00:00:00 IGIHE NETWORK KN KINYARWANDA EN ENGLISH FR FRANCAIS

Kaminuza ya Kent State yafunguye ishami mu Rwanda

Yanditswe na Idukunda Kayihura Emma Sabine
Kuya 25 Mutarama 2023 saa 07:12
Yasuwe :

Kaminuza ya Kent State yo muri Ohio muri Leta Zunze Ubumwe za Amerika, yafunguye ku mugaragaro ishami ryayo mu Rwanda, aho yitezweho gutanga ubumenyi bukenewe ku rwego mpuzamahanga.

Umuhango wo gufungura ku mugaragaro iri shami wabereye ku Cyicaro gikuru cya Kaminuza y’u Rwanda (UR), kuri uyu wa 25 Mutarama 2023.

Witabiriwe n’abayobozi batandukanye barimo Minisitiri w’Uburezi, Dr. Uwamariya Valentine, Visi Perezida wa Kaminuza ya Kent State, Marcello Fantoni, Umuyobozi Mukuru w’Agateganyo wa Kaminuza y’u Rwanda, Dr Didas Kayihura, n’abandi.

Iri shami rifunguwe mu Rwanda, rizaba ririmo amwe mu masomo mashya atabonekaga mu zindi kaminuza zo mu Rwanda,bikazaba igisubizo ku banyarwanda n’abanyafurika muri rusange bashakaga kuyiga bagahendwa no kujya muri Amerika.

Visi Perezida wa Kaminuza ya Kent State, Marcello Fantoni, yavuze ko kuzana amasomo mashya atamenyerewe muri Kaminuza zo mu Rwanda atari cyo kigambiriwe, ahubwo ko baje kuzuzanya hagendewe ku masomo asanzwe yigwa mu Rwanda.

Ati ‘‘Navuga ko dufite porogaramu zihariye, ariko icy’ingenzi cyane ntago ari icyo. Ni uko twuzuzanya bitewe n’ibikenewe mu kwiga.’’

Iyi Kaminuza ifitanye imikoranire na Kaminuza y’u Rwanda yaba mu bijyanye n’imyigishirize n’ibindi. Mu ntangiriro igiye gukorera mu nyubako za Kaminuza y’u Rwanda i Gikondo.

N’ubwo ishami rya Kaminuza ya Kent State ryafunguwe ku mugaragaro mu Rwanda kuri uyu wa 25 Mutarama, yari isanzwe ifitanye imikoranire na Kaminuza y’u Rwanda, guhera mu mwaka wa 2018.

Umuyobozi Mukuru w’Agateganyo wa Kaminuza y’u Rwanda, Dr Didas Kayihura, yavuze ko ubufatanye bw’izi kaminuza zombi bwitezweho umusaruro mwiza mu gutanga uburezi bufite ireme.

Ati ‘‘N’ubwo Kent State ari mpuzamahanga n’ibindi bihugu bizaza, ariko uko barushaho kuza hano niko buri mushakashatsi azajya mubyo ashaka akabona ibiteye amatsiko agakora n’iwacu, hakabaho ubwo bufatanye buzatanga umusaruro ushimishije.’’

Minisitiri w’Uburezi, Dr. Uwamariya Valentine, yavuze ko kuba Kaminuza ya Kent State igiye gukorana bya hafi na Kaminuza y’u Rwanda, ari uko hari aho bihuriye mu gutanga uburezi bufite ireme.

Ati ‘‘Ubundi kwitwa kaminuza n’iyi ari Kaminuza y’u Rwanda, ni ukuvuga ngo hari icyo bihuriyeho mu gutanga ubumenyi kandi bufite ireme, nshingiye no ku masezerano Kaminuza y’u Rwanda yagiranye na bo.’’

Dr. Uwamariya avuga ko bimwe bizibandwaho muri iri shami rya Kaminuza ya Kent State, harimo kwita ku myigishirize y’abana bafite ubumuga ndetse no kunoza imyigishirize y’ururimi rw’Icyongereza.

Mu bindi yavuze ni uko u Rwanda ruzungukira kuri iyi Kaminuza kuko no mu masomo izatanga harimo n’ibigendanye no gutwara indege u Rwanda rukeneye cyane.

Minisitiri Dr. Uwamariya yavuze ko n’ubusanzwe uburezi bwiza buhenda, ariko ko kuri iyi nshuro ubwo hari imikoranire, ibiciro bya Kent University bizaganirwaho.

Mu mikoranire hagati ya Kaminuza ya Kent State na Kaminuza y’u Rwanda, hari na porogaramu yiswe ‘Two-plus-two (2+2)’, izaha abanyeshuri amahirwe yo kwiga imyaka ibiri muri Kaminuza y’u Rwanda, indi ibiri bakayikomereza muri Kaminuza ya Kent State, bikabahesha kugira impamyabumenyi ebyiri zitandukanye zo muri izo kaminuza zombi.

Gahunda y’ibizigishwa muri iyi kaminuza harimo ibijyanye na siyansi n’ikoranabuhanga, imyubakire ndetse n’imibare. Muri ayo masomo kandi harimo ajyanye n’ubwirinzi bw’ibyaha bikorerwa ku ikoranabuhanga (Cyber security), ibyo gutwara indege, amasomo ya gisirikare n’andi atandukanye.

Kaminuza ya Kent State yashinzwe mu 1910 mu mujyi wa Kent muri Leta ya Ohio, ikaba imaze kwigwamo n’abanyeshuri basaga 41.000 ubariyemo n’abiyigamo ubu. Izwiho gutanga uburezi bufite ireme ku rwego muzamahanga.

MINEDUC yagaragaje ko kunguka Kent State University ari inyungu ku iterambere ry'uburezi bw'u Rwanda
Bamwe mu bayobozi ba Kaminuza ya Kent State bitabiriye umuhango wo gufungura ku mugaragaro ishami ryayo mu Rwanda
UR yiteze inyungu ikomeye mu bufatanye bwayo na Kaminuza ya Kent State
Kent State University isanzwe ifitanye imikoranire na Kaminuza y'u Rwanda, gufungura ishami rishya bikaba bizarushaho kunoza uwo mubano
MINEDUC yatangaje ko hakiri ibiganiro kugira ngo kwiga muri Kaminuza ya State, Ishami ry'u Rwanda bizahendukire abaturarwanda
Ubuyobozi bwa Kaminuza ya Kent State bwijeje ko ireme ry'uburezi rizubahirizwa mu masomo bazajya batanga
Umuyobozi Mukuru w’Agateganyo wa Kaminuza y’u Rwanda, Dr Didas Kayihura, yavuze ko gukorana kw'izi kaminuza bigiye gutuma basangira ubunararibonye ku banyeshuri no ku barezi
Byitezwe ko Kaminuza ya Kent State izatangirana amwe mu masomo na porogaramu bidasanzwe mu Rwanda
Kent State University, Ishami ryo mu Rwanda izakorera mu nyubako za Kaminuza y'u Rwanda i Gikondo
Minisitiri w’Uburezi, Dr. Uwamariya Valentine, yavuze ko gukorana kwa UR na Kent State University bigiye kurushaho kuba umusingi w'uburezi bufite ireme
Abayobozi batandukanye bo mu nzego za Leta no ku ruhande rwa Kaminuza ya Kent State, bitabiriye umuhango wo gutangiza ishami ryayo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .