Kamonyi: Urukiko rwarekuye Gitifu na bagenzi be bari bamaze amezi atatu bafunzwe

Yanditswe na Prudence Kwizera
Kuya 28 Gashyantare 2021 saa 07:09
Yasuwe :
0 0

Urukiko rw’Ibanze rwa Gacurabwenge rwarekuye Umunyamabanga Nshingwabikorwa w’Umurenge wa Ngamba mu Karere ka Kamonyi, Niyobuhingiro Obed, n’abandi bareganwa, bose bakaba bari bamaze amezi atatu bafunzwe bakurikiranweho icyaha cya ruswa, kurigisa amabuye y’agaciro ndetse no gusibanganya ibimenyetso.

Mu Ugushyingo 2020 nibwo Urwego rw’Igihugu rw’Ubugenzacyaha, RIB, rwataye muri yombi Niyobuhingiro hamwe n’abandi bantu batatu barimo ukuriye Dasso n’uyobora Inkeragutabara mu Murenge wa Ngamba ndetse n’undi muturage bakurikiranyweho ibyaha bitandukanye.

Niyobuhingiro yari akurikiranyweho kwakira ruswa y’ibihumbi 300 Frw kugira ngo ahe umuturage amabuye y’agaciro ayajyane mu buryo bunyuranyijje n’amategeko.

Yari akurikiranyweho n’icyaha cyo kurigisa ayo mabuye y’agaciro no gusibanganya ibimenyetso kuko bayagejeje kuri Polisi basanga ari umucanga.

Ibyo byaha yakekwagaho kubikora afatanyije n’kuriye Dasso n’uyobora inkeragutabara mu Murenge wa Ngamba.

Nyuma yo gufatwa bakorewe dosiye bashyikirizwa ubushinjacyaha kugira ngo bagezwe imbere y’ubutabera.

Ubushinjacyaha bwemereye IGIHE ko Urukiko rw’Ibanze rwa Gacurabwenge rwasanze ibyaha bakurikiranyweho nta bimenyetso simusiga bifitiwe rutegeka ko barekurwa.

Inyubako y'Ibiro by'Akarere ka Kamonyi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .