Ishuri rya King David Academy rirashinjwa guteza itenguka ry’ubutaka ryangije byinshi

Yanditswe na Ndahayo Emmanuel
Kuya 23 Kanama 2020 saa 05:46
Yasuwe :
0 0

Ishuri ryisumbuye rizwi nka King David Academy, rirashinjwa kuba nyirabayazana w’ikibazo cy’iriduka ry’ubutaka mu Murenge wa Nyarugunga, ibintu bishobora kugira ingaruka zikomeye, cyane cyane biramutse bigeze ku butaka bw’Ikibuga cy’Indege Mpuzamahanga cya Kigali.

Ni ikibazo kiri mu mudugudu wa Kabagendwa, akagari ka Kamashashi, Umurenge wa Nyarugunga mu Karere ka Kicukiro.

Usibye abaturage bagirwaho ingaruka, iki kibazo kinagira ingaruka ku bikorwa remezo bikenewe mu gihugu.

Bimwe muri ibyo bikorwa bigirwaho ingaruka mu buryo butaziguye, harimo ivuriro rya ‘Legacy Clinic’, rimwe mu mavuriro yigenga akomeye mu gihugu, rikaba ari n’ishoramari ryagutse ryakozwe mu rwego rw’ubuzima mu Rwanda.

Harimo kandi ishuri rya King David Academy, rizwi cyane mu mashuri yisumbuye yigenga amaze igihe kinini hano mu Rwanda. Harimo kandi abaturage b’umudugudu wa Kabagendwa, cyane cyane abo mu Isibo ya Bunyarwanda.

IGIHE yamenye amakuru ko iki kibazo kizwi n’inzego zose bireba, kuva ku rwego rw’isibo kugera ku Mujyi wa wa Kigali ndetse n’Ikigo cy’Igihugu gishinzwe kurengera ibidukikije, REMA.

Aka gace ni agasozi, aho ivuriro rya ‘Legacy Clinic’ ryubatse mu gice cy’epfo, naho ishuri rya ‘King David’ rikaba ruguru.

IGIHE yifuje kumenya inkomoko y’iki kibazo, maze ikora ubushakashatsi bwimbitse, inavugisha buri wese bireba.

Imiterere y’ikibazo muri rusange ni amazi aturuka ruguru, agasenya ibikorwa biri hepfo aho ‘Legacy Clinic’ n’abandi baturage batuye, ariko by’umwihariko, ibi bikorwa biri guteza inkangu kuri uwo musozi, aho igice cy’epfo kigenda kiriduka.

N’ubwo iyi nkangu ikiri ku rwego rwo hasi, haramutse hatagize igikorwa, ishobora kurindimura agasozi kose, ndetse byagenda nabi, bikaba byanafata ku Kibuga cy’Indege kiri hakurya y’aka gace. Mu gihe twegereza ibihe by’imvura, izi mpungenge zirushaho kuba nyinshi.

Ku ruhande ry’ivuriro rya ‘Legacy Clinic’, bavuga ko ikibazo giterwa n’amazi yoherezwa n’ishuri rya ‘King David’ mu buryo budateguye neza, ndetse n’afashwe, agafatwa mu buryo butubahirije amabwiriza, ibyo bigatuma n’ubundi amazi amanuka, akabangamira ibikorwa biri hepfo y’ishuri.

Bijya gutangira, ishuri rya King David rishinjwa kuba ritari rifite uburyo riyobora amazi, arimo akoreshwa n’abanyeshuri, ava mu gikoni ndetse n’inyubako z’iryo shuri ntizigire uburyo bwo gufata amazi y’imvura.

Birumvikana ko amazi avuye muri iryo shuri yamanukaga yishakira inzira, ari na ko yangiza ibikorwa by’abaturage akanateza ibibazo by’umunuko.

Muri 2011, ivuriro Legacy Clinic ryubatswe muri ako gace, ritangira kubona ingaruka ziterwa n’ayo mazi yishakira inzira, maze, bahitamo gushaka uburyo bwo kuyayobora bayaganisha muri ruhurura rusange.

Ahagana mu za 2014, iri vuriro ryegereye abaturage n’ishuri, bemeranywa kwishakamo amafaranga yatuma hubakwa umuyoboro w’ayo mazi, maze ishuri rya King David ritanga miliyoni ebyiri, mu gihe ivuriro na ryo ryatanze amafaranga, abaturage batanga inkunga y’ubutaka buzanyuzwamo umuyoboro. Ni umuyoboro ufite nka metero ijana cyangwa zirengaho gato.

Uyu muyoboro wari ugenewe kunyuzwamo amazi y’imvura, ariko ntiwari uhagije kuko ishuri rya King David ari rigari, ku buryo umuyoboro umwe utari uhagije mu kuyobora amazi yose y’ishuri.

Umuturage witwa Gerard Nyirinkindi utuye muri aka gace kuva mu 1996, ni umwe mu bagizweho ingaruka zikomeye n’ibi bibazo kuko inzu yubakaga ihana urubibi n’ivuriro rya Legacy Clinic yarangiritse cyane, ku buryo kuyisana neza bizamuhagarara “atari munsi ya miliyoni 20 Frw”.

Uyu mugabo ni umwe mu batanze ubutaka kugira ngo hubakwe umuyoboro w’amazi. Mu isambu ye, harimo metero 66 z’uyu muyoboro.

Uyu mugabo yabwiye IGIHE ko yigomwe ubutaka bwe mu rwego rwo kurengera ibikorwa rusange, agafasha ishuri ryigisha abanyarwanda ariko nanone, akaramira inzu ye yari mu kaga.

Amaze gutanga ubutaka, Nyirinkindi yaje kwinubira uburyo ishuri rya King David ryoherezaga amazi y’umwanda muri wa muyoboro, kandi atari cyo wari waragenewe.

Aya mazi ngo yabangamiye cyane Nyirinkindi kuko yanyuraga mu kwe, kandi arimo imyanda abanyeshuri boze yatumaga haza umunuko ukabije.

Nyirinkindi ati “Imvura yaragwaga, King David bakaboneraho bakanyuzamo amazi y’imyanda. Ayo abana boze, ayo mu bwiherero n’ayo mu gikoni”.

Ibi byaje kuba ikibazo kinini, kuko uwo mwanda wakururaga umunuko kandi hafi y’ivuriro, biza kuba ngombwa ko aba baturage n’ivuriro bagaragaza ikibazo cyabo.

Imyobo yarikoze

Ishuri rya King David Academy ryaje gufata icyemezo cyo kugura ikibanza kiri munsi yaryo, cyubakamo imyobo yagombaga kwakira ya mazi yose akoreshwa n’ishuri. Ni imyobo mirebire birenga 10.

Ibi byari bigamije kwirinda ko amazi akomeza kujya mu baturage akabanukira.

Muri icyo kibanza kandi, ishuri rya King David ryubatsemo ikigega gikurura amazi kiyavana mu butaka agakoreshwa n’abanyeshuri.

Aha kandi ishuri ryahashyize biogas, byose ari ibikorwa byegeranye.

Nyirikindi akimara kubona imyobo icukuwe, yahise yegera umuyobozi w’ishuri rya King David, aramubwira ati “murashaka kunsenyera. Kuki udafata amazi ngo ukore ahantu amazi yakoreshejwe ashobora gusukurirwa (water treatment plant) nk’uko bigomba gukorwa kuko ikigo kizanakura”.

Icyo gihe ngo ‘ntacyo ubuyobozi bw’ishuri bwakoze’.

Abaturage n’ubuyobozi bwa Legacy Clinic, bavuga ko iyi myobo yagize uruhare mu gukongeza ibibazo byakurikiyeho.

Icya mbere ngo yari myinshi kandi yegeranye. Ikindi yari hafi y’ikigega cyari kigenewe kubika amazi yari buzavanwe mu butaka. Usibye ko uyu mushinga waje gupfa kuko icyo kigega cyaje kwangirika kitaramara kabiri

IGIHE yabajije abahanga mu bidukikije uburyo bwiza bwo kubika amazi, batubwira ko “kubika amazi mu myobo bishobora kugira ingaruka mbi ku bidukikije”.

Batubwiye ko uburyo bwiza bwo kubika amazi ari ukuyashyira mu bigega, ushaka kuyashyira mu myobo nawe akabyubakira neza kugeza hasi. Imyobo y’ishuri rya King David ntabwo yo yubakiye.

Iturika ridasanzwe

Nyirinkindi avuga ko ikigega cyubatswe gifite ubuso “nk’amashuri abiri cyangwa atatu” ari cyo ntandaro ya mbere y’isenyuka ry’inzu ye.

Ni ikigega cyabikaga amazi, ariko cyari cyubatse nabi ku buryo cyaje guturika mu ndiba kigishyirwamo amazi bwa mbere. Iri turika ryagihuje na ya myobo ku gice cyo hasi.

Iri turika ryagize ingaruka, kuko amazi n’itaka ryose byamanukaga bigana ku ruhande rw’epfo, aho Legacy Clinic na Nyirinkindi batuye.

Umuyobozi ushinzwe ubuvugizi mu ivuriro Legacy Clinic, Karim Abdul, yabwiye IGIHE icyo kigega kimaze guturika, ibyondo n’itaka byatembye bigana ku ivuriro ryabo byasenye igice cy’urukuta rufashe ubutaka bw’iri vuriro.

Ibi kandi byo byatumye iri vuriro rishaka abakozi bahoraho bo guhora bakuraho itaka, ariko kuko ntaho barijyanaga, ryahoraga rigaruka ndetse ibintu bikarushaho kuba bibi mu bihe by’imvura.

Ibi kandi byanabaye kuri Nyirinkindi, gusa we nk’umuturage, ntiyabashije kubona ubushobozi buhoraho bwo gukuraho itaka, ku buryo ryaje kwangiza igice cy’inzu yarimo kubaka.

Ati “Bashyizemo amazi bwa mbere, gihita gisenyuka [ikigega] uruhande rw’epfo na ruguru. Amazi cyayayoboraga ku nzu z’epfo, ku buryo ukwezi ku Ugushyingo na Ukuboza yabaye amezi mabi cyane kuri njye, ndetse n’abaturanyi banjye bo hirya batangira kugira ikibazo [kubera amazi yashokaga ubwo ikigega kimaze guturika]”.

Yongeyeho ko “hazaga amatoni menshi y’ibyondo udashobora gukumira, agakubita ikibambasi kikagwa”.

Nyirinkindi avuga ko ayo matoni yaterwaga n’uko icyo kigega kimaze guturika, cyapfumuye bya myobo mu ndiba, yose ikiteranya ikamanukana n’itaka bigana iwe ndetse no kuri Legacy Clinic.

Nyirinkindi avuga ko n’ubusanzwe amazi y’imyobo yamuteraga “ariko akaza mu ngano nto” noneho ikigega kimaze guturika “gifungura inzira, iba ruhurura yo munsi y’ubutaka”.

Yongeyeho ko iyo imvura yagwaga uyu munsi, “nabaga nzi ko ejo nzaba mfite amatoni menshi y’ubutaka [ibyondo] azaba yavuye kuri King David”.

Iri turika ryasandaje amazi munsi y’ubutaka no hejuru, ku buryo Karim Adul avuga ko ‘byahungabanyije agace kose’. Ati “Cyaraturitse amazi yuzura kariya gace kose aradutera ahantu hose ku buryo twagize ihungabana ry’ayo mazi”.

Iri turika ngo cyashegeshe ubutaka, amazi yinjira mu butaka buhoro buhoro arabworoshya, butangira gutenguka, ndetse n’umuhanda uri hafi aho urangirika ku buryo utari nyabagendwa

Ni umuhanda wubatswe n’imashini zatanzwe na Legacy Clinic, ku bufatanye n’inzego z’ibanze.

King David yigaramye ibirego byose, ishinja umujyi kuba nyirabayazana

Mu kiganiro cyihariye na IGIHE, Umuyobozi w’ishuri rya King David, Annet Mutamuriza, yavuze ko ibibazo bya Legacy Clinic bidaterwa n’ishuri rye, ahubwo biterwa n’uko iri vuriro ryubatse mu gishanga, kandi ubuyobozi bw’Umujyi wa Kigali bukwiye kwirengera ingaruka z’ibiri kuba kuko ‘ari bwo bwashutse iryo vuriro rikubaka mu gishanga’.

Yavuze ko atumva uburyo ishuri rye rishinjwa guteza ikibazo cy’amazi kandi abanyeshuri barasubijwe iwabo muri Werurwe kubera icyorezo cya Coronavirus mu gihe kandi kuri ubu, ari igihe cy’Icyi, aho nta mvura iri kugwa.

Ati “Ndibaza impamvu bari kuzamura ibyo birego ubu kandi nta banyeshuri dufite nta n’amazi dufite, nta kintu gihari.”

Mutamuriza avuga ko kuba Legacy Clinic ari ivuriro ryubatse mu gishanga, ari yo mpamvu bahora babona amazi apfupfunyuka, ahakana ko biterwa n’amazi yaturutse ku iturika ry’ikigega cyabo.

Ati “Ni amazi aturuka munsi y’ubutaka, ntibiterwa n’ukugwa kw’imvura, ariya mazi ahora hariya. Nuca kuri Legacy Clinic ujya ku Murindi, ugenda ubona amazi”, yibajije ati “ese ayo masoko aturuka muri King David?”.

Yavuze ko ibikorwa byabo bishobora kubangamira abaturanyi babo ari nk’urusaku rw’abanyeshuri, ariko amazi atarimo.

Avuga ku ngaruka z’imyobo iganisha amazi mu baturage, yavuze ko bidashoboka kuko ikigo cye gifite uko kimena amazi mabi.

Ati “Oya, dufite aho dushyira amazi abanyeshuri boze. Dufite uburyo dukoresha mu ishuri kandi tunafite amakamyo manini aza gutwara amazi y’imyanda, dufite ibyo byose”.

IGIHE yamubajije niba nta mazi yabo na make ajya ahura n’abaturage, avuga ko ari macye cyane, ati “uretse uburyamo bw’abakobwa busohora amazi hanze, ariko nayo ni amazi macye cyane ashobora kwinjirayo [mu baturage]”.

Mutamuriza yavuze ko n’ubwo ibyo byabaho, biheruka ‘kera cyane’ muri Werurwe, ubwo abanyeshuri bari bakiri ku ishuri.

Ati “Urabizi ko abana bavuye ku ishuri muri Werurwe, none bari kubivuga ubu.”

Nyirinkindi yabwiye IGIHE ko aya makuru atari yo kuko ‘imyobo ikigaragaramo amazi yabitswemo kuva na mbere hose’, bityo kuba abanyeshuri batagihari bidakuraho ingaruka zayo.

Mutamuriza avuga ko ishuri rye rifite uburyo bubiri bwo kuyobora amazi, ubugenewe amazi y’imvura n’amazi yakoreshejwe.

Yongeyeho ati ‘usuye ishuri ryacu, wabona ko ryubatswe mu buryo buyobora amazi yose mu nzira twayateganyirije”.

IGIHE yamenye ko hari amabaruwa iri shuri ryandikiwe risabwa kubaka uburyo bwo gufata amazi yaryo.

Ikindi kandi ni uko mu ntangiriro z’uyu mwaka, abayobozi batandukanye n’abaturage bagizweho ingaruka n’ibi bibazo basuye ishuri rya King David, basanga nta buryo bwagutse riyoboramo amazi yaryo. Icyo gihe ubuyobozi bw’ishuri bwavuze ko ‘buyobora amazi mu busitani bwaryo’.

Mutamuriza yongeyeho ko atumva impamvu ishuri rye risabwa kubaka uburyo butuma amazi yakoreshejwe yongera gusukurwa agakoreshwa, kandi nta kindi kigo cy’ishuri gifite iryo koranabuhanga mu gihugu.

Yavuze ko yabajije abayobozi kumwereka irindi shuri rikoresha ubwo buryo, ‘hakabura na rimwe’.

Yavuze ko amazi ikigo cye gishinjwa guteza yahahoze, ati “twayasanze hano kandi na Legacy yayasanze hariya”.

Yemeje ko Legacy yubatse mu gishanga kandi ibizi, avuga ko igikuta cyayo cyaguye bitewe n’uko ubutaka bw’igishanga budakomeye, ahakana ko ayo mazi yose azanwa n’ikigega cy’ishuri rye.

Ku bigendanye na biogas ishuri rye ryubatse ikaza gusenyuka ikohereza umwanda wayo muri Legacy Clinic, Mutamuriza yavuze ko byatewe n’imashini za Legacy zayisenye, ibintu iryo vuriro ryamagana.

Karim Abdul yavuze ko ibirego by’uko Legacy Clinic yubatse mu gishanga nta shingiro bifite, ‘kuko mbere yo kubaka habanje gukorwa inyigo igaragaza ko ahantu tugiye kubaka hemewe’.

Umuburo warirengangijwe

Inzego zitandukanye zandikiye ishuri rya King David zisaba kwiga ku kibazo gihari, gusa ibyinshi mu byasabwe ntibyashyizwe mu bikorwa.

Mu mabaruwa IGIHE ifitiye kopi, Nyirinkindi yandikiye ishuri rya King David, inshuro eshatu, arisaba kutamusenyera banyujije amazi munsi y’ubutaka.

Ubuyobozi bw’Umujyi wa Kigali kandi nabwo bwandikiye iri shuri, busaba “ryubaka ibigega bifata amazi y’imvura ava ku bisenge by’inyubako z’ishuri zose” ndetse no ‘kubaka imiyoboro ivana amazi mu ishuri ikayageza mu muyoboro mugari’.

Ibi bibazo kandi byatangiye mbere, abaturage barimo uwitwa Isaac Bizumurenyi yandikiye amabaruwa atandukanye inzego z’ubuyobozi bw’ishuri n’ubuyobozi bwa Leta asaba ko ikibazo cye kitabwaho.
Mu 2016, hateranye inama yigaga ku bibazo uyu mugabo yari yaragaragaje kuva muri 2014, nk’uko amabaruwa n’imyanzuro yafashwe muri iyo nama IGIHE ifitiye kopi abigaragaza.

Umuyobozi w’Isibo rya Bunyarwanda, Nteziryayo Richard, yabwiye IGIHE ko kuba ikibazo cyaravuzwe mbere cyane ariko imyanzuro yacyo ntishyirwe mu bikorwa, bigaragaza uburyo ubuyobozi bwa King David bwirengangije ikibazo.

Yavuze kandi iyo ubu buyobozi bwemera gukorana n’abaturage mbere, ikibazo kiba cyarashakiwe umuti mu maguro mashya, anenga ubu buyobozi uburyo bwitwaye.

Mu mpanuka zabayeho harimo n’iturika rya biogas ishuri rya King David ryavugaga ko itagikora, ikaza guturika nyuma y’amezi atatu Umujyi wa Kigali usabye ko ivanwaho ariko ntibikorwe.

Nyuma yo kutanyurwa n’imyanzuro y’Umujyi wa Kigali, Annet Mutamuriza yandikiye REMA, ariko iza kumusubiza ko agomba kubanza kuzuza amabwiriza yahawe mbere yo gusaba ubundi bugenzuzi.

Ayo mabwiriza arimo gukora inyigo z’isuzumangaruka ku bidukikije ndetse n’inyigo y’inzobere yize ku buryo ikibazo cy’umunuko cyacyemuka burundu.

IGIHE kandi yamenye ko hari ibikorwa iri shuri ryaregwaga bigakosorwa, nyuma bikongera gukorwa, nk’uko amabaruwa dufitiye kopi abigaragaza.

Kutita kuri ibi bikorwa byose byateye igihombo kinini cyane, aho ivuriro Legacy Clinic rivuga ko “rimaze kuhomba miliyoni 80 Frw”.

Iri vuriro rivuga ko ishuri rya King David rigomba kwishyura ibikorwa byose byangijwe n’amazi yabo, mu gihe Mutamuriza yabwiye avuga ko ahubwo iri vuriro ari ryo rizishyura ibirimo biogas yabo bangije ndetse n’ikiguzi cy’ibyo yangije byose.

Leta igiye kubyinjiramo

Umuyobozi w’Umusigire w’Ishami rishinzwe Ishyirwa mu Bikorwa ry’Igishushanyo mbonera mu Mujyi wa Kigali, Habiyambere Enan, yabwiye IGIHE ko n’ubwo habayemo uburangare bwatumye ikibazo cyaguka, ubu Leta igiye kucyinjiramo kuko gishobora kugira ingaruka zikomeye cyane kiramutse kititaweho.

Yagize ati “Hariya hari ikibazo cy’ubutaka bworoshye, buri gutenguka. Ikibazo cy’amazi [ari mu butaka] cyarushijeho kubworoshya”.

Yavuze ko mu rwego rwo kurushaho kugabanya umuvuduko wo gutenguka, basabye ishuri gukura amazi muri ya myobo ndetse n’imyobo igasibwa mu buryo bwihuse.

Yavuze ko bagiye babisabwa ariko ntibabikora kuva muri Gicurasi.

Yashimangiye kandi ko kutumvikana hagati y’inzego zombi byarushijeho gutiza umurindi ikibazo, aho bakomeje gushinjanya amakosa aho gushakira igisubizo hamwe.

Uyu mugabo kandi yavuze ko nta kosa ryabayemo ubwo Umujyi wa Kigali watangaga uruhushya rwo kubakwaho, kuko hari ibintu bishobora guhinduka nyuma nyuma yo gutanga uruhushya rwo kubaka.

Yongeyeho ati “n’ubwo byatangiye ari ikibazo cya ririya shuri na Legacy, Leta igomba kubyinjiramo kuko biriya ni ikiza kandi urabona ko bishobora kuzamuka no ku baturage ba ruguru. Ni umusozi uri gutenguka, birasaba ko Leta ibijyamo mu buryo bwihuse, ikabikemura nk’uko ikemura ibindi biza”.

Umujyi wa Kigali usobanura ko mu gihe iki kibazo cyakomeza, gishobora kugira ingaruka ku butaka buriho Ikibuga cy’Indege cya Kigali i Kanombe ku buryo bwakwangirika.

Mu buryo bwo gufasha guhangana n’ibi bibazo mu gihe gito, basabye ishuri rya King yasabwe gusiba imyobo, rigafata amazi yo ku bisenge byayo ndetse rikanakuraho ibigega bishobora guteza impanuka.

Legacy nayo yasabwe kuyobora amazi aturuka haruguru, ikayanyuza impande zayo ndetse no kwitegura uburyo haramutse haridutse, baba biteguye kwitabara.

Umujyi wanahagaritse ibikorwa iri vuriro ryarimo byo kubaka inyubako nshya, bakazakomeza bamaze gukora inyingo y’ubutaka.

Yasabye kandi abaturage kuyobora amazi mu miyoboro rusange aho bishoboka.

Umujyi wa Kigali wamaze gushyiraho itsinda rizakomeza kwiga kuri iki kibazo by’umwihariko.

Umuhanda wari nyabagendwa waratengutse
Inzu ya Nyirikindi yarengewe n'itaka
Ikigega cyari kigenewe kubika amazi cyaraturitse biteza impanuka nyinshi
Itaka riri kugenda ritenguka gahoro gahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .