00:00:00 IGIHE NETWORK KN KINYARWANDA EN ENGLISH FR FRANCAIS

Ishusho y’ibiyobyabwenge bikomeje kuzonga urubyiruko rwo mu Majyaruguru

Yanditswe na Claude Bazatsinda
Kuya 4 August 2022 saa 12:19
Yasuwe :

Ubuyobozi bw’Intara y’Amajyaruguru bufatanyije n’izindi nzego z’umutekano buvuga ko bwahagurukiye ikibazo cy’ibiyobyabwenge byiganjemo urumogi na kanyanga bikomeje kugaragara muri iyo Ntara bikangiza abaturage bakunze kubikoresha biganjemo urubyiruko.

Iki ni ikibazo kigaragarira mu mibare ya vuba kuko nko mu mezi atandatu abanziriza uyu mwaka turimo wa 2022 mu Ntara y’Amajyaruguru, Polisi y’Igihugu ifatanyije n’izindi nzego z’umutekano iz’ubutegetsi bwite bwa Leta n’abaturage, bafashe kanyanga igera kuri litiro 296. 439, urumogi rugera ku biro 643, udufunyika tw’urumogi 20.131 n’ibiti byarwo 74.

Abaturage 636 baketsweho kwishora mu bikorwa byo kubitunda, kubinywa, kubicuruza no kubikwirakwiza.

Ikiyobyabwenge ni ikintu cyose gihindura imitekerereze n’imyitwarire bikagira ingaruka ku buzima bw’umuntu, cyaba kinyowe, gihumetswe cyangwa gitewe mu rushing n’ubundi buryo bwose cyafatwamo.

Mu bikunze kugaragara mu Ntara y’Amajyaruguru harimo kanyanga n’urumogi akenshi usanga bituruka mu bihugu bihana imbibi n’u Rwanda nka Repubulika Iharanira Demokarasi ya Congo mu Burengerazuba bw’Amajyaruguru na Uganda bigakoresha n’abaturage ibindi bikajya gucuruzwa mu zindi ntara n’Umujyi wa Kigali.

Iki bivugwa ko ari ikibazo gikomeye kuko mu mubare w’abakunze kugaragara muri ibi byaha bifitanye isano n’ibiyobyabwenge, abagera kuri 70% ari urubyiruko kandi bikaba bibagiraho ingaruka zirimo gufungwa kuko babyishoyemo, urugomo n’ibindi.

Umuhuzabikorwa w’ibikorwa bya Polisi n’abaturage mu Ntara y’Amajyaruguru, SP Alex Ndayisenga, aburira abaturage bakomeje kubyishoramo ko bakwiye kubireka kuko bibakururira ibihano bikagira n’ingaruka mbi mu buzima bw’ababikoresha n’abatabikoresha.

Yagize ati" Tuributsa abaturage kwirinda kwishora mu byaha byo gucuruza no gukoresha ibiyobyabwenge kuko bibakururira ibihano biremereye byo mu rwego rw’amategeko, uretse kandi n’ibihano ibiyobyabwenge bigira ingaruka ku buzima bw’ababinyoye n’abatabinyoye. Ntabwo rero Polisi izigera iha agahenge abo bose babigiramo uruhare ndabagira inama yo gushakira imibereho mu bindi kuko iyo mu byaha ntiramba kandi turashimira abaturage bakomeza kuduha amakuru."

Guverineri w’Intara y’Amajyaruguru, Nyirarugero Dancille, avuga ko kugira ngo ibiyobyabwenge bicike muri iyo ntara bisaba ubufatanye bwa buri wese ariko hakitabwa ku burere butangirwa mu miryango ariko n’aho bigaragaye abaturage bakajya babitangaho amakuru.

Yagize ati "Kugira ngo dushobore kurwanya no kurandura ibiyobyabwenge bigaragara muri iyi Ntara, birasaba ubufatanye bwa twese haba abayobozi kuva ku Isibo kugera ku ntara, tugafatanya n’inzego z’umutekano ndetse n’abaturage bakarushaho gutanga amakuru aho babibonye cyangwa babikeka. Ikindi ni uko tugomba guhera ku muryango, tukita ku burere bw’abana bacu, tukamenya urubyiruko rwacu kandi tukarushaho kunga ubumwe mu muryango."

Mu bitaro bivura indwara zo mu mutwe by’i Ndera, umubare w’abafite ibibazo byo mu mutwe batewe n’ikoreshwa ry’ibiyobyabwenge wavuye kuri 994 muri 2010, ugera kuri 1432 muri 2015, 2804 muri 2016 naho muri 2017 ni abantu 1960 ari nako bikomeza kuza ku isonga mu kuba intandaro y’ibyaha bifitanye isano n’urugomo.

Gukoresha, gutunda, gukwirakwiza no gukoresha ibiyobyabwenge bihanwa n’amategeko aho ubihamijwe ahabwa igihano cy’igifungo gishobora no kuba icya burundu bitewe n’uburemere bw’icyaha ndetse n’ihazabu igera kuri miliyoni 20 z’amafaranga y’u Rwanda.

Mu 2017 mu Ntara y'Amajyaruguru hafatiwe ibiyobyabwenge bifite agaciro ka miliyoni 45 birimo na kanyanga
Mu biyobyabwenge biboneka mu Ntara y'Amajyaruguru harimo urumogi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .