Itorero Inkerabigwi ryiyemeje gusenyera umugozi umwe, risabwa kwesa imihigo

Yanditswe na

Kayitare Jean Paul

Kuya 15 Werurwe 2015 saa 03:13
Yasuwe :
0 0

Itorero Inkerabigwi rigizwe n’abayobozi n’abarimu ba kaminuza basoje itorero rimaze icyumweru ribera i Gabiro mu Karere ka Gatsibo mu Ntara y’Uburasirazuba, biyemeza gusenyera umugozi umwe no kuzamura ireme ry’uburezi.

Intore z’Inkerabigwi zivuga ko zungukiye byinshi muri iri torero kandi ko zigiye gushyira hamwe kugira ngo zigaragaze uruhare rwazo mu iterambere ry’igihugu.

Zahigiye kandi kuzamura ireme ry’uburezi, kugaragaza isura nziza y’u Rwanda no gusenyera umugozi umwe mu kugira uruhare mu iterambere ry’igihugu.

Beatrice Yanzigiye umwarimu muri Kaminuza y’u Rwanda ishami ry’uburezi rya Kigali, yagize ati ʺTwigiye gukorera hamwe, twagiraga ibibazo byo kutamenya icyerekezo igihugu kihaye n’ibyo twigisha aho birahurira, ariko twabisobanukiwe.ʺ

Yanzigiye akomeza avuga ko biyemeje gutahiriza umugozi umwe kuko ngo bakorera Umunyarwanda.

Bimwe mu byo izi ntore zivuga, zihamya ko zigiye guhindura imikorere, no kongera ubushakashatsi mu myigishirize yazo hagamijwe kuzamura ireme ry’uburezi.

Eric Hatungimana umwarimu mu ishami ry’ubuhinzi n’ubworozi rya Busogo, yavuze ati ʺTwigishijwe kwigisha ibirenze kwigisha ibyo twatangaga tugendeye ku ndangagaciro nyarwanda na kirazira kugira ngo ibyo twubaka bizarambe.ʺ

Hatungimana yongeyeho ati ʺNk’intore tugomba gutoza icyo turi cyo aho gutoza icyo tuzi.ʺ

Izindi ntore zaganiriye na IGIHE zivuga ko zizashyira ubufatanye hagati y’inzego zose, ibyo zigisha bikava mu magambo bikajya mu bikorwa.

Ku rundi ruhande, zisaba minisiteri y’uburezi ku bufatanye na leta, gushakirwa amahugurwa hanze y’igihugu kugira ngo ireme ry’uburezi rirusheho gutera imbere.

Minisitiri w’uburezi Prof. Silas Rwakabamba asoza itorero Inkerabigwi, yasabye intore kwesa imihigo zahize.

Yagize ati ʺNimushyira mu bikorwa ibyo mwahize, bizagira umusaruro ku iterambere ry’ igihugu cyacu.ʺ

Akomeza avuga ko gukora ubushakashatsi ku masomo abarimu ba za kaminuza bigisha, ari imwe mu nzira yo kwesa imihigo bahigiye imbere y’inzego zitandukanye.

Bimwe mu byifuzo intore z’inkerabigwi zagaragaje nko gushakirwa amahugurwa hanze, Minisiteri y’Uburezi yazemereye ko izazifasha ndetse n’imihigo zahize ikaziba hafi.

Itorero Inkerabigwi ryatangiye kuva tariki ya 07 -15 Werurwe 2015 i Gabiro mu karere ka Gatsibo mu, ryahuje abarimu n’abayobozi ba kaminuza barenga 200.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza