Mu rwego rwo gukangurira urubyiruko kwirinda gusesagura amafaranga rwinjiza mu bikorwa bitandukanye rukora, ndetse no gushyira imbaraga n’ubushake mu kwizigamira, urubyiruko rw’ibitsina byombi rw’ingeri zose rugera kuri 250 rwahurijwe hamwe na Imbuto Foundation mu gihe cy’iminsi ibiri, mu biganiro byabereye mu kigo cya gisirikare cya Gabiro guhera mu mugoroba wo kuri uyu wa Gatanu, mu Karere ka Gatsibo, mu Ntara y’Uburasirazuba.

Mu ijambo yagejeje ku bitabiriye ibi biganiro barimo urubyiruko rwari rwiganjemo ahanini abakorera inzego zitandukanye za leta, abo mu bigo byigenga ndetse n’abikorera ku giti cyabo, Madamu Jeannette Kagame yagarutse ku kamaro ko gucunga neza umutungo kwa buri wese yirinda gusesagura, ahubwo agashyira imbere kwizigamira.

Umufasha w’Umukuru w’Igihugu yasabye buri wese guharanira kubaho mu buzima bujyanye n’amikoro ye, aho gusesagura amafaranga mu makwe ahenze, kugura amamodoka n’imyenda bihenze nta kwizigamira, ku buryo birangira nta gikorwa cyo kwiteza imbere kigaragara kiyakozwemo.

Vincent Munyeshyaka, Umunyamabanga Uhoraho muri Minisiteri y'Ubutegetsi bw'Igihugu, ubwo yarimo atanga ikiganiro ku ikoreshwa ry'amafaranga, ishoramari no kwizigamira,

Yasabye urubyiruko gukoresha umutimanama mu gucunga neza umutungo warwo ndetse runizigamira, ati “Ni ingenzi guhitamo ibikwiye ndetse tukaniyakira uko turi (…). Buri wese muri mwe afite uburenganzira bwo guhitamo ikimubereye cyangwa ikimukwiye.”

Mu kiganiro cyari gifite insanganyamatsiko igira iti “Kubaho mu bushobozi dufite”, ndetse cyananyuze benshi mu bitabiriye ibi biganiro, Umunyamabanga Uhoraho muri Minisiteri y’Abakozi ba Leta n’Umurimo Mulindwa Samuel na we yagaragaje ko kwiyakira ukimenya bigufasha gutera imbere.

Yifashishije umugani w’ Abanyarwanda uvuga ko ‘umusore utiraririye atarongora inkumi’, Mulindwa yavuze ko kwirarira nta ho byageza umuntu, ati “Iyo ubaho mu buzima burenze ubushobozi bwawe ntabwo wabasha kwizigamira”.

Mulindwa yakanguriye urubyiruko kugira umuco wo gushaka uko bike bafite babibyaza umusaruro, baharanira kuzamuka mu ntera no mu mibereho, ati “Niba ukorera ibihumbi 600, shaka uko wakorera miliyoni, ejo uzamuke ujye kuri imwe n’igice, aho guhora uguza amafaranga, ariko wishyura andi wari waragurijwe.”

Aly Khan Satchu, Umuyobozi wa Rich Management, ikigo cyikorera gifite icyicaro muri Kenya, yatanze ikiganiro ku mikorere y’ubukungu bw’isi, anibanda kandi ku gutanga impanuro ku cyatuma buri wese abasha kugera ku byo yifuza.

Agaragaza inzira iganisha ku iterambere umuntu ahereye kuri ducye afite, Khan yavuze ko iyo ushaka gutera imbere ubanza kwimenya, ukamenya umusaruro wawe ndetse n’ibyo ukeneye, bityo ukirinda gusesagura.

Ngayaboshya Emmanuel umwe mu rubyiruko rwiteje imbere yavuze ko umuntu iyo yubaka ahera ku musingi akagenda azamuka.

Mu mwaka 2002, Emmanuel yakoraga akazi ko guteka, aho yahembwaga ibihumbi 20 by’amafaranga y’u Rwanda, ariko kubera kugira umuco wo kwizigamira yazamutse gahoro gahoro none ubu yashinze restaurant ifite agaciro ka miliyoni zirenga 100, aho mu bikorwa byayo ndetse n’ibiyishamikiyeho akoresha abakozi barenga 100.

Ibiganiro nk’ibi by’urubyiruko kuri ubu bibaye ku nshuro ya 21 bimaze kuba umuco muri Imbuto Foundation, aho ruhura rukaganirizwa kuri byinshi birimo kwiteza imbere mu buryo butandukanye, ubuzima bw’imyororokere, imyigire n’ibindi.

Umunyamabanga Uhoraho muri Minisiteri y’Abakozi ba Leta n’Umurimo Mulindwa Samuel

Minisitiri w'Imari n'Ishoramari Claver Gatete na we yatanze ikiganiro kigufi ku rubyiruko kijyanye n'insanganyamatsiko y'uwo munsi yo guharara neza mu bukungu

Aly Khan Satchu, Umuyobozi wa Rich Managament, yari yaturutse muri Kenya mu rwego rwo kuganiriza urubyiruko mikorere y'ubukungu bw'isi

Hano ni mu matsinda ubwo umwe mu rubyiruko, Nibagwire Didacienne, yarimo abaza ikibazo umwe mu bari batanze ikiganiro

Molare yari yose...

[email protected]