Ishusho y’Umubano w’u Buhinde n’u Rwanda kuva Narendra Modi yasura u Rwanda

Yanditswe na Ndahayo Emmanuel
Kuya 27 Kanama 2020 saa 09:16
Yasuwe :
0 0

Mu 2018, umubano w’u Buhinde n’u Rwanda warushijeho gushimangirwa ubwo Minisitiri w’intebe w’iki gihugu, Narendra Modi yagiriraga uruzinduko rwa mbere mu rw’imisozi igihumbi, rwahinduye isura y’umubano hagati y’ibihugu bisanganywe ubufatanye kuva kera.

Ni uruzinduko rwashimangiye ubushake bwa Leta zombi bwo gushimangira umubano ushingiye ku iterambere, dore ko ibihugu byombi bisangiye byinshi, birimo umuvuduko wo kubaka iterambere rirambye.

Mu ruzinduko rwe, ibihugu byombi byasinye amasezerano y’ubufatanye (MoUs) yibanda ku byiciro nk’umutekano, ubucuruzi, ubufatanye mu kongera umusaruro w’amata, ubufatanye mu kuzamura umusaruro w’impu, ubuhinzi ndetse n’umuco.

Icyo gihe Minisitiri w’Intebe w’u Buhinde yageneye u Rwanda impano y’inka 200, zahawe abaturage bo mu Karere ka Bugesera mu Burasirazuba bw’u Rwanda. Ibi byari ikimenyetso gikomeye kuko inka ari itungo risobanuye byinshi cyane mu muco w’u Buhinde, ari na ko bimeze mu muco w’u Rwanda.

Icyo gihe kandi u Buhinde bwahaye u Rwanda ibitabo 100000, mu rwego rwo guteza imbere uburezi. Hanasinywe amasezerano afite agaciro ka miliyoni 200$ (miliyari 193 Frw) azafasha mu guteza imbere kuhira imyaka ndetse n’icyanya cyahariwe inganda.

Mu kiganiro na IGIHE, Uhagarariye u Buhinde mu Rwanda, Oscar Kerketta, yavuze ko aya mafaranga yamaze kongerwa.

Ati “Nishimiye ko amafaranga u Buhinde bwateganyirije u Rwanda ahagaze kuri miliyoni 547$ (miliyari 528 Frw), akazifashishwa mu nzego nk’amashanyarazi, ubuhinzi, kuhira imyaka ndetse n’ubumenyingiro”.

Usibye aya mafaranga azafasha igihugu mu mishinga minini, u Rwanda rwungukira cyane mu ishoramari ry’ibigo by’ubucuruzi by’u Buhinde bimaze igihe bigaragaza inyota yo gushora ku isoko ry’u Rwanda. Nko mu mwaka wa 2017, u Buhinde bwari ku mwanya wa gatatu mu bihugu byakoze ishoramari rinini mu Rwanda, ryanganaga na miliyoni 83.1$ (miliyari 80.3 Rwf).

Oscar Kerketta avuga ko “ibigo by’ubucuruzi by’u Buhinde bishamadukira isoko ry’u Rwanda kubera amahirwe y’ubukungu ari mu gihugu, ubuyobozi bwiza ndetse n’uburyo u Rwanda ruza imbere mu korohereza ishoramari”.

Yasobanuye ko hari amahirwe menshi akeneye kubyazwa umusaruro hagati y’ibihugu byombi, nk’aho u Rwanda rushobora kongera ingano y’ibicuruzwa rwohereza mu Buhinde, kuko bikiri hasi magingo aya.

Bimwe mu bigo bikomeye by’Abahinde byashoye imari mu Rwanda birimo Airtel, Virunga Biotech Ltd, Marasa Holding, Accacia Property Development, Kabuye Sugar Works Sarl, Imana Steel Rwanda Ltd, Cardiac Specialty Rwanda, Rugabano Tea Company Ltd, Gisovu Tea Company Ltd n’ibindi.

Kugeza muri 2018, imishinga y’Abahinde mu Rwanda yari ifite agaciro ka miliyoni 389$, igaha akazi abantu 10175 mu nzego z’itumanaho, ikoranabuhanga, ubuhinzi, ubuzima n’ibindi.

Kerketta yabwiye IGIHE ko hatangiye ubufatanye hagati y’ibigo by’ubucuruzi by’ibihugu byombi. Ni ubufatanye bwiswe ‘India-Rwanda Innovation Growth Program’ bugamije kwifashisha ikoranabuhanga ry’u Buhinde mu iterambere ry’u Rwanda. Uyu mushinga watangijwe ubwo uwahoze ari Visi Perezida w’u Buhinde, Hamid Ansari yagiriraga uruzinduko mu Rwanda muri 2017.

Mu mwaka wa mbere w’ayo masezerano, ibigo by’ubucuruzi birenga 200 byo mu Buhinde byasinye ku masezerano y’ubufatanye n’ibigo birenga 100 byo mu Rwanda. Byitezwe ko mu myaka ibiri iri imbere, ibitekerezo by’ikoranabuhanga n’udushya bigera kuri 20 bizashyirwa mu bikorwa.

Ibigo by’ubucuruzi hagati y’ibihugu byombi kandi byasinyanye amasezerano agamije koroshya imikoranire hagati yabyo.

RwandAir yoroheje ingendo hagati y'u Buhinde n'u Rwanda kuko mu masaha atandatu gusa umuntu aba avuye i Kigali ageze i Mumbai

Kerketta avuga ko kimwe mu byatumye ibi byose bishoboka harimo n’itangizwa ry’ingendo hagati y’imijyi ya Kigali na Mumbai, ingendo zikorwa n’ikigo cy’u Rwanda gikora ingendo zo mu kirere, RwandAir.

Ati “Izi ngendo z’ingenzi hagati y’u Rwanda n’u Buhinde zoroheje cyane imigenderanire, bizamura ubucuruzi, ubukerarugendo ndetse n’ishoramari. Itangizwa rya serivisi zo gutwara imizigo mu kirere hagati ya Kigali na Mumbai ryagabanyije ikiguzi cy’ibicuruzwa binyujijwe mu kirere.”

Kugeza ubu, urugendo hagati ya Kigali na Mumbai rutwara amasaha atandatu gusa.

Uyu mubano mwiza kandi wanatumye hazamuka munini w’abanyeshuri b’abanyarwanda bajya gusoreza amasomo yabo mu gihugu cy’u Buhinde, bitewe n’uko ingendo ziganayo zorohejwe ndetse n’umuco w’uduce twombi ufitanye isano.

Kerketta yagize ati “Buri mwaka tubona ubwiyongere bw’abanyeshuri b’Abanyarwanda bajya mu Buhinde kurangiza amasomo yabo. Ibi biterwa n’impamvu zirimo kuba uburezi bw’u Buhinde buhendutse kandi bufite ireme, kuba hari amasomo atangwa mu cyongereza, umuco w’Abahinde wo kwakira abashyitsi, umuco w’u Buhinde muri rusange, uburyo bworoshye bwo gutanga visa n’ibindi”.

Oscar Kerketta uhagarariye u Buhinde mu Rwanda

Uyu mugabo kandi avuga ko kuba Akarere ka Afurika y’i Burasirazuba karimo Abahinde benshi bituma habaho isangira ry’umuco, ku buryo Abanyarwanda bajya mu Buhinde bisanzura.

Yongeyeho ko u Buhinde bwafashije abanyeshuri benshi b’Abanyafurika kubona amahirwe yo kwiga muri icyo gihugu ku buntu, ndetse n’Abanyarwanda benshi bakaba barabyungukiyemo.

Yagize ati “Nishimiye kuvuga ko, mu gukoresha ayo mahirwe, abanyeshuri benshi barangije amasomo yabo mu Buhinde none ubu bari kugira uruhare mu iterambere ry’u Rwanda”.

Kerketta yavuze ko ubufatanye mu iterambere buzakomeza, avuga ko inzego nk’uburezi, kubaka ubushobozi, ubuzima, ikoranabuhanga, ibikorwaremezo, ubuhinzi n’umutekano zishobora kwitabwaho cyane.

Yongeyeho ko ibihugu byombi birajwe ishinga no kuzamura umubano wabyo, avuga ko “urufunguzo rwo gukomeza umubano ruri mu gufatanya mu iterambere hagati y’u Buhinde n’u Rwanda”.

Yashimangiye ko ubu bufatanye buzagaragara binyuze “mu nkunga, ubujyanama mu bya tekinike, ibikorwa byo kwita ku burenganzira bwa muntu, inguzanyo zo kujya kwiga mu Buhinde ndetse n’izindi gahunda nyinshi zigamije kubaka ubushobozi”.

Usibye u Rwanda, u Buhinde bwanarushijeho gushora imbaraga nyinshi mu kubaka umubano ufatika n’umugabane wa Afurika muri rusange.

Nk’urugero, ubucuruzi hagati y’u Buhinde na Afurika bwari miliyari 69$ mu mwaka ushize, mu gihe u Buhinde bwari ku mwanya wa gatanu mu kugira ishoramari rinini muri Afurika, ringana na miliyari 54$.

U Buhinde bufite byinshi buhuriyeho na Afurika, birimo kugira amateka ajya gusa, cyane ashingiye ku bukoloni n’ingoyi yo kubwigobotora.

Yavuze ko umubano hagati y’u Buhinde na Afurika uri gutera imbere kuko “intego y’u Buhinde ni ukwagura amahirwe ya Afurika, kubaka ubushobozi, ubufatanye bushingiye ku byo Afurika yifuza ndetse no gukorera hamwe mu kugira uruhare mu bibera mu Isi, biha ijambo abaturage b’ibice byombi”.

Ni muri urwo rwego Oscar Kerketta avuga ko u Buhinde bushyigikiye amasezerano y’isoko rusange rya Afurika, AfCFTA, ndetse yishimira n’uruhare u Rwanda rwagize mu ishyirwa mu bikorwa ryayo.

Yagize ati “Ishyirwa mu bikorwa ry’amasezerano ya AfCFTA ni amahirwe yo kurushaho guteza imbere ubucucuruzi hagati y’u Buhinde na Afurika. Turashimira uruhare Leta y’u Rwanda yagize mu guharanira ishyirwa mu bikorwa rya AfCFTA”.

Oscar Kerketta kandi yavuze ko u Buhinde buri mu nzira zo gutangiza ikigo cyo guteza imbere kwihangira imirimo, kikazashyirwa mu kigo cy’amakoperative n’ibigo by’imari iciriritse (RICEM), ibyo bikorwa bikazarangira mu mezi macye iri imbere.

Ibiro by'Umuyobozi uhagarariye u Buhinde mu Rwanda biherereye i Nyarutarama mu Mujyi wa Kigali
Mu ruzinduko rwe mu Rwanda, Narendra Modi yahaye u Rwanda inkunga y'inka 200
Minisitiri w'intebe Narendra Modi icyo gihe yunamiye inzirakarengane zazize Jenoside yakorewe Abatutsi mu Rwanda mu 1994, zishyinguye ku Rwibutso rwa Gisozi
Ni uruzunduko rwarushijeho gushimangira imibanire hagati y'ibihugu byombi
Narendra Modi ubwo yakirwaga na Perezida w'u Rwanda Paul Kagame
Airtel Rwanda ni rimwe mu ishoramari rikomeye ryakozwe n'abashoramari b'u Buhinde

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .