00:00:00 IGIHE NETWORK KN KINYARWANDA EN ENGLISH FR FRANCAIS

Iwabo wa ba kagarara, ba ruharwa n’inzobere mu mategeko: Urwibutso ku hahoze Minijust

Yanditswe na Musangwa Arthur
Kuya 2 June 2022 saa 07:04
Yasuwe :

Inyubako yahoze ari igicumbi cy’ubutabera yose yamaze kujya hasi. Ubu igisigaye ni itongo, mu minsi mike tuzahabona umuturirwa ugezweho w’ubucuruzi, Inzovu Mall.

Birashoboka ko iyo nyubako ijyanye n’amateka yayo, kuko uzaza nyuma ntazamenya ibyahabereye uretse uwabibonye.

Mbere y’uko ajya mu kiruhuko, Prof Sam Rugege wari Perezida w’Urukiko rw’Ikirega mu 2011 - 2019, yasize atanze impuruza ko aho inkiko zikorera hadakwiriye.

Ubwo hatangizwaga umwaka w’ubucamanza wa 2019-2020, yabwiye Perezida Paul Kagame ati "Urukiko rw’Ikirenga na rwo rumaze igihe rutakamba ko rwakubakirwa kubera inyubako ishobora kuzagwa, tukaba twumva by’umwihariko inkiko nkuru zashakirwa uburyo, zikubakirwa ahantu hihariye ingoro z’ubutabera zikwiranye n’imirimo zikora."

Umuti waje kuvugutwa, haboneka inyubako igezweho ubu ikoreramo Urukiko rw’Ikirenga n’Urukiko rw’Ubujurire, ku Kacyiru.

Minisiteri y’Ubutabera, Urukiko rw’Ikirenga, Ubushinjacyaha bukuru n’Urukiko rukuru, aho byakoreraga ku Kimihurura ubu hamaze guseywa.

Ku wa 26 Mata 2020, mu igazeti ya leta hasohotsemo iteka ryemeza ko leta yeguriye abashoramari icyo kibanza, gifite ubuso bwa metero kare 26,000.

Umushinga mushya uzahazamurwa uzaba uteganye na Kigali Convention Centre, ku buryo abantu bazajya bitabira inama zitandukanye bazaba bafite uburyo buboroheye bwo kubona serivisi zose bakeneye.

Igishushanyo mbonera cy’agateganyo kigaragaza ko hazaba hari hotel igizwe n’ibyumba 140 yitwa Odalys City Business Aparthotel, ibyumba by’inama, amahahiro, ibyumba by’imyidagaduro n’ibindi.

Ni inyubako yari ifite amateka akomeye

Ni inyubako yakorewemo n’inzego z’ubutabera, zatanze umusanzu ukomeye mu kongera kunga iki gihugu nyuma ya Jenoside yakorewe Abatutsi mu 1994.

Ntirwari urugendo rworoshye, kuko amateka agaragaza ko mu bagombaga gutanga bwa butabera bose batari shyashya, urebeye ku mateka y’abagiye bayobora izo nzego kugeza magingo aya.

Uretse mu bihe bya nyuma gato ya Jenoside, nyuma yaho benshi cyane bitangiye urwego rw’ubutabera, bahatambuka gitwari.

Duhereye ku Urukiko rw’Ikirenga, Nyuma ya Jenoside yakorewe Abatutsi rwayobowe bwa mbere n’Umucamanza Jean Mutsinzi, kuva mu 1995 kugeza mu 1999.

Ni umugabo witangiye uru rwego mu buryo bukomeye, ku buryo na nyuma yaho yaje gushingwa kuyobora itsinda ry’impuguke ryakoze iperereza ku ihanurwa ry’indege Falcon-50 yari itwaye Perezida Juvenal Habyarimana na mugenzi we w’u Burundi Cyprien Ntaryamira, mu ijoro ryo ku wa 6 Mata 1994.

Ryaje kwanzura ko iyo ndege yarashwe n’ibisasu by’izari Ingabo z’u Rwanda hafi cyane y’Ikibuga cy’indege cya Kigali, i Kanombe, bitangazwa mu cyaje kumenyekana nka "Raporo Mutsinzi".

Muri Nyakanga 1999, Mutsizi yaje gusimburwa na Siméon Rwagasore wari umaze igihe ari Umushinjacyaha mukuru. Icyo gihe batorwaga n’Inteko ishinga amategeko y’inzibacyuho, agira amajwi 44 kuri 64 y’abatoye.

Muri icyo gihe, Pierre Ndolimana wari umudepite yatorewe kuyobora Urukiko rushinzwe kurengera Itegeko nshinga, ubu rutakibaho.

Nyuma ya Rwagasore haje Aloysia Cyanzayire (2004-2014), waje gusimburwa na Prof Sam Rugege, na we akorerwa mu nganda na Dr. Faustin Ntezilyayo.

Ku ruhande rw’Ubushinjacyaha, Rwagasore yasimbuwe na Gahima Gerard, haza Jean de Dieu Mucyo kuva mu mu 2006 kugeza mu 2007, Richard Muhumuza ( 2013 - 2016), Jean Bosco Mutangana (2016 -2019), basimburana kugeza kuri Havugiyaremye Aimable uriho ubu.

Dutinze gato kuri Gahima Gérard, yari azwi nk’umuntu wakoreshaga nabi umutungo wa Leta.

Mbere yaho yari umunyamabanga mukuru wa Minisiteri y’Ubutabera, nk’urwego rwari rufite akazi gakomeye mu mishinga ijyaye no kuzahura uru rwego rwari rwarasenywe na Jenoside.

Umwe mu baganiriye na IGIHE yagize ati "Gahima nk’umunyamabanga mukuru yari afite ikiganza ku gengo y’imair, niho bivugwa ko yakoragamo akubaka hoteli yari inyuma ya Minijust, ubu hari Lemigo Hotel, ni Gahima wayitagiye, yari iye. Ukibaza rero ngo Umunyamabanga mukuru muri Minijust yubaka ate hoteli?"

Gusa ngo kubera ko icyo gihe yari akomeye, nta washoboraga kumuvuga mu baturage basanzwe.

Ubwo yari amaze kuba Umushinjacyaha mukuru, Gahima avugwaho ko yafunze abantu benshi, ari nabwo hamenyekanye imvugo yitwaga "funga mjinga".

Icyo gihe ngo yashoboraga guhamagara umucuruzi akamubwira ko amufiteho ikirego, akamwaka miliyoni ashaka kandi akazitanga.

Icyo gihe umuryango wabo wari ukomeye, kuko umuvandimwe we Dr Théogène Rudasingwa yari umuyobozi w’Ibiro bya Perezida wa Repubulika.

Ariko iminsi iba myinshi igahimwa n’umwe! Gahima yaje kuvanwa kuri uyu mwanya ahita ahunga, ibyagaragazaga ko yari afite ibyo yikeka ko agomba kuryoza, umuvadimwe we Rudasingwa aza kumukurikira.

Ubu bombi ni umwe mu bagize ishyaka RNC, usebya u Rwanda n’ubuyobozi bwarwo, ndetse ushinjwa ibikorwa bitandukanye bigamije kuruhungabanyiriza umutekano.

Nyuma y’ugukomera kwabo kwagendaga kuyoyoka, ni nako byagenze kuri Gahima, kuko mu 2011 yaje gukatirwa gufungwa imyaka 20 hamwe na Patrick Karegeya, mu gihe Kayumba Nyamwasa na Theogene Rudasingwa bakatiwe gufungwa imyaka 24, kuko bo hejuru y’ibyaha byo kurema umutwe w’ingabo utemewe, kubangamira umutekano w’igihugu n’ibindi, hiyongeragaho gutoroka igisirikare.

Mu bandi bakoreye muri iyi nyubako bagize amateka atavugwaho rumwe, harimo Alype Nkundiyaremye wahoze ari umucamanza mu cyitwaga "conseil d’Etat". Nyuma yaje gushyirwa mu Urukiko rw’Ikirenga rumaze kujyaho nyuma ya Jenoside, akaba umuntu wapingaga leta y’u Rwanda ku rwego rwo hejuru, kuko yari yarabaye no mu bucamanza ku bwa Habyarimana.

Ni kimwe n’abitwaga Rubaduka Jean, na Major Cyiza Augustin wari Perezida wa w’Urukiko rusesa imanza. Rubaduka yaje kwirukanwa n’Inama nkuru y’ubucamanza.

Ni mu gihe Nkundiyaremye yaje guhungira mu Bubiligi agwayo, naho Major Cyiza Augustin aho aherereye ntihazwi. Yabanje kuva mu Urukiko rw’Ikirenga, nyuma ajya kuba umwavoka.

Hari amakuru ko muri iki gihe, abo bari mu bucamanza, babaga bandikirana n’abasirikare bahoze mu ngabo bari za Mugunga muri Congo, ku buryo ubuyobozi bwaje kubatahura.

Ku ruhande rwa Minisiteri y’Ubutabera, yo yayobowe na Alphonse-Marie Nkubito(1994-1995) Marthe Mukamurenzi (1995-1996), Faustin Nteziryayo (1996-1999), Jean de Dieu Mucyo (1999-2003), Edda Mukabagwiza (2003-2006), Tharcisse Karugarama (2007-2013), Johnston Businye (2013– 2021) na Dr. Emmanuel Ugirashebuja uriho ubu.

Ibyemezo bikomeye byarahafatiwe

Mu bibuka iriya nyubako, bazahora bazirikana ko yatangiwemo ubutabera guhera ku baturage boroheje kugeza ku bakomeye, barimo Pasteur Bizimungu wabaye Perezida wa mbere w’u Rwanda nyuma ya Jenoside kuva muri Nyakanga 1994 kugeza muri Werurwe 2000.

Ku wa 17 Gashyantare 2006, Urukiko rw’Ikirenga rwatesheje agaciro ubujurire bwe ku gifungo cy’imyaka 15 yari yarakatiwe mu 2004, ku byaha birimo kunyereza umutungo wa Leta no kurema umutwe w’ingabo utemewe. Yari amaze gushinga ishyaka PDR Ubuyanja.

Undi mwanzuro ukomeye wafatiwe muri iriya nyuma, ni ujyanye n’ivugururwa ry’Itegeko Nshinga mu 2015.

Abaturage bateruye ibiseke birimo ubusabe bw’uko Inteko ishinga amategeko yavugurura Itegeko Nshinga, cyane cyane mu ngingo ya 101 yagenaga manda ntarengwa za perezida wa repubulika.

Ni icyemezo kitanyuze ishyaka Democratic Green Party riyoborwa na Dr Frank Habineza, maze ryitabaza urukiko rw’Ikirenga. Ku wa 8 Ukwakira 2015 rwatangaje umwanzuro warwo ko iri shyaka ritsinzwe, umuyobozi waryo atangaza ko batabyishimiye ndetse bagiye guca undi muvuno wo gusaba abaturage kutazatora YEGO muri referandumu.

Byarangiye abaturage babitoye ku rwego rwo hejuru, Itegeko Nshinga riravugururwa.

Ni inyubako yafatiwemo ibyemezo byinshi byahinduye ingingo zimwe z’amategeko, ndetse bitanga umurongo uzifashishwa mu zindi manza mu gihe kirekire, ikizwi mu mategeko nka precedence.

Izi nyubako zahoze ari igicumbi cy'ubutabera zamaze gusenywa
Ahahoze hakorera Minijust, Ubushinjacyaha bukuru, Urukiko rw'Ikirenga n'izindi nkiko nkuru, hamaze gusenywa ku buryo ari ikibanza gisukuye
Dr Frank Habineza yaburaniye ku Kimihurura mu izina ry'ishyaka Democratic Green Party of Rwanda
Mu gihe gito ahakoreraga inkiko nkuru, Minisiteri y'Ubutabera n'Ubushinjacyaha hagiye kuzamurwa Inzovu Mall
Gerard Gahima wabaye Umushinjacyaha mukuru, ubu aba mu buhungiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .