00:00:00 IGIHE NETWORK KN KINYARWANDA EN ENGLISH FR FRANCAIS

JADF yakoze ibikorwa bya miliyari 170.4Frw mu 2021/2022

Yanditswe na Igizeneza Jean Désiré
Kuya 24 Ukuboza 2022 saa 08:21
Yasuwe :

Urwego rw’Igihugu rw’Imiyoborere, RGB twatangaje ko Ihuriro ry’Abafatanyabikorwa mu Iterambere, JADF ryakoze ibikorwa bifite agaciro ka 170, 462, 502, 077Frw mu igihugu hose mu gihe cy’umwaka, biri mu byiciro by’ubukungu, imibereho myiza ndetse n’ubuyobozi.

Mu cyiciro cy’ubukungu hakozwe ibikorwa bifite agaciro ka 56,826,553,647Frw, mu cy’imibereho myiza hakorwa ibifite agaciro kabarirwa 106,563,954,217Frw mu gihe mu cyiciro cy’ubuyobozi iri huriro ryakoze ibikorwa bifite agaciro ka 7,071,994,213.

Ihuriro ry’Abafatanyabikorwa mu Iterambere, JADF rigizwe n’abanyamadini, abo mu rugaga rw’abikorera, imiryango mpuzamahanga n’iyo mu gihugu n’ubuyobozi bw’akarere, aho bose baba bafatanyiriza hamwe mu iterambere ry’akarere n’igihugu muri rusange.

Mu nama yahuje abayobozi bakuru ba JADF ku rwego rw’uturere, intara n’ubuyobozi bwa RGB yabaye kuri uyu wa Gatanu tariki ya 23 Ukuboza 2023, Umuyobozi wa RGB, Dr Usta Kayitesi yavuze ko yari igamije kureba ibyagezweho ndetse no gusesengura ingamba zagutse z’iri huriro.

Dr Kayitesi yagaragaje kandi ko indi ntego nyamukuru y’iyi nama ari ugushyira ku murongo gahunda z’abafatanyabikorwa dore ko ingengo y’imari yabo itangira muri Mutarama buri mwaka.

Ati “Icyo gihe uba ugiye muri Kamena kuri bamwe bagira gahunda yo kuvugurura ingengo y’imari ariko akenshi ingengo y’imari y’ibigo byinshi rikorwa muri Mutarama. Aya ni amahirwe rero yo kugenzura abantu bakareba ibyihuse ariko hakarebwa n’ibitaragenze uko babiteguye abantu bagahuza neza rya kurikiranabikorwa nk’uko ryifuzwa.”

Mu nshingano JADF ifite harimo kugira uruhare mu igenamigambi, mu ikurikiranabikorwa ikazagira n’uruhare mu igenzurabikorwa ku buryo byose bisenyera umugozi umwe mu kwihutisha iterambere.

Dr Kayitesi ati “Nubwo JADF ifite izo nshingano, twasanze ko mu ikurikiranabikorwa harimo inenge kuko iyo ubonye za raporo usanga iby’uzi umufatanyabikorwa yaje agakora muri raporo ntabirimo kuko amakuru aba atuzuye.”

Dr Kayitesi asobanura ko ibikorwa bisangwa muri raporo, ibyinshi biba biri mu igenamigambi ry’akarere mu gihe ibindi bikorwa bito bidashyirwamo kandi na byo byaragize icyo bimara mu iterambere ry’akarere.

Ati “Tugomba gukorera igenamigambi hamwe, tukamenya igihe abafatanyabikorwa bagirira igenamigambi kugira ngo byitabweho hanakurikiranwe ibyemejwe harebwa uko bishyirwa mu bikorwa.”

Ku bijyanye n’uko JADF itabarizwa mu Nama Njyanama y’Akarere kugira ngo iryo kurikiranabikorwa ndetse n’izindi nshingano zayo zikorwe neza, Kayitesi yavuze ko Inama Njyanama y’akarere ari urwego ukwarwo na JADF ikaba uko.

Agaragaza ko nubwo buri rwego rwihariye, abayobozi bagize urwego rumwe bisanga mu rundi mu buryo bumwe cyangwa ubundi, agatanga urugero ku bayobozi b’akarere bari mu Nama njyanama bakaba no muri JADF.

Ati “Uretse abayobozi b’akarere n’urugaga rw’abikorera ruri muri izo nzego zombi. Icyaganiriweho ni uko buri rwego rugomba kuguma kuba uko ruri, ahubwo inzego zose zikagira umwanya wo kuganira.”

Umujyanama wa JADF mu Ntara y’Uburasirazuba, Nsengimana Cyprien yagaragaje ko kuba abashinzwe gukurikirana ishyirwa mu bikorwa ry’imishinga ikorwa mu karere badafite urutonde rufatika rw’imiryango yose ikorera mu karere hari ibikorwa ariko ntibimenyekane.

Nsengimana akomeza avuga ko imiryango idatanga gahunda izakora mu gihe cy’umwaka nk’uko amategeko agena Ihuriro abiteganya na byo bituma raporo y’ibyakozwe igenda nabi.

Yongeraho ko ibikorwa byakozwe nabyo byagakwiriye gukurikiranwa kugira ngo hamenywe impinduka byazanye mu baturage bityo igenamigambi y’umwaka ukurikiyeho nayo ikorwe neza.

Umuyobozi w'umusigire ushinzwe imiyoborere, imitangire ya serivisi na JADF muri RGB, Afrika Alexis yagaragaje ko JADF igira uruhare rukomeye mu iterambere ry'akarere
Umuyobozi Mukuru wa RGB, Dr Yusta Kayitesi yavuze ko ikurikiranabikorwa rigomba kunozwa buri gikorwa cyakorewe mu karere kigashyirwa muri raporo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .