00:00:00 IGIHE NETWORK KN KINYARWANDA EN ENGLISH FR FRANCAIS

Jabana: Umuyobozi yise abaturage “FDLR” ngo kuko badatanga amafaranga y’umutekano

Yanditswe na

Mazimpaka Jean Pierre

Kuya 30 Ukwakira 2014 saa 07:29
Yasuwe :
0 0

Mu nama ya nyuma y’umuganda wo kuwa 25 Ukwakira 2014, Umuyobozi w’Umudugudu wa Gitenga mu Kagali ka Bweramvura Umurenge wa Jabana, Zikuriza Barthazar, ngo yise “FDLR” abaturage bose badatanga amafaranga y’umutekano, biza gutuma bahungabana ku bwo kwitiranwa n’abanzi b’igihugu.
Ubusanzwe Zikuriza ayobora umudugudu atawutuyemo gusa ngo awuvukamo, uyu mugabo utuye mu Mudugudu wa Rugarama mu Kagali ka Kabuye, ayobora Umudugudu wa Gitenga mu Kagari ka Bweramvura, akaba abumazeho imyaka irenga ine. (...)

Mu nama ya nyuma y’umuganda wo kuwa 25 Ukwakira 2014, Umuyobozi w’Umudugudu wa Gitenga mu Kagali ka Bweramvura Umurenge wa Jabana, Zikuriza Barthazar, ngo yise “FDLR” abaturage bose badatanga amafaranga y’umutekano, biza gutuma bahungabana ku bwo kwitiranwa n’abanzi b’igihugu.

Ubusanzwe Zikuriza ayobora umudugudu atawutuyemo gusa ngo awuvukamo, uyu mugabo utuye mu Mudugudu wa Rugarama mu Kagali ka Kabuye, ayobora Umudugudu wa Gitenga mu Kagari ka Bweramvura, akaba abumazeho imyaka irenga ine.

Ubwo yageraga mu Mudugudu wa Gitenga, avuye aho atuye kuko ari naho yari yakoreye umuganda, Zikuriza yabanje gufasha umuyobozi w’umutekano gucoca bimwe mu bibazo byaganirwagaho nyuma y’umuganda. Zikuriza Barthazard yagarutse cyane ku kibazo cy’umutekano ngo dore ko abaturage bari barateshutse ku gutanga amafaranga y’umutekano ari nayo akoreshwa nk’agahimbazamusyi k’inkeragutabara.

Abaturage bavuga ko imbere y’imbaga y’abatuye umudugudu, Zikuriza ngo yavuze ko abadatanga ayo mafaranga ari abanzi b’igihugu ndetse ko “ntaho bataniye na FDLR”.
Umwe mu baturage waganiriye na IGIHE utarashatse ko amazina ye atangazwa kubera umutekano we yagize ati “Njye nari mpibereye si inkuru mbarirano, umukuru w’umudugudu yavuze ko abadatanga amafaranga y’umutekano ari FDRL.”

Ibiro by'Umurenge wa Jabana

Undi muturage yashimangiye ko ayo magambo yayumvise gusa avuga ko asanga umukuru w’umudugudu yarakoresheje iyo nyito ya “FDLR” kugirango abatere ubwoba.
“Iryo jambo yararikoresheje nibyo pe! Gusa byagaragaraga nko gushaka gutera ubwoba[...]”

Zikuriza Barthazard avugana n’umunyamakuru wa IGIHE kuri telefoni yahakanye yivuye inyuma ko atigeze akoresha ijambo FDLR ngo ariko yavuze ko abaturage badatanga amafaranga y’umutekano ntaho bataniye n’abanzi b’igihugu.

Mu magambo ye yagize ati “Ibyo navuze ni uko umuturage udatanga amafaranga y’umutekano ku bushake, ntaho wamutandukanyiriza n’umwanzi. Tudaciye hirya no hino ntaho wamutandukanyiriza n’umwanzi. Abantu nk’abo banabiba n’umwuka mubi mu bandi baturage”.

Umunyamakuru yongeye kumubaza niba koko ataragereranyije abaturage na FDLR, Zikuriza ati “Twakoresheje ijambo umwanzi w’igihugu ntabwo twakoresheje FDRL. Abaturage babivuze ni uko baziko FDRL ari umwanzi w’igihugu”. Yashimangiye ko ibyo yavuze ari ukuri kuko ngo abadatanga amafaranga y’umutekano, ngo bagomesha n’abandi.

Ati “Usanga abo badashaka gutanga amafaranga ku bushake babwira abandi ko nta mpamvu yo gutanga amafaranga y’umutekano kuko ingabo na Polisi bahari”.
N’ubwo ariko Zikuriza atsimbarara ku kuba abaturage badatanga amafaranga y’umutekano ku bushake ntaho batandukaniye n’umwanzi, abaturage bo bavuga ko batanga kuyatanga bayafite ahubwo ngo ni uko ari ba “ntaho nikora”.

Hari abaturage bavuga ko amikoro yabo agerwa ku mashyi, ku buryo batabasha kubona ayo mafaranga basabwa. Buri rugo ngo ruba rusabwa gutanga amafaranga 1000 y’u Rwanda buri kwezi. Ibi ariko Zikuriza avuga ko babiganiriyeho n’abaturage, abadafite aho bikora na busa ngo barasonerwa, abandi bagatanga magana atanu mu gihe abandi baba batanga 1000.

Abaturage ntibahakana ibyo zikuriza avuga, gusa bongeraho ko ataboneka ngo amenye ibibazo byabo. Ngo aza aje kubaka amafaranga nyamara atarigeze yicarana nabo ngo amenye ushobora kubona ayo mafaraga n’ushobora kutayabona.

Bakomeza bavuga ko umuyobozi wabo yagiyeho mu buryo budahwitse ahagarikiwe n’ubuyobozi bw’umurenge iyi ikaba ari nayo mpamvu baruca bakarumira.
Zikuriza we avuga ko kuba adatuye mu mudugudu ayobora ntacyo bitwaye ngo kuko gahunda ageza kuri abo baturage ari iza Leta nk’izo abandi bayobozi bageza ku baturage.

Abaturage bifuza ko uyu muyobozi yavaho ngo kuko mu gihe kirenga imyaka ine agiye kumara nta kintu na kimwe yabamariye. Ngo ibyo bamusabye kubakorera byose ntabyo akora ngo ahubwo akababwira amagambo mabi gusa. Ngo ubwo bamusabaga kubakorera ubuvugizi ku kibazo cy’amashanyarazi yababwiye ko bagomba kwiruhira. Nyamara ngo aho atuye, we arara acanye.

Kuyobora aho adatuye ngo ni amakosa akomeye!

Umunyamabanga Nshingwabikorwa wa Jabana, Shema Jonas aganira na IGIHE yasobanuye ko ari amakosa akomeye kuba umuyobozi w’umudugudu ataba mu mudugudu ayobora.

“Ntibibaho! Ihame rya mbere ryo kugirango umuturage abe umuyobozi w’umudugudu ni uko agomba kuba atuye muri uwo mudugudu igihe amatora ari kuba ndetse akitorerwa n’abaturage ubwabo. Iyo yimutse asimburwa n’ushinzwe umutekano mu minsi 90 hagashakwa umusimbura.”

Yavuze ko aya ari amakuru mashya kuko nta muturage wari wagejeje ku buyobozi iki kibazo. Ati “Ntabwo ayo makuru twari tuyazi” Ngo abaturage bagize uburangare kuko bafite uburenganzira bwo kwanga umuyobozi nk’uwo utagize icyo abamariye.

Abajijwe niba imvugo zigereranya abaturage n’abanzi b’igihugu nka “FDRL” zikwiye gukoreshwa n’abayobozi, Shema yavuze ko bidakwiye na gato.

“Ntabwo ubuyobozi dufite mu Rwanda bwashyigikira imvugo nk’izo.” Jonas ariko yirinze kugira byinshi avuga kuri iki kibazo, ahubwo agaragaza ko agiye kugikurikirana mu maguru mashya akamenya koko niba ari ukuri agafasha abaturage kugisohokamo. Ashimangira ko abaturage bashobora kuba barahuye n’akarengane bakagizemo uruhare ngo kuko nta n’umwe wagejeje iki kibazo ku nzego zikuriye uwo muyobozi w’umudugudu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .