Isuku mu Mujyi wa Huye: Gutema insina, imiyenzi yakuweho, imitaka ya Me2U ntiyemewe

Yanditswe na Prudence Kwizera
Kuya 27 Mutarama 2020 saa 05:43
Yasuwe :
0 0

Mu Karere ka Huye ubuyobozi buri gushyira mu bikorwa imyanzuro yafashwe yo kwimakaza isuku mu Mujyi wa Huye aho insina zirimo gutemwa, nta bihingwa birebire byemewe, inzitiro z’imiyenzi, imbingo n’imihati biri gukurwaho ndetse n’abacuruza Me2U ntibemerewe gushinga imitaka.

Muri Nzeri 2019 Ubuyobozi bw’Akarere ka Huye bwafashe icyemezo cyo gusaba abatuye mu Mujyi wa Huye bafite ingo zizitije imbingo, imiyenzi, n’ibindi bitajyanye n’umujyi kubikuraho mu gihe kitarenze amezi atatu.

Icyo cyemezo kandi cyavuga ko n’abakorera ibikorwa by’ubuhinzi mu Mujyi wa Huye bagomba kubihagarika mu gihe kitarenze amezi atatu.

Hirya no hino mu mirenge igize Umujyi wa Huye icyo cyemezo cyatangiye gushyirwa mu bikorwa. Bamwe mu baturage bavuga ko ikijyanye no gukuraho inzitiro bagishyigikiye.

Munezero Vincent ati “Turabizi ko imiyenzi itemewe mu mujyi ni yo mpamvu biri gukurwaho kuko biteje umwanda, bigamije gutuma umujyi ucya kandi ni iterambere.”

Nyiramana wo mu Murenge wa Ngoma na we ashyigikiye ko isuku yimakazwa mu Mujyi wa Huye.

Ati “Iki gikorwa urebye ni icyo gukora isuku kandi niba bashaka kwagura umujyi ibyo bitajyanye nawo bigomba kuvaho.”

Gutema insina byakiriwe gute?

Abaturage baganiriye na IGIHE bagaragaje ko gutema insina batabyakiriye neza kuko zari zibatunze.

Habiyambere Emmanuel ati “Gutema insina ni nk’uko wafata inka ukayikamira hasi, ntabwo nakubwira ngo ndabyishimiye; nta kuntu wambwira ngo nteme insina munsi y’urugo ngo mpatere igiti. Igiti se kiraribwa? Uwo muturage se ntumuteje inzara!”

Bamwe basanga insina yari ikwiye kujya mu bidukikije bakayihorera kuko ngo idateza umwanda.

Izabayo Anicet ati “Gutema insina byatubabaje kuko umuntu yakuragaho igitoki cyo kurya, insina mbona ikwiye kujya mu bidukikije bakayihorera kuko idateje umwanda.”

Insina ziri gutemwa ariko izamaze kwana bari kuzihorera kugira ngo ibitoki biriho bibanze byere.

Umuyobozi wungirije ushinzwe iterambere ry’ubukungu mu Karere ka Huye, Kamana André, yavuze ko abaturage bagomba kubahiriza ibiri mu gishushanyo mbonera cy’Umujyi kandi ko hashize igihe babitegujwe.

Ati “Icyo tubasaba cya mbere ni uko bubahiriza igishushanyo mbonera cy’umujyi, niba umuntu afite icyangombwa cyo gutura uragenda ugasangamo urutoki n’ibigori; ni ukuvuga ngo na ya suku twifuza na kwa kurwanya indwara ni ho usanga imibu yaragize indiri.”

Yabibukije ko imyaka miremire itemewe mu mujyi gusa ngo ushaka guhinga ibihingwa bigufi nk’imboga we nta kibazo yabikora.

Abatuye mu Mujyi wa Huye kandi basabwe gutunganya inyuma y’ingo zabo bahashyira ubusitani bwiza, hagaterwa n’ibiti by’imitako ndetse bagatema ibihuru aho bigaragara hose.

Buri rugo n’abafite inzu z’ubucuruzi basabwe kugirana amasezerano n’abatwara imyanda ahabugenewe.

Ubuyobozi bwanibukije kandi abafite ibibanza mu Mujyi wa Huye bitubatswe, kubitunganya no kubibyaza umusaruro.

Nta mitaka ya Me2U yemewe

Ku kijyanye no gukuraho imitaka, bamwe mu bakorera ibigo by’itumanaho bitandukanye byo mu Rwanda, bazwi nk’aba-Agents, bavuga ko icyemezo cyo kubakura ku muhanda bakabajyana ku isoko batacyishimiye kuko kigamije kubahombya.

Umwe ati “Twebwe turababaye kuko dutanga imisoro kandi hari amafaranga badukata; kuki bashaka kutwirukana mu mujyi kandi natwe dutanga imisoro?”

Bamwe muri bo basanga imitaka idateza umwanda bagasaba ko bahabwa agace runaka kajya gashyirwamo umubare wifuzwa.

Ati “Imitaka ntabwo iteza umwanda ahubwo wenda batubwira uduce tuyishyiramo n’umubare bifuza ko tutarenza ariko bakareka natwe tugashaka ubuzima.”

Umuyobozi w’Akarere ka Huye, Sebutege Ange, yavuze ko babikoze mu rwego rwo kwirinda akavuyo no guca akajagari mu mihanda yo mu Mujyi wa Huye rwagati.

Ati “Iyo harimo ubwo bucuruzi bw’akajagari bishobora no guteza impanuka ndetse n’ibindi bitari byiza; mubona namwe aho bacururiza ku muhanda mu mitaka ishaje myinshi iri mu buryo bw’akajagari. Icyo tubasaba ni ugushaka aho bakorera muri za kiosk zitangwa n’abacuruza izo serivise kandi nziza kugira ngo nabo bakore neza, bakorere ahantu heza.”

Sebutege yasobanuye ko ubucuruzi bakora bukenewe mu Mujyi wa Huye kimwe n’ahandi ariko ikirimo gukorwa ari ukubafasha kubushyira ku murongo kugira ngo bukorwe ku buryo bwiza butarimo akajagari.

Abatuye mu Mujyi wa Huye basabwe gutunganya inyuma y’ingo zabo bahashyira ubusitani bwiza
Bamwe mu bafite ibibanza byo kubaka mu Mujyi wa Huye bari basigaye babihingamo
Gutema insina mu Mujyi wa Huye ni kimwe mu bikorwa bigamije kwimakaza isuku
Insina zamaze kwana bari kuzireka ngo ibitoki bibanze byere
Ikigamijwe ni ukwimakaza isuku mu Mujyi wa Huye no guca akajagari mu bucuruzi
Inzitiro z'imiyenzi nazo ntizemewe bityo zatangiye gukurwaho
Muri Nzeri 2019 ni bwo Ubuyobozi bw’Akarere ka Huye bwafashe icyemezo cyo gusaba abatuye mu Mujyi wa Huye guhagarika kuhakorera ibikorwa by'ubuhinzi
Mu Mujyi wa Huye ahahoze hateye imitaka y'abacuruza Me2U yakuweho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .