abatutsi.

Iya 13 Gicurasi 1994 ni yo yabaye itariki ya mbere y’ibitero simusiga byagabwe mu Bisesero bigizwe n’abasirikare bo mu mutwe warindaga Umukuru w’Igihugu n’abandi basirikare, bahungaga urugamba, interahamwe zivuye mu bice bitandukanye n’abicanyi babimenyereye bavuye mu Bugarama muri Cyangugu, Gisenyi, Ruhengeri na Gikongoro.

Nyuma y’ibyo bitero byari simusiga byayobowe n’abari abayobozi muri Leta yakoze Jenoside, Abatutsi bari bamaze kunanirwa bikubitiraho n’uko ibitero byari bifite ingufu nyinshi ku buryo batashoboraga guhangana n’intwaro zikomeye byari byitwaje.

Abatutsi bararashwe, baterwamo za gerenade n’abandi bicanyi bakoresha intwaro gakondo, imirambo myinshi y’abana, abagore, abasaza yuzura aho.

Iki gitero cyaciye intege cyane Abasesero kandi kibicamo benshi, bivugwa ko uwo munsi hihwe Abatutsi barenga 30.000.

Amakuru agaragaza ko uwo munsi ubwicanyi bwahagaze ahagana saa Kumi n’Imwe n’igice, abicanyi bahurira ahitwa ku ‘Cyapa’ hagati ya Komini Gishyita na Gisovu, bategura uko ubwicanyi bwagombaga gukomeza mu gitondo.

Abicanyi bongeye kugaruka ku wa 14 Gicurasi 1994 nabwo bica benshi, hasigara Abatutsi batarenga ibihumbi 10. Ababashije kurokoka ubwo bwicanyi batangiye kubaho bihishahisha mu bihuru ndetse no kwirirwa birukanka mu misozi bahunga Interahamwe zibarasa umugenda, abakomeretse abicanyi bakaza kubahiga n’imbwa.

Karamaga yakundaga gutanga ubuhamya bwo kurokoka kwe n'uburyo barwanyije Interahamwe igihe kikagera imbaraga zigashira Abatutsi bakicwa
Karamaga, umusaza uri mu barokokeye mu Bisesero akaba no mu barwanyije ibitero by'Interahamwe yitabye Imana azize uburwayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .