Ishimwe Yvette yakabije inzozi zo kugeza amazi meza ku barenga 6000

Yanditswe na Hakizimana Jean Paul
Kuya 23 Werurwe 2019 saa 04:37
Yasuwe :
0 0

Ishimwe Yvette w’imyaka 23 wamenyekanye cyane ubwo yahembwaga n’Umwamikazi w’u Bwongereza, yegereje amazi meza abaturage 6 500 batuye mu Kagari ka Nkamba, Umurenge wa Ruramira, Akarere ka Kayonza.

Aba baturage batuye mu midugudu irindwi igize aka kagari, bakoraga ibilometero bitatu bajya kuvoma mu kabande, begerejwe inzu eshatu zimeze nka “Kiosk” bazajya bavomeraho amazi meza ijerekani ikazajya igura 25Frw.

Amazi yatanzwe azajya atanga metero kibe 30 ku munsi, uyu mushinga wose ukaba wuzuye utwaye miliyoni 65Frw. Harimo amafaranga Ishimwe yagiye ashakisha impande n’impande n’andi yahawe n’abafatanyabikorwa.

Gushyikiriza abaturage aya mazi byabaye kuri uyu wa Gatanu, ubwo hizihizwaga umunsi mpuzamahanga w’amazi.

Ishimwe avuga ko igitekerezo cyo guha amazi meza aba baturage cyaje ubwo we n’umuryango we bimukiraga mu karere ka Kayonza, agasanga abaturage baho bavunika cyane kugira ngo babone amazi meza.

Ati “Mbere ntabwo narinzi ko umuntu yamara ukwezi cyangwa amezi abiri atarabona amazi meza yo kunywa ariko nabonye ko ayo mezi yanashira n’amazi mabi wagura aguhenze utayabona. Byatumye ngira igitekerezo cy’ikintu nshobora gukora kugira ngo abantu babone amazi meza mu buryo burambye.”

Avuga ko yatangiye umushinga wo gukura amazi mu kiyaga cya Muhazi akayasaranganya mu baturage akoresheje amagare, gusa ngo ntibyatinze kuko yaje kubona abafatanyabikorwa bamwemerera kumufasha gukura amazi mu kabande n’imashini bakayayungurura bakayegereza abaturage, umushinga awutangira ubwo none birangiye abigezeho.

Afite inzozi zo gukomeza kwagura imiyoboro y’amazi hirya no hino mu Rwanda, cyane cyane mu cyaro ahadakunda kuboneka amazi.

Abaturage begerejwe amazi meza bavuga ko batazongera kwicwa n’umwanda kuko ubusanzwe ijerekani bayiguraga amafaranga 200 ariko ubu bakaba bayigura 25Frw.

Kankundiye Pascasie w’imyaka 84 yabwiye IGIHE ko afite ibyishimo bikomeye cyane kuko ngo hari igihe yajyaga abura amafaranga 200 yo kugura amazi meza none ngo bayazanye hafi ye.

Ati “Nanjye w’umukecuru nzana utubido nkavoma kuko amazi ari hafi yacu, mbere najyaga mbura amafaranga 200 yo kugura ariya yo mu kabande ariko ubu turayagura 20 gusa.”

Iyakaremye Jean Claude avuga ko kujya mu kabande byatumaga abana babo bakererwa ku ishuri ndetse rimwe na rimwe n’imirimo yo mu rugo igapfa bitewe nuko uwajyagayo agasangayo abantu benshi yavagayo bwije.

Perezida w’inama Njyanama y’Akagari ka Nkamba wavuze mu izina ry’ubuyobozi yashimiye Ishimwe wabafashije kubona amazi meza, amwizeza ko bazayabungabunga kandi bakayafata neza.

Mu 2017, Ishimwe yahembwe n’Umwamikazi w’u Bwongereza Queen Elizabeth ll nk’umwe mu bakiri bato bagize uruhare mu bikorwa bigamije guhindura ubuzima bw’aho rutuye no mu nkengero. Asanzwe afite ikigo gicuruza amazi kizwi nka ‘Iriba’ gikorera hirya no hino mu gihugu.

Ishimwe Yvette ahagaze imbere y'akazu k'amazi
Kuvoma ijerekani imwe ni amafaranga 25
Buri kazu gafite ibigega bibiri bikagaburira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza