Iryo tegeko riteganya ko igipimo cy’amahoro yakwa kuri lisansi cyangwa mazutu ari 15% by’agaciro ka lisansi cyangwa mazutu, ikiguzi cy’ubwishingizi n’icy’ubwikorezi.

Biteganyijwe ko ku ruhande rw’ibinyabiziga bizajya byishyura hagendewe ku bwoko bwabyo.

Imodoka izajya yishyura amafaranga make ni ivatiri igomba kwishyura nibura ibihumbi 50 Frw na ho rukururana nini yishyure ibihumbi 150 Frw buri mwaka.

Ibinyabiziga bizajya byishyura amahoro agenewe gusana imihanda muri ubu buryo; ivatiri (Voiture) ni 50.000 Frw, Jeep ni 50.000 Frw, Pick-up 100.000 Frw, Microbus yishyure 100.000 Frw, Minibus na yo ni 100.000 Frw, bisi izajya yishyura 100.000 Frw, ikamyo yishyure, 120.000 Frw, rukururana nto itange 120.000 Frw naho rukururana nini izajya yishyura 150.000 Frw.

Amahoro yakwa kuri lisansi na mazutu yakirwa kuri gasutamo hakurikijwe itegeko rya gasutamo, amenyekanishwa kandi akishyurwa ku buyobozi bw’imisoro bitarenze ku wa 31 Ukuboza.

Ku rundi ruhande, ayakwa ibinyabiziga azajya, amenyekanishwa kandi yishyurwe ku buyobozi bw’imisoro bitarenze ku wa 31 Ukuboza buri mwaka.

Biteganyijwe ko ibinyabiziga bya Leta y’u Rwanda; ibya Ambasade n’iby’abahagarariye ibihugu byabo mu Rwanda; ibinyabiziga by’imiryango mpuzamahanga ifitanye amasezerano n’u Rwanda bisonorwa kuri ayo mahoro.

Depite Mukabunani Christine yagaragaje ko atumva impamvu ibyo binyabiziga byasonerwa kandi ari amahoro ajyanye no gusana imihanda, buri kinyabiziga cyose kiwukoresha gikwiye kuyishyura.

Ati “Impamvu yo gusonera ibi binyabiziga ni iyihe? Ku bwanjye numva umuntu wese ukoresha umuhanda yatanga aya mahoro, yaba ari ibinyabiziga bya leta cyangwa ibyo byose byarondowe. Njyewe numva nta mpamvu yo kugira abasonerwa ngo abandi batange ayo mahoro kuko umuhanda ukoreshwa n’abantu bose.”

Perezida wa Komisiyo y’Ubukungu n’Ubucuruzi, Depite Munyangeyo Théogène, yasobanuye ko bimwe mu binyabiziga byasonewe hagendewe ku mategeko mpuzamahanga anemeza ko hari n’ibindi bishobora gusonerwa nyuma yo kubisaba binyuze mu nzira yagenwe.

Ati “Ibyo uvuga ni byo natwe twarabiganiriye, hari n’abari batangiye kuvuga ko abafite ubumuga nabo twabasonera ariko tukavuga ngo hari ababufite bishoboye."

"Ibyo byajya birebwa n’andi mategeko, umuntu ukeneye gusonerwa bikarebwaho, ariko aha ngaha urebye bagendera ku mategeko mpuzamahanga baba barasinyanye. Ni uko twabigennye ubwo nibazajya bagenda cyane imisoro tuzajya tuyibonera kuri litiro ya lisansi banyweye ariko ku binyabiziga tubasonere.”

Umunyamabanga wa Leta muri Minisiteri y’Imari n’Igenamigambi, ushinzwe Imari ya Leta, Kabera Godfrey, yashimangiye ko imodoka z’imiryango itari iya leta idaharanira inyungu, zishobora gusonerwa nyuma yo kubisaba Minisitiri w’Imari n’Igenamigambi.

Abadepite bemeje itegeko rishyiraho amahoro agenewe gusana imihanda

Ivatiri izajya yishyura ibihumbi 50 Frw buri mwaka

Bisi zizajya zitanga ibihumbi 100 Frw nk'amahoro agenewe gusana imihanda