00:00:00 IGIHE NETWORK KN KINYARWANDA EN ENGLISH FR FRANCAIS

Inzu icumbikamo abakinnyi ba Espoir FC yafashwe n’inkongi

Yanditswe na Iradukunda Olivier
Kuya 4 September 2022 saa 09:37
Yasuwe :

Inzu icumbikamo abakinnyi batanu b’Ikipe ya Espoir FC yo mu Karere ka Rusizi yafashwe n’inkongi, yangirikiramo bimwe mu bikoresho byari biyirimo.

Iyi nzu yafashwe n’inkongi mu masaha yo mu gitondo cyo kuri iki Cyumweru, tariki ya 4 Nzeri 2022, mu gihe abakinnyi bari bagiye mu myitozo. Ibi byatumye nta muntu n’umwe iyi mpanuka yahitanye.

Nubwo nta wayikomerekeye, ibikoresho byose by’abakinnyi birimo za matelas bararagaho, imyambaro ndetse n’ibyo mu ruriro byakongotse.

Umunyamabanga wa Espoir FC, Habimana François, yatangarije IGIHE ko icyateye iyi mpanuka kitaramenyakana.

Yagize ati “Twagize ibibazo duhisha icumbi ry’abakinnyi, ariko kugeza ubu ntituramenya icyateye iyi nkongi. Mu byangiritse byose harimo ibikoresho by’abakinnyi n’ibitanda byose, twabaze dusanga bifite agaciro ka miliyoni esheshatu z’amafaranga y’u Rwanda zirengaho make. Mbese nta kintu na kimwe twaramuye.”

Kugeza ubu ikipe yashatse aho iba icumbikiye abakinnyi mu gihe hakiri gushakwa uko bafashwa byisumbuyeho.

Habimana yavuze ko icyo bagiye gukora nk’ubuyobozi ari ukuganiriza abakinnyi kugira ngo nubwo bahuye n’ibibazo ariko bagume mu mwuka mwiza wo gutsinda.

Ikipe ibinyujije ku rukuta rwayo rwa Twitter, Espoir FC yatangaje ko inzu yahiye yari icumbitsemo abakinnyi batanu.

Yagize iti “Inzu icumbikamo bamwe mu bakinnyi ba Espoir FC yafashwe n’inkongi y’umuriro kuri iki cyumweru, yangirikiramo bimwe mu bikoresho by’abakinnyi byiganjemo imyambaro n’ibyangombwa byabo, muri iryo cumbi habagamo abakinnyi batanu ari na bo ibikoresho byabo byangiritse.’’

Mu bo ibyangombwa byabo byangiritse harimo n’abakinnyi b’abanyamahanga bakinira iyi kipe ibarizwa mu Karere ka Rusizi.

Ikipe ya Espoir FC yagize ibyago mu gihe yitegura urugendo rugana mu Mujyi wa Kigali aho igomba gukinira umukino w’Umunsi wa Kabiri wa shampiyona izakirwamo na Kiyovu Sports, tariki 7 Nzeri 2022, kuri Stade ya Kigali i Nyamirambo.

Inzu icumbikamo abakinnyi ba Espoir FC yafashwe n’inkongi kuri iki Cyumweru, yangirikiramo bimwe mu bikoresho by'abakinnyi
Icyateye iyi mpanuka ntabwo kiramenyekana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .